Філосаф, адзін з заснавальнікаў праекта «Цытадэль» Аляксей Дзермант даў інтэрв’ю для сайта «News Front – Навіны Наваросіі. ДНР, ЛНР сёння».
Вядучы перадачы Сяргей Весялоўскі не саромеўся ў выказваннях – «украінская ерась», «украінскія карацелі», «Украіну можа парваць на часткі Еўропа», «Адэскую вобласць пераўтвараюць у інтэрнацыянальны гадзюшнік», «нацыскі ўгар».
Дзермант гаварыў пра кланавасць украінскай эліты. «У Беларусі адбылася рэвалюцыя зверху. Замена старой савецкай наменклатуры, якая хацела стаць алігархамі, на выхадца з народа, народнага трыбуна. Менавіта таму многія палітолагі называюць прыход да ўлады Лукашэнкі рэвалюцыяй. Ён сур’ёзна пачысціў структуры ўлады, прывёў з сабой новую каманду. Лукашэнка зразумеў, што нельга дапусціць зрошчванне бізнэсу, былой партыйнай наменклатуры і крыміналітэту. Ён стварыў чыстыя дзяржаўныя структуры. На аснове гэтага і ўзнікла моцная дзяржаўная ўлада», — сказаў Дзермант.
«Ва Украіне ж усё пайшло па іншым сцэнары, партыйныя кланы захапілі самыя ласыя кавалкі ўкраінскай эканомікі, узнік алігархат. Затым для таго, каб легітымізваць сваю ўладу, на гэтай тэрыторыі пачалося заляцанне з радыкальнымі нацыяналістычнымі ідэямі.
То бок не было такога праекта, як у Беларусі, з апорай на вайну, на савецкае мінулае, на тое, што рэальна стварыла Беларусь. Пачаліся пошукі нейкіх старажытных казак, баек, пошук ворага, найперш у выглядзе Расіі, рускай мовы, агульнай гісторыі».
Тым не менш, Аляксей Дзермант сказаў, што з’яўляецца «прыхільнікам існавання Украіны». «Эксперымент Леніна і Сталіна па стварэнні нацыянальных дзяржаваў меў пад сабой аснову, ён не такі кепскі, як кажуць некаторыя ў Расіі. Тым не менш, я не бачу сёння ва Украіне, хто можа за Украіну рэальна змагацца. Дзейная ўлада – слабая, радыкальныя нацыяналісты – працуюць на дэстабілізацыю. Можа быць, нейкія адэкватныя вайскоўцы зразумеюць, што для Еўропы Украіна непатрэбная. Яна ім патрэбная ў якасці мяса, Самалі, не больш», — сказаў Дзермант.
Вяселоўскі спытаўся: «Да той пары, пакуль не будзе разбуранае дзяржаўнае кіраванне ў краіне, якое ўзначальваюць заакіянскія марыянеткі, нічога не можа змяніцца. Яны павінны ці самі збегчы, ці іх нехта павінен адсунуць, люстрыраваць самым негуманным спосабам, іншага шляху для выратавання Украіны не існуе». Дзермант адказаў: «Пакуль гэта бачыцца так».
Напрыканцы перадачы журналіст сказаў, што запрасіў у эфір Аляксея Дзерманта, каб «былыя суайчыннікі, якія жывуць ва Украіне, прыслухаліся да словаў чалавека, якія жыве ў Беларусі».
