Транспартнікі Беларусі і Польшчы вырашылі не спыняць фірмовы цягнік Мінск-Варшава як мінімум да мая. Пра гэта сёння паведаміў першы намеснік начальніка пасажырскай службы БЧ Андрэй Кашко, піша «Віртуальны Брэст».
Летась чыгуначны склад хадзіў з Мінска да Варшавы напаўпусты. А да канца года з-за праблем на валютным рынку яго напаўняльнасць і зусім знізілася да 35%. Гэты цягнік непапулярны ў пасажыраў галоўным чынам з-за дарагавізны квіткоў — амаль 1,3 мільёна ў адзін бок. Гэта амаль як цана за самалёт, прытым што цягнік некамфортны, пасажыры губляюць некалькі начных гадзін на замене колаў у Берасці.
Пытанне пра закрыццё прамога чыгуначнага злучэння паміж дзвюма сталіцамі ў сярэдзіне студзеня заявіў польскі бок. Аднак беларуская чыгунка папрасіла захаваць цягнік.
— Мы будзем рабіць маркетынгавыя хады, каб зрабіць больш даступнымі квіткі на цягнікі ў гэтым кірунку, — кажа прадстаўнік Беларускай чыгункі Андрэй Кашко..
Беларуская чыгунка не збіраецца адмяняць і цягнікі ва Украіну, хоць пасажырапаток у гэтым кірунку летась упаў амаль у два разы.
І там таксама ўкраінскі бок хацеў бы зменшыць колкьасць цягнікоў, беларусы ж прапануюць зніжаць цэны на білеты, але маршруты захаваць..
На кірунку Мінск — Вільня частата руху не зменіцца, але колькасць месцаў у некаторых цягніках можа скараціцца.
— Гэта тычыцца цягнікоў №801 і №802, якія знаходзяцца ў дарозе больш за чатыры гадзіны. Пасажыраў там хапае, па сутнасці, толькі для таго, каб запоўніць два вагоны. Паскорыць рух гэтага складу пакуль не ўдаецца, — прызнаўся Андрэй Кашко.
