«Нельга дамагчыся вынікаў у тым, чаго няма»: Юрый Зісер адказаў на вострыя пытанні чытачоў NN.BY 56

15 мая 2013 у 13:20

Спадар Юрый, што дрэннага асабіста вам ці народу Беларусі зрабіла Наталля Радзіна?

Юрый Зісер: Ужо пісаўпра гэта падрабязна.

Вадим напiсаў(ла) 15 мая 2013 у 13:26

Паважаны спадар Юры, як вы ставіцеся да Вялікага Княства Літоўскага, яго гісторыі, культуры, сімвалаў (Пагоня, нацыянальныя колеры) і ці падзяляеце меркаванне пра тое, што Беларусь мае права на гістарычную спадчыну гэтай дзяржавы і мы павінныя грунтаваць сваю ідэалогію ў тым ліку і на гэтай гістарычнай спадчыне? Ці, наадварот, лічыце, што гэта нам чужое, і знаходжанне ў складзе ВКЛ для нас іншародная з’ява? Дзякуй.

Юрый Зісер: Я глыбока паважаю нашую гісторыю, толькі вашае пытанне насамрэч не па гісторыі, а па сённяшняй палітыцы. Маё глыбокае перакананне ў тым, што гістарычныя аргументы нельга наўпрост выкарыстоўваць для абгрунтавання рашэнняў, якія прымаюцца сёння. Тым больш што ідэалогію, у адрозненне ад прапаганды, нельга навязаць: ідэалогія фармуецца ў нетрах самога грамадства і выцякае з наяўнай аператыўнай сітуацыі, а не з падзей паўтысячагадовай даўніны.

Зьміцер напiсаў(ла) 15 мая 2013 у 13:55

Добры дзень, спадар Зісер. Прэзентуючы нашую краіну, чыноўнікі асаблівую ўвагу звяртаюць на высокі ўзровень вышэйшай адукацыі ў Беларусі, у тым ліку і тэхнічнай. Адкажыце, калі ласка, як кіраўнік у сферы інфармацыйных тэхналогій, ці атрымліваюць сёння праграмісты і іншыя IT-спецыялісты якасныя веды па сваёй прафесіі ў беларускіх ВНУ і ці лёгка вам абраць сярод выпускнікоў нашых універсітэтаў апошніх гадоў якасных спецыялістаў?

Юрый Зісер: У ІТ-галіны шмат пытанняў да сённяшняй адукацыі ІТ-спецыялістаў, галоўны з якіх — не ўзровень падрыхтоўкі, а празмерна зацягнутыя тэрміны падрыхтоўкі праграмістаў-кадавальнікаў. Сёння ў галіне такі моцны кадравы голад, што многім кампаніям даводзіцца наймаць, не асабліва звяртаючы ўвагу на ўзровень. Пакуль мы на партале спрабуем браць не колькасцю, а ўменнем, хоць гэта звужае выбар і запавольвае пошук патрэбных спецыялістаў.

ranen напiсаў(ла) 15 мая 2013 у 14:12

На вашую думку, на якім этапе развіцця знаходзіцца Беларусь? Беларусь як дзяржава дэградуе або развіваецца? Якая роля СМІ ў дэмакратычнай і таталітарнай краіне? Якой вы б хацелі бачыць Беларусь, таталітарнай або дэмакратычнай?

Юрый Зісер: Безумоўна, нашыя дзяржава і грамадства развіваюцца. У дзяржаве прымаюцца новыя законы і ўдакладняюцца старыя. Развіваецца і расце эканоміка, нягледзячы на апакаліптычныя прагнозы пятнаццаці апошніх гадоў. Расце доля прыватнага бізнэсу. Ды і грамадства сёння не тое, што было нават год таму. Возьмем нават такую дробязь: калі я год таму ў сваім асабістым блогу выказаўся супраць атаясамлення паняццяў «Беларусь» і «Лукашэнка» і асабліва супраць эканамічных санкцыяў, накіраваных супраць прыватнага бізнэсу, мяне ўсе дружна «асуджа-ам». Госпадзе, хто толькі ні адзначыўся! Сёння ж з вядомых людзей за санкцыі засталіся толькі некалькі радыкалаў, якія як правіла, жывуць за межамі Беларусі. Астатнія разабраліся. Хоць для гэтага спатрэбіўся цэлы год. Так што прагрэс ёсць нават на ўзроўні асобных праблем, якія стаяць перад грамадствам. Далей. СМІ ва ўсіх краінах адыгрываюць вялікую ролю, прычым няважна, дэмакратычная краіна ці таталітарная. Зразумела, я за дэмакратычную Беларусь — што за дзіўнае пытанне!

Иван Денисович напiсаў(ла) 15 мая 2013 у 14:18

На вашую думку, у Беларусі дыктатура або дэмакратыя? Асабіста вы прыхільнік дэмакратыі ці дыктатуры?

Юрый Зісер: У Беларусі ні дыктатуры, ні дэмакратыі. У нас аўтарытарызм.

Ігар напiсаў(ла) 15 мая 2013 у 14:37

Спадар Зісер! Якая краіна ў свеце вам падабаецца найбольш і чаму?

Юрый Зісер: Ніколі пра гэта не думаў. Не маю адказу на гэтае пытанне. Баюся, яго і не можа быць. Кожная краіна ўнікальная.

Прыхільнікам якіх ідэй Вы з’яўляецеся (правых/левых/сацыялізм/кансерватызм і г.д. і да т.п.)?

Юрый Зісер: У профілі facebook у мяне напісана «капіталіст». Я сапраўды веру, што Беларусь выратуе капіталізм.

Ці ёсць у вас куміры? Калі ёсць, то хто гэта і чаму?

Юрый Зісер: Пасля студэнцкага ўзросту ніколі не было. Заўсёды стараўся глядзець на людзей цвяроза. Перыядычна зачароўваюся людзьмі, але не магу назваць іх кумірамі. А так люблю многіх — таго ж Сашу Кулінковіча, якога цяпер так званая «дэмакратычная грамадскасць» (насамрэч гэта частка грамадства, якая загнала сябе ў гета ўнутранай эміграцыі) асуджае за тое, што ён насмеліўся весці калонку ў «СБ».

Якіх законаў, на вашую думку, не хапае нашай краіне ў галіне інфармацыі, а якія непатрэбныя і/ці шкодныя?

Юрый Зісер: Законаў у нас хапае. Многія законы ўтрымліваюць нормы, якія можна лічыць абсурднымі і шкоднымі. Аднак наша галоўная праблема не ў законах, а ў іх выкананні, у трактоўцы.

Радіп напiсаў(ла) 15 мая 2013 у 14:41

Раскажыце пра вашу асабістую сустрэчу з Лукашэнкам. Ці гэта чуткі? Жыве Беларусь!

Юрый Зісер: Такога не было. Вакол любога публічнага чалавека пастаянна ходзяць такія недарэчныя чуткі, што я ўжо перастаў здзіўляцца. То я прадаў бізнэс і пераехаў у Маскву, то ў ЗША. То я ў дэпутаты пайшоў, то, як вось цяпер высветлілася, з прэзідэнтам сустракаўся. То кірую холдынгам дзяржСМІ, то агент КДБ, то агент Масада, то асабіста мадэрую форумы, то санкцыяную з’яўленне на партале негатыву на чыноўніка або кампанію. То закрываю цэлыя напрамкі бізнэсу і пераследую супрацоўнікаў з нетрадыцыйнай сэксуальнай арыентацыяй. Усё гэта я не выдумаў. Пералічаныя рэальныя чуткі, якія дайшлі да мяне рознымі шляхамі.

ЯНКА напiсаў(ла) 15 мая 2013 у 14:44

Спадар Зісер, пэўныя мас-мэдыі хварэюць на комплекс антысемітызму і баняць нават каменты, дзе прысутнічае слова «жыд». А вы не супраць наяўнасці гэтага спрадвечна беларускага слова, у прыватнасці на Тутбаі, замест варварызму «яўрэй»?

Юрый Зісер: Я супраць і пра гэта падрабязна выказваўся.

Марыя напiсаў(ла) 15 мая 2013 у 14:54

Шмат розгаласу выклікала інфармацыя пра мінулае былога карэспандэнта Тут.бай Уладзіміра Чудзянцова. Вы яго абаранялі ад шматлікіх нападак і крытыкі. Але днямі ў ягоным Фэйсбуку я прачытала, як ён негатыўна адгукаецца пра Тут.бай, пра вашыя стажыроўкі за мяжой, пра тое, што партал праз рэкламу замоўчвае памылку дактароў «Экамедсэрвіса». Пазней у інтэрнэце з’явілася яго перапіска з палітуцекачом, дзе Чудзянцоў называе чытачоў Тут.бай быдлам, хамячкамі і г.д. Скажыце, калі ласка, ці шкадуеце вы пра тое, што звольнілі такога журналіста? Ці сталі б вы пасля такога абараняць яго цяпер? Дзякуй вялікі.

Юрый Зісер: З Чудзянцовым было шкада расставацца з прычыны яго прафесійных якасцяў. Але ён сам выбраў свой шлях, парушыўшы сваё абяцанне ўжо праз дзве гадзіны пасля таго, як яго даў, выдатна ведаючы, што яно было апошнім. А што я заступаўся за яго да гэтага — не шкадую: гэта было шчыра. Што ж, ні адна добрая справа не застаецца беспакаранай.

Віталіна К. напiсаў(ла) 15 мая 2013 у 14:57

У адным з інтэрв’ю бачыла, што вы чытаеце толькі «Белгазету» і «Турызм і адпачынак». Але ваш партал пра турызм, напрыклад, зусім мала піша. Чаму?

Юрый Зісер: Чытаю яшчэ трэцюю газету — «Беларусы і рынак». А пра турызм мы пішам пастаянна, толькі не пра галіны (для гэтага існуюць спецыялізаваныя выданні), а пра самі падарожжы. Амаль кожны дзень, асабліва летам, на партале з’яўляецца чытацкі фотарэпартаж з чарговай краіны.

Валькірыя напiсаў(ла) 15 мая 2013 у 15:01

Ці ёсць у вас аўтарытэты ў прафесійнай сферы? Што б вы змянілі на інфармацыйным полі Беларусі?

Юрый Зісер: Так, ёсць. У першую чаргу гэта цяперашні дырэктар TUT.BY Аляксандр Чакан, які сапраўдны прафесіянал ва ўсім, да чаго дакранаецца. А нашае інфармацыйнае поле мае вялікую патрэбу ў рэкламных грашах. Галоўная праблема многіх нашых СМІ — і прыватных, і дзяржаўных — адсутнасць грошай на развіццё: на годную аплату працы журналістаў, іх навучанне, стварэнне ўмоваў працы, распрацоўку і прасоўванне годных сайтаў і г.д. Толькі не трэба ўсё валіць на ідэалогію: няўжо ў нас квітнеюць спартовыя выданні ці гарадскія часопісы? Ды не, усе зводзяць канцы з канцамі. Галоўная праблема нашых медыяў — эканамічная.

Скептык напiсаў(ла) 15 мая 2013 у 16:01

Вас бачылі на канферэнцыі разам з начальнікам ААЦ Лукашэнкі, як вы разам стаялі і ўсміхаліся, нешта абмяркоўвалі з тым, хто адсочвае інфармацыю за «неблаганадзейнымi апазіцыянерамі».

Юрый Зісер: Так, на гэтым фота мы адначасова з Рабаволавым вывучаем змесціва кантэйнераў з ежай падчас урачыстага фуршэту ў АБСЕ.

Пытанне: Цi праўда тое, што вы даяце інфармацыю (паролi i г.д.) ААЦ паштовых скрыняў tut.by?

Юрый Зісер: Праўда. Згодна з заканадаўствам Рэспублікі Беларусь, якое рэгламентуе дзейнасць праваахоўных органаў і суда па зборы і праверцы доказаў, любая арганізацыя, уключаючы нас, інтэрнэт-правайдараў і г.д., абавязаная, пры выкананні гэтымі органамі працэдуры патрабавання інфармацыі, падаваць яе па канкрэтных асобах (і ніяк інакш). Напэўна, вы ў навінах нядаўна чыталі статыстыку запытаў праваахоўных органаў розных краін, уключаючы Беларусь, што да змесціва перапіскі Skype, Google і інш. Дык вось нам такіх запытаў прыходзіць прыкладна столькі ж, колькі паказана ў гэтым артыкуле — і гэта на два з лішнім мільёны рэгістрацый. Так што казаць пра татальнае сачэнне за грамадзянамі праз TUT.BY не даводзіцца. Трэба таксама разумець, што аналагічны закон дзейнічае ва ўсіх краінах свету, уключаючы ЗША і краіны ЕС, мы тут далёка не наперадзе планеты ўсёй.

Гопник напiсаў(ла) 15 мая 2013 у 16:26

Аператыўна-аналітычны аддзел пры прэзідэнце РБ перадаў вам (hoster.by — УП «Надзейныя праграмы») паўнамоцтвы па адміністраванні даменнай зоны BY. Як так атрымалася? Ці праводзіўся дзяржконкурс/тэндар сярод удзельнікаў ІТД? Калі так, то дзе было апублікаванае запрашэнне і хто ўзяў удзел? Калі не, то на якой падставе?

Юрый Зісер: Адміністратарам даменнай зоны BY быў і ёсць ААЦ. Мы толькі тэхнічныя адміністратары, гэта значыць, займаемся тэхнічнай падтрымкай сайта www.cctld.by і дапаможных сэрвісаў да яго. Абавязкі тэхнічнага адміністратара апісаныя ў раздзеле 8 дакумента. Тамсама знаходзіцца інструкцыя аб парадку правядзення конкурсу. Каб стаць тэхнічнымі адміністратарамі, у 2010 годзе мы ўдзельнічалі ў абвешчаным конкурсе, які выйгралі, прапанаваўшы самую нізкую аптовую цану на дамен. Астатнія ўдзельнікі конкурсу («Адкрыты кантакт», «Экстмедыя», «Актыўныя тэхналогіі») прапанавалі нашмат вышэйшыя цэны.

П. С. Калі што не спадабаецца, Зісер&Со могуць забраць у НН даменнае імя NN.BY. Парадаксальная сітуацыя: адна прыватная медыя-арганізацыя можа блакаваць працу іншай)))

Юрый Зісер: Не, не можа, згодна з згаданай вышэй інструкцыяй.

Доктар напiсаў(ла) 15 мая 2013 у 16:52

Спадар Зісер! Як вы думаеце, ці ёсць у Беларусі сярод 9,5 млн насельніцтва хоць бы адзін, хто змог бы быць новым прэзідэнтам замест старога?

Юрый Зісер: Думаю, ёсць, хаця і не ведаю, хто б гэта мог быць.

Ці ёсць у РБ карупцыя?

Юрый Зісер: Ёсць. Проста яна не на побытавым узроўні, яе не так лёгка ўбачыць. У той жа час лічыць яе сур’ёзнай праблемай Беларусі можа толькі чалавек, які ніколі не бываў у Азіі.

Адкуль пачынае гніць рыба — ад хваста ці ад галавы?

Юрый Зісер: Гніенне — генералізаваны працэс, у якім, на жаль, усе добрыя.

голас з цемры напiсаў(ла) 15 мая 2013 у 17:34

Ці лічыце вы сябе беларусам? І ці правільна лічыць беларусам кожнага, хто жыве на тэрыторыі Беларусі і мае беларускае грамадзянства?

Юрый Зісер: Трэба адрозніваць паняцці этнасу і нацыі. З этнічнага пункту гледжання беларус — той, хто лічыць сябе беларусам. Гэта называецца самаідэнтыфікацыя. Усе астатнія прыкметы (грамадзянства, тэрыторыя, мова, гісторыя, культура, выгляд), як паказалі навуковыя даследаванні апошніх дзесяцігоддзяў, другасныя. А вось калі мы гаворым пра нацыі, то грамадзяне Беларусі — толькі ўладальнікі сіняскурых пашпарцін.

Spadar напiсаў(ла) 15 мая 2013 у 18:04

Не ведаю нават, як да вас звяртацца спадар ці проста «товарищ» Ю.Зісер, бо відавочна што вам больш даспадобы «господин».

З 1994 года беларусаў падзялілі на нашых і не (ворагаў, як у часы Сталіна). Адсюль пытанні:

1) Якая назва вам больш падабаецца — гістарычная «Менск» ці расійская «Минск»?

2) Чаму пры нашай «супердэмакратыі» адным СМІ дазволена ўсё (нават забойства, як было з Паляковай), і ім за гэта «медалькі» і дзяржаўная дапамога, а іншым — ператрусы, канфіскацыі, арышты і г.д. (у выпадку з Н. Радзінай, Хартыяй 97, Архэ і г.д.)? Ці ёсць межы крывадушша?

3) З пэўных прычынаў я адмовіўся ад скрыні на tut.by. Гэта мой уласны выбар і жаданне, я чалавек вольны. Таму гляджу Белсат, Еўраньюс і гэтак далей. Чаму беларусаў пазбаўляюць права выбару на выбарах і ў інфармацыйнай прасторы, чаму за нас вырашаюць, што нам дазволена, а што не? У мяне ўласны дом, і ніякія ЖЭСы мне не могуць перашкодзіць мець спадарожнікавыя талеркі, а вось жыхарам шматпавярховікаў гэта цяжэй праз «выгляд» дома. Дзякуй!

Юрый Зісер: На жаль, усе гэтыя пытанні не да мяне. Ды і не пытанні гэта.

Andrei напiсаў(ла) 15 мая 2013 у 18:34

Добры дзень, Юрый! На вашую думку, як ідуць справы з палітычнай сітуацыяй у нашай краіне? Чаму апазіцыя па-ранейшаму ніяк не можа дамагчыся хоць бы прыстойных вынікаў на выбарах? Загадзя дзякуй!

Юрый Зісер: Нельга дамагчыся вынікаў у тым, чаго няма. Тыя, хто хоча і прывык дамагацца вынікаў, у Беларусі не ідуць у палітыку, а, напрыклад, займаюцца бізнэсам.

adva-belarus напiсаў(ла) 15 мая 2013 у 18:38

Добры дзень, спадар Юрый! Па-першае, дзякуй за вашу працу — на вашым партале інфармацыя падаецца даволі аб’ектыўна і без ідэалагічных перакосаў. Пытанні:

Чаму на Тут.бай не было ніводнай згадкі пра фільм «Жыве Беларусь» — першую міжнародную мастацкую стужку на беларускай мове і пра Беларусь?

Юрый Зісер: Была інфармацыя са спасылкай.

З нядаўняга часу на Тутбай з’явіліся новыя праграмы, такія як тутэйшы футбол — праграма вядзецца на беларускай мове, прычым гэта было вырашана шляхам адкрытага галасавання. Значыць, вашым карыстальнікам хочацца, каб на партале больш выкарыстоўвалася мова. Гэта больш не пытанне, а прапанова ці нават просьба — зрабіце праграмы, напрыклад, як, баяны тыдня, дзе на экране двухмоўныя вядоўцы: адзін размаўляе на расійскай, другі — на беларускай.

Юрый Зісер: У нас ёсць публікацыі і праграмы на беларускай мове. Дарэчы, і ў рэдакцыі ў нас ёсць супрацоўнікі, якія гавораць толькі па-беларуску. Але, на жаль, матэрыялы на беларускай мове чытае і глядзіць у разы менш карыстальнікаў, чым на расійскай, і мы не можам ушчамляць рускамоўных карыстальнікаў.

Валерия напiсаў(ла) 15 мая 2013 у 18:47

Паважаны Юрый Зісер! Калі вы пагадзіліся на такое інтэрв’ю для наведнікаў сайта «Нашай Нівы» — ужо за гэта вам вялікая павага! Што да Наталлі Радзінай, то яна мужная жанчына і нядрэнная журналістка. Але як кіраўнік сайта Хартыя’97 непрафесійная абсалютна. Сайт, закліканы аб’яднаць вакол сябе праціўнікаў рэжыму, не толькі не справіўся з гэтай задачай, але і дэградаваў цалкам. Калі раней у яго верылі пастаянныя каментатары — спрачаліся прапаноўвалі свае ідэі,-то цяпер цалкам у камандзе сайта расчараваліся. Ні адна з прапановаў каментатараў, паўтару — ні адна! — не была рэалізаваная. Вельмі жорсткая цэнзура для патрыётаў з размытымі крытэрамі — нельга крытыкаваць дзеянні «Еўрапейскай Беларусі» і расхвальваць дзеянні іншых апазіцыйных структур. І ў той жа час засілле хамства і пропуск відавочна правакацыйных і абражальных каментароў. Каму цяпер падпарадкоўваецца Хартыя — і пад чыім кантролем знаходзіцца? Невядома. І разам з тым поўная адсутнасць зваротнай сувязі з мадэратарамі — і гэта на самым нібыта «дэмакратычным» сайце! Апошнім часам на Хартыі было два артыкулы, адзін прысвечаная вам і яшчэ адзін — пра сітуацыю вакол Чудзянцова. І што цікава — пры абмеркаванні прапускаліся УСЕ каментары! Несумненна, што тут пускаюць пыл у вочы асабіста вам і работнікам і прыхільнікам партала TYT.BY. Стаўлюся да вас з вялікай павагай — таму што чытала ваш форум і дзівілася, наколькі там больш свабоды ў параўнанні з Хартыяй. У мяне асабіста шмат ідэй, якія можна было б ажыццявіць і на вашым партале. Ідэй не толькі палітычных, але і творчых. Ці можна да вас звярнуцца з прапановамі? І як з вамі — у выпадку, калі вы зацікаўленыя, — звязацца?

Юрый Зісер: Дзякуй за добрыя словы ў дачыненні да мяне і TUT.BY! Пішыце свае прапановы на [email protected] — гэты адрас пазначаны ўнізе кожнай старонкі партала. Заўсёды радыя і ўдзячныя.

Илья напiсаў(ла) 15 мая 2013 у 20:07

Каго б вы хацелі бачыць прэзідэнтам, калі (гіпатэтычна) Лукашэнка не пойдзе на пяты тэрмін?

Юрый Зісер: Не ведаю пакуль такога чалавека.

Міхась Бабровіч напiсаў(ла) 15 мая 2013 у 20:51

Прывітанне, спадар Зісер! Дзякуй вам, што вы ёсць. Вы добры чалавек, такая мая думка. І я ведаю, што ў жыцці вам вельмі цяжка, але вы мужны і дай вам Бог здароўя! Ці глядзелі вы фільм «Жыве Беларусь»? На маю думку, гэта правакацыя супраць беларускай дэмакратычнай грамады. Ён толькі павялічвае колькасць зла ў свеце і нічога не дае ўзамен. Не дае надзеі. Што вы думаеце пра гэта?

Юрый Зісер: Я ніколі не глядзеў савецкія прапагандысцкія агіткі і не збіраюся глядзець антысавецкія: гэта, як казаў Даўлатаў, адно і тое ж.

Які фільм на вашую думку, варта было б зрабіць пра сучасную Беларусь?

Юрый Зісер: У мастацтве важна не «пра што», а «як». Бяздарная прадукцыя не знойдзе свайго спажыўца, якой бы актуальнай тэма ні была і колькі грошай у яе ні закапай. А калі з’явіцца таленавітая праца — яе заўважаць і паглядзяць (прачытаюць, праслухаюць) незалежна ад тэмы, крыніцы і памеру інвестыцый.

Арт напiсаў(ла) 15 мая 2013 у 21:00

Паважаны Юрый Зісер! Чаму ваш партал надае так мала ўвагі навінам культуры? І не толькі навінам, але праектам у гэтай сферы. Зразумела, што гэта патрабуе большых намаганняў, чым агучыць палітычную, эканамічную або крымінальную навіну. Але ў вас жа вялікія рэсурсы, а спецыялістаў у Беларусі хапае. Вы ж актыўна займаецеся, напрыклад, анонсамі дабрачынных акцый. Прывіваць любоў да культуры — не менш высакародна. Але няма рэцэнзій, няма віртуальных тэматычных выставаў (часам ёсць фота), мала дыскусій і толькі ў медыяфармаце. Чаму так? І ці ёсць нейкія планы, задумкі ў гэтай галіне? Дзякуй.

Юрый Зісер: Гэта не так. Хіба вы не бачылі перадач з Кацяй Пытлевай? Або «Кругі на вадзе»? «Артэфакт»? А праграму «Джаз-пік», якую ўжо шмат гадоў вядзе былы галоўны рэдактар ўсесаюзнага часопіса «Джаз» Яўген Даўгіх? Як чалавек, які захапляецца джазам і нават чытаў лекцыі па джазе, магу сцвярджаць, што Яўген — самы буйны эксперт па джазе ў краіне, а яго праграмы сапраўды вельмі добрыя на любым узроўні. Аднак іх глядзіць менш за тысячу чалавек. А праграмы пра беларускую музыку глядзіць яшчэ менш! Мы ж бачым статыстыку і дакладна можам палічыць колькасць адкрыццяў анонсу, колькасць адкрыццяў відэаматэрыялу і працягласць прагляду. Так што ў пэўным сэнсе навін культуры ў нас на парадак больш, чым патрабуецца наведнікам. На жаль, калі «сацыялку» у нас чытае па 100 тысяч і больш наведнікаў, то культуру — літаральна 500–1500 чалавек. Дарэчы, рэцэнзіі ў нас ёсць, толькі яны не на тытульнай старонцы, а ў раздзеле «Афіша». Акрамя віртуальнай у нас прадстаўленая і рэальная культура ў выглядзе пастаянна дзейнай Галерэі TUT.BY, якая знаходзіцца ў нас у офісе і адкрытая для любога з вуліцы. Там кожны месяц змяняецца экспазіцыя. Развіваць і падтрымліваць культуру будзем і далей.

Vołat напiсаў(ла) 15 мая 2013 у 21:24

Ці ведаеце вы, што такое ідэалогія «заходнерусізму»? Ці падзяляеце яе погляды? Ці патрэбна ўвогуле Беларусі афіцыйная ідэалогія? Напрыклад, палкоўнік Уладзімір Барадач лічыць, што Беларусі патрэбная нейкая новая ідэалогія. Ці падзяляеце вы такую думку? Як, па-вашаму, магла б выглядаць ідэалогія «белацэнтрызму», прапанаваная палкоўнікам Барадачом?

Юрый Зісер: Я адкрыў спасылку і прачытаў, але, прызнацца, з тэксту не вельмі зразумеў, што такое «белацэнтрызм» і «заходнерусізм». Калі гаворка пра тое, што нельга пабудаваць будучыню на архаіцы і трэба зыходзіць з сённяшніх рэалій, то цалкам згодны з гэтым. Толькі мне не падабаецца слова «ідэалогія». Як я ўжо казаў, ідэалогію нельга прыдумаць і навязаць, яна можа толькі самастойна скласціся, выспець у соцыуме.

Зьміцер напiсаў(ла) 15 мая 2013 у 21:34

Вітаю. Якое вашае асабістае стаўленне да мовы і ці плануеце (пры станоўчым адказе) папулярызаваць мову?

Юрый Зісер: Маё асабістае стаўленне? Выключна станоўчае. Адзінае: я ўпэўнены, што мову нельга навязваць. А папулярызацыяй мовы наш партал займаецца пастаянна. Проста калі людзі дрэнна чытаюць навіны на беларускай мове, навошта прымушаць іх чытаць больш? Хіба яны пачнуць ад гэтага больш гаварыць па-беларуску ці больш любіць мову? Патрэбныя іншыя метады. Да прыкладу, сёлета на дзень роднай мовы мы размясцілі на партале плэер, напэўна, з найлепшымі за апошнія 20 гадоў песнямі на беларускай мове. Нам людзі потым пісалі, што гэта іх зарадзіла на ўвесь дзень. Я і сам слухаў амаль цэлы дзень.

Цікаўны напiсаў(ла) 15 мая 2013 у 22:45

Ці падтрымліваеце вы размяшчэнне расійскай авіябазы ў Беларусі?

Юрый Зісер: Я не ведаю, чым кіравалася нашая дзяржава, таму не магу кампетэнтна меркаваць пра гэта. Тэарэтычна, адрываючыся ад рэалій, гэта крок убок ад палітыкі нейтралітэту і балансавання невялікай дзяржавы паміж больш буйнымі ўтварэннямі. Але даводзіцца ўлічваць, што Беларусь ніколі ў сваёй гісторыі не была незалежнай у ваенным плане дзяржавай, таму ўсё заканамерна.

нехта невядомы напiсаў(ла) 15 мая 2013 у 22:52

Апошнім часам назіраю шмат артыкулаў пра такіх, як я, так бы мовіць, асобаў нетрадыцыйнай сэксуальнай арыентацыі. Я не актывіст, але ўбачыў шмат негатыву і нянавісці ў каментарах. Наогул ніхто нават не здагадаецца, што я такі. Я ўсё гэта ўдала хаваю. Калі ласка, пакіньце нас у спакоі. Я бачу, што мяне тут не прымуць пры маім жыцці. Грамадства нас не ўспрымае, і мы проста робімся нейкім козырам для ўлады. Гэта мярзотна. Мне здаецца, што гэтая тэма проста эксплуатуецца. Нейкія асобы ад ЛГБТ. Навошта? Прэзідэнт — гамафоб. Вы робіце немагчымым маё існаванне.

Юрый Зісер: Не зразумеў, якім чынам вам перашкаджае грамадская дыскусія пра ЛГБТ, якая разгарнулася ва ўсім свеце (а не толькі ў нас), тым больш калі пра вашую арыентацыю не ведаюць навакольныя. Наадварот, пра праблему трэба казаць, каб ЛГБТ перасталі лічыць псіхічным захворваннем і пачалі ставіцца як да індывідуальнай асаблівасці асобы, як да росту або колеру вачэй. СААЗ ужо разабралася і даўно выключыла гомасэксуальнасць са спісу хвароб па МСКБ. Аднак зойме яшчэ некалькі гадоў ці дзесяцігоддзяў выветрыванне з масавай свядомасці стаўлення да ЛГБТ як да захворвання. А ненавідзяць ЛГБТ не толькі ў нас, але і ва ўсім свеце.

JJ напiсаў(ла) 15 мая 2013 у 22:56

Чаму вы не лічыце «бульбаш» абразаю, а «жыда» — лічыце? У каго ёсць права вызначаць, што лічыць «іроніяй» а што «знявагаю»? У таго, хто кажа, ці ў таго, пра каго гаворка?

Юрый Зісер: Ужо адказаў вышэй. Лічу і «бульбаша» крыўдным словам і ніколі яго не гавару. Акрамя лінгвістычнага гэта пытанне этычнае: калі вы ведаеце, што мне непрыемна, калі кагосьці называюць жыдом, але ўпарта працягваеце выкарыстоўваць гэтае слова пры мне — гэта сведчыць пра вашую этыку.

Антон напiсаў(ла) 15 мая 2013 у 23:32

Ці магчыма зрабіць так, каб разам з каментаром на форуме Тут.бай адлюстроўваўся IP каментатара (напрыклад, як на pravda.com.ua)? Вельмі ўжо часта сутыкаюся з тым, што вучыць розуму жыхароў Беларусі бяруцца з замежнага далёка (маскіруючыся пад рэзідэнтаў РБ), або адзін і той жа троль пад рознымі імёнамі ўдзельнічае ў дыскусіі. Ці магчымае якое-небудзь іншае рашэнне ў тым сэнсе, каб зрабіць некаторыя дадзеныя пра каментатара верыфікаванымі?

Юрый Зісер: Ідэя пазначаць карыстальнікаў сцягамі краін бессэнсоўная: бо многія заходзяць праз проксі-серверы. Акрамя таго, шмат нашых выходзіць у эфір то з-за мяжы, то з Беларусі, што канчаткова заблытае справу. Мы рухаемся ў гэтым кірунку, але не шляхам візуалізацыі IP-адрасоў. Будзем стымуляваць карыстальнікаў выступаць на форумах пад рэальнымі імёнамі.

Беларус напiсаў(ла) 15 мая 2013 у 23:41

Вашае стаўленне да будаўніцтва «бульбашхола» каля Курапат?

Юрый Зісер: Не магу адказаць, бо не адсачыў канец гісторыі. Але калі ў выніку будаўніцтва рэстарана пахаванне сапраўды, як абяцалі, прывядуць у парадак, пабудуюць мемарыял і спыняць акты вандалізму, горш ад гэтага не будзе.

Начны дазор напiсаў(ла) 16 мая 2013 у 0:17

Спадар Зісер, як вы лічыце, якая будучыня ў папяровых мас-медыяў Беларусі і ў прыватнасці дзяржаўных СМІ? Ці выратуе іх аб"яднанне ў холдынг альбо ім таксама трэба пераходзіць на інтэрнэт-версіі?

Юрый Зісер: Не варта звязваць прыход інтэрнэту, планшэтаў і электронных кніг са «смерцю СМІ». Што да дзяржаўных СМІ, то ім гэтак жа цяжка, як і прыватным, Яны сутыкаюцца ўсё з той жа адсутнасцю рэкламных грошай, пра што я казаў вышэй. Аб’яднанне ў холдынг і пераход на інтэрнэт ніяк не звязаныя паміж сабой, холдынг — толькі магчымасць эканоміі на маштабах.

Аляксей Ф. напiсаў(ла) 16 мая 2013 у 1:55

Якое вашае стаўленне да бел-чырвона-белага сцяга і герба «Пагоня»?

Юрый Зісер: Станоўчае. Толькі як чалавек, які мае дачыненне да маркетынгу і брэндынгу, я лічу, што ў будучыні Беларусь мае патрэбу ў новым сцягу і ў новым гербе, якія адрозніваюцца ад герба суседняй дзяржавы. Ну дзе вы бачылі дзве дзяржавы з аднолькавымі гербамі? Ці хтосьці ўсур’ёз думае, што можна адгаварыць Літву ад выкарыстання «Пагоні»? А мая аргументацыя па сцягу тая ж, па якой новы сцяг увялі ў Грузіі. Вось вы з дзяцінства сцяг якой замежнай дзяржавы запомнілі першым? Правільна, японскі, як і ўсе цікаўныя падлеткі, таму што ён ні да якага іншага не падобны. А цяпер паглядзіце на наш гістарычны сцяг, а потым зірніце на польскі і латвійскі. Ну які замежнік адрозніць гэтыя тры сцягі і запомніць, які ёсць які! Гэта значыць, наш гістарычны сцяг слаба выконвае сваю галоўную функцыю — ідэнтыфікацыйную, бо нераспазнавальна падобны да сцягоў суседзяў. Наш дзяржаўны сцяг, дарэчы, запамінаецца значна лепш дзякуючы ўнікальнаму нацыянальнаму ўзору каля тронка (а не спалучэнню чырвонага з зялёным, якога ў свеце гаць гаці пачынаючы з Партугаліі). Гэта вялікая будучая праца, толькі не для гісторыкаў, а для маркетолагаў і дызайнераў. Я падыходжу да пытання не з хваравіта-гістарычнага пункту гледжання, а з функцыянальнага і разумею, што мой падыход выклікае крытыку. Больш за тое, я і з нагоды назвы нашай краіны выказаўся нетрадыцыйна.

Як вы ставіцеся да асобы і легенды Канстанціна (Кастуся) Каліноўскага?

Юрый Зісер: Мне цяжка меркаваць, я не гісторык і вельмі мала ведаю пра гэтую тэму.

За якую сімволіку вы галасавалі на так званым «рэферэндуме» ў 1995 годзе?

Юрый Зісер: За гістарычную.

За каго вы галасавалі ў 1994 годзе?

Юрый Зісер: У першым туры за Шушкевіча, у другім не ўдзельнічаў.

Тутэйшы напiсаў(ла) 16 мая 2013 у 2:02

Як вы думаеце, ці павінныя ўсе хлопцы служыць у войску? Ці павіннае ў Беларусі быць прафесійнае войска? Якое войска было б лепшае для рэжыму Лукашэнкі?

Юрый Зісер: Я за прафесійнае войска. Сёння нікому не патрэбнае гарматнае мяса. Персанал павінен быць кваліфікаваным, валодаць сучаснай зброяй і тактыкай, а для гэтага трэба мець мазгі, нельга прыцягваць усіх запар.

Франак напiсаў(ла) 16 мая 2013 у 2:05

Ці ахвяравалі Вы калі-небудзь грошы для Таварыства беларускай мовы?

Юрый Зісер: Не.

Нина напiсаў(ла) 16 мая 2013 у 6:49

Два пытанні:

Вашае стаўленне да таго, што ў Беларусі ёсць палітвязні.

Юрый Зісер: Адмоўнае.

Ці маеце вы пазашлюбных дзяцей?

Юрый Зісер: Не маю не толькі пазашлюбных дзяцей, але нават пазашлюбных сувязяў.

Міхась, Менск. напiсаў(ла) 16 мая 2013 у 9:09

Спадар Зісер, колькі каштуе сумленне ў вашым выпадку?

Юрый Зісер: Не ведаю, збоку лепш відаць. Калі я зраблю нешта несумленнае і прыбытак ад гэтага можна будзе ацаніць у грашовых знаках, тады і палічым.

Pupz напiсаў(ла) 16 мая 2013 у 9:43

Юрый Анатольевіч, вы як шматгранная таленавітая асоба маеце магчымасць жыць і весці бізнэс у любой краіне свету. Але вы застаяцеся на Беларусі (што вельмі прыемна). Чаму?

Юрый Зісер: Тут галоўная справа майго жыцця — партал TUT.BY, з дапамогай якога я магу зрабіць свет крыху лепшым.

Якія краіны (месцы) вам падабаюцца для адпачынку? Дзе яшчэ не былі, але хацелі б пабываць?

Юрый Зісер: Быў у 48 краінах. Карта маіх падарожжаў ёсць у TripAdvisor і даступная праз facebook. Усюды добра, і ў любой краіне ёсць дзе адпачыць. Для адпачынку больш за ўсё падабаюцца Турцыя і Тайланд, таму што для мяне адпачынак — гэта перш за ўсё мора. Хацеў бы адпачыць у В’етнаме.

Юрась Беларус напiсаў(ла) 16 мая 2013 у 10:07

Спадар Зісер, што азначае вашае прозвішча? Ад якога слова (слоў) яно пайшло?

Юрый Зісер: «Зісер» — ад нямецкага слова Suss («зюс») — «салодкі». Я — салодкі, як дзіцячы савецкі пісьменнік. Ці, калі па Фейхтвангеру — габрэй Зюс. У канцы XVII — пачатку XVIII ст. у Аўстра-Венгрыі, Германіі і Польшчы прайшла дзяржаўная кампанія па прысваенні габрэям прозвішчаў (да гэтага прозвішчаў не было). Існуюць звесткі (або легенды — каму як падабаецца), што аўтарам прозвішчаў, прысвоеных у Польшчы, быў пісьменнік-рамантык Эрнст Гофман (аўтар «Дон Жуана», «Шчаўкунка» і іншых вядомых твораў), а ў Германіі — паэт Генрых Гайнэ, які служыў тады міністрам і ўласнаручна прыдумляў габрэям прозвішчы. Маё прозвішча нямецкае і хутчэй за ўсё прысвоенае менавіта ў Германіі (таму што ў Аўстра-Венгрыі прозвішчы збольшага былі складовыя). Значыць, мае продкі ў сярэднявеччы жылі ў Германіі. Хоць усе мае прадзеды i прабабулі родам з Усходняй Украіны.

Tejko напiсаў(ла) 16 мая 2013 у 10:58

Добры дзень, Юрый! Скажыце калі ласка, ці лічыце вы, што СМІ ў любой краіне павінныя быць толькі апазіцыйнымі, бо СМІ існуюць як люстэрка для ўлады, каб улада заўсёды змагла паглядзець на свае недахопы? Бо ў нашых рэаліях неяк склалася так, што існуе два лагеры СМІ, дзяржаўныя і прыватныя, паміж якімі, можна сказаць, вайна, якая прымусіла ўсіх перайсці не на асвятленне навін, а на нейкую прапаганду.

Юрый Зісер: Існуе два асноўныя тыпы журналістыкі: журналістыка факту і журналістыка меркавання. Мы стараемся прытрымлівацца першай. Многія сур’ёзныя спецыялісты ў сферы журналістыкі лічаць, што толькі гэта і ёсць журналістыка, а ўсё астатняе — прапаганда. Думаю, што TUT.BY таму і набыў папулярнасць, што прытрымліваецца журналістыкі факту. Нават у тых выпадках, калі канкрэтныя факты не падабаюцца журналісту, галоўнаму рэдактару ці мне, яны з’яўляюцца на партале.

полина напiсаў(ла) 16 мая 2013 у 11:58

Паважаны Юрый Зісер, як вы лічыце, ці мае выбарчая сістэма патрэбу ў рэформе? Як, на вашую думку, павінен праводзіцца падлік галасоў? Як чалавек, прафесіяй якога з’яўляюцца інфармацыйныя тэхналогіі, ці бачыце вы магчымасці ўкаранення сістэмы электроннага галасавання ў Беларусі?

Юрый Зісер: Прызнаюся, я не вельмі валодаю пытаннем. Думаю, што выбарчае права цалкам можна ўдасканаліць, напрыклад, увёўшы галасаванне па партыйных спісах, як гэта прынята ва ўсім свеце. Электроннае галасаванне ўкараніць тым больш магчыма, і я спадзяюся, што ў рамках Дзяржаўнай праграмы па ўкараненні электроннага ўрада гэта калі-небудзь будзе зроблена, тады галасаванне стане больш празрыстым.

Антон напiсаў(ла) 16 мая 2013 у 12:41

Калі б бізнэсмэн з Англіі альбо Францыі, які займаецца бізнэсам у ІТ-сферы, папрасіў у вас парады, ці варта яму пераносіць свой бізнэс у Беларусь, што б вы яму параілі?

Юрый Зісер: Так, так і яшчэ раз так. У нас выдатныя ўмовы для распрацоўкі ПА, працуе Парк высокіх тэхналогій, ёсць кваліфікаваныя кадры і з’явіліся менеджары, здольныя ўзначаліць аперацыйную працу.

Семён напiсаў(ла) 16 мая 2013 у 13:25

Сёння партал TUT.BY апублікаваў навіну аб тым, што ў Пружанах на месцы пліты «Невядомы салдат» пахавалі жонку «заслужанага гараджаніна», да гэтага пад гэтымі ж Пружанамі былі знесеныя казармы з цэглы Брэсцкай крэпасці. Дзякуй вашаму парталу, што падымаеце тэмы, журботныя для ветэранаў. Як вы лічыце, другая сусветная будзе таксама забытая пасля смерці апошняга ветэрана, як былі забытыя першая сусветная, расійска-французская вайна 1812 і іншыя?

Юрый Зісер: Сямён, баюся, што так. Чалавек не можа жыць толькі вайной. Людзі хочуць працаваць, кахаць, забаўляцца і г.д. Урэшце, сёння мы сутыкаемся з адчужэннем і нават з такой пачварнай з’явай, як публічнае асуджэнне тых, хто павіншаваў адно аднаго з Днём перамогі! Лепш бы прамаўчалі. Ад таго, што нехта выкарыстоўвае Дзень перамогі над нацызмам для прапаганды, гэты дзень не можа страціць сваёй значнасці для чалавецтва. Кароткая памяць — гэта дрэнна, таму што як толькі вырастае пакаленне, якое не ведала вайны, яно спараджае кіраўнікоў, якія вырашаюць, што вайна — просты спосаб вырашэння палітычных і эканамічных праблем, і пачынаецца новая вайна.

Гісторык напiсаў(ла) 16 мая 2013 у 13:43

Спадар Зісер, ці чулі вы што-небудзь пра жмудзінаў і аўкштотаў, іначай летувісаў, якія падшыліся пад літвінаў у 19 стагоддзі? І больш за тое, паспяхова ўцялілі сваю нацыяналістычную лухту ў сусветную гістарыяграфію. Што рабіць беларусам у такой сітуацыі? Пагадзіцца з тым, што літвіны — гэта ўжо не мы? Ці змагацца, каб сусветная супольнасць прызнала, што мы, беларусы, адначасова з’яўляемся спадкаберцамі гісторыі ВКЛ, іначай гістарычнымі літвінамі? Як бы вы сфармулявалі паняцце «гістарычны літвін», напрыклад, калі б пісалі кнігу па гісторыі Беларусі, па якой будуць вучыцца вашыя ўнукі?

Юрый Зісер: Пашкадуйце, я ўсё інтэрнэтчык, а не гісторык.

Максим Дизайнер напiсаў(ла) 16 мая 2013 у 14:33

Юрый як часта вы зазіраеце ў мінскія клубы, якое ў вас стаўленне да забаўляльнай індустрыі Беларусі і якія нацыянальныя асаблівасці для яе развіцця і дэградацыі вы можаце падкрэсліць?

Юрый Зісер: Максім, я ў клубах наогул не бываю: не маё гэта. Тэлевізар таксама не гляджу. Мяне заўсёды больш цікавіла вечнае. Таму не магу кампетэнтна адказаць на гэтае пытанне.

жду атвета, как салавей лета напiсаў(ла) 16 мая 2013 у 14:48

О, мудрэйшы із мудрэйшых Юра! Я вяжу дарагому другу шарфік, то как вы думаеце, как будет цяплей, красівей і эканамічней — англійскай рызінкай ілі абыкнавеннай 2×2?

Юрый Зісер: О найадданейшая з адданых! Што ні звяжаце, дарагому сябру ўсё спадабаецца і будзе грэць, калі ён дарагі і вы яму дарагая.

Иван Андреевич напiсаў(ла) 16 мая 2013 у 14:59

Юра, Вы ведаеце што аб’ядноўвае Hugo Boss, Volkswagen, Bayer, Siemens, Coca-Cola, Ford? Усе гэтыя кампаніі супрацоўнічалі з нацыстамі. Ці ўхваляеце вы такія саюзы бізнэсу з фашыстамі, дыктатарамі, нацыстамі?

Юрый Зісер: Спіс лёгка пашырыць. Напрыклад, у Францыі за супрацоўніцтва з нацыстамі Renault адабралі ва ўладальнікаў, і кампанія стала дзяржаўнай. Мне цяжка меркаваць, таму што я не ведаю, што ў кожным выпадку разумелася пад «саюзам з нацыстамі». Адна справа, калі кампанію прымушалі пастаўляць прадукцыю (або дзейнічалі «добраахвотна-прымусова»), іншая — калі гаспадары самі набіваліся, актыўна прапагандавалі і наўпрост фінансавалі нацызм. Пытанне і ў тым, што пастаўлялі калабарацыяністы — зброю ці духі і газіроўку. Але я бачу ў выніку, што нацыстаў гэтае супрацоўніцтва не выратавала, а прадукцыя згаданых кампаній дагэтуль карыстаецца папулярнасцю. Працаваць у акупаванай краіне заўсёды цяжка, многія крокі вымушаныя, а ва ўмовах нацызму гэта было нават не пытанне бізнэсу, а пытанне фізічнага выжывання ўладальнікаў і мэнэджараў гэтых кампаній. Актуальнае і пытанне «А суддзі хто?» Таму што ў многіх выпадках абвінавачанні ў калабарацыянізме ішлі ад канкурэнтаў, а на рашэнні ўладаў у любым выпадку ўплываў момант помсты. Цяпер раздаюцца ўсё гучнейшыя галасы аб тым, што нават Нюрнбергскі працэс быў хутчэй актам адплаты, чым рэальным судовым разглядам, і многія немцы там атрымалі смяротны прысуд незалежна ад іх рэальнага ўкладу ў нацызм і вайну. Лес сякуць — трэскі ляцяць.

Иван напiсаў(ла) 16 мая 2013 у 15:04

Як Вам фільм «Жыве Беларусь»?

Юрый Зісер: Ужо адказваў: ніколі не глядзеў савецкія прапагандысцкія агіткі і не збіраюся глядзець антысавецкія: як казаў Даўлатаў, гэта адно і тое ж.

Иван напiсаў(ла) 16 мая 2013 у 15:05

У 2010 годзе Макей перадаў вам прапанову ад Лукашэнкі прызначыць вас чальцом Савета Рэспублікі. Чаму вы адмовіліся?

Юрый Зісер: О, пра мяне зноў расказваюць анекдоты! Мне ніхто ніколі не прапаноўваў заняць якую-небудзь дзяржаўную пасаду.

Иван напiсаў(ла) 16 мая 2013 у 15:06

Як вы ставіцеся да рашэння Вольгі Абрамавай балатавацца на пасаду прэзідэнта ў 2015 годзе? Ці гатовыя стаць яе даверанай асобай?

Юрый Зісер: Іван, я ўдзельнічаю толькі ў справах, у якіх вынік дасягальны і станоўчы.

Сяржук напiсаў(ла) 16 мая 2013 у 15:14

Чаму пасля вашага інтэрв’ю на Радыё Свабода беларускамоўныя навіны на Тут.бай амаль зніклі? Вы што, пакрыўдзіліся на беларусаў, якія задавалі вам нязручныя пытанні?

Юрый Зісер: Сяржук, вы б хоць TUT.BY адкрылі, перш чым пісаць з чужых словаў. Няўжо я выглядаю помслівым дурнем? А маё інтэрв’ю на «Свабодзе» сапраўды атрымалася нецікавым, таму што, у адрозненне ад «Нашай Нiвы», пытанні мне задавала не звычайная публіка, а тролі, і пытанні былі нецікавымі.

Чаму б не зрабіць на Тут.бай беларускі куточак толькі з цікавымі беларускамоўнымі навінамі, напрыклад, прысвечанымі гісторыі Беларусі?

Юрый Зісер: Навошта, калі «Наша Нiва» выдатна спраўляецца з гэтай задачай? Кожны павінен займацца сваёй справай для сваёй аўдыторыі.

У інтэрв’ю Радыё Свабода вы абяцалі, што Тут.бай будзе рабіць нейкія цікавыя мерапрыемствы, прысвечаныя Дню Волі і абвяшчэнню БНР. Але нічога такога не было. Ці я памыляюся?

Юрый Зісер: Вось сакавіцкія матэрыялы, прысвечаныя Дню Волі.

Иван напiсаў(ла) 16 мая 2013 у 15:16

Чаму ў Беларусі эпохі Лукашэнкі не могуць з’явіцца буйныя кампаніі ў IT, а заўсёды будуць дамарослыя млявыя і сумныя канторкі?

Юрый Зісер: Гэта не так. У Беларусі ёсць буйныя кампаніі — EPAM Systems, IBA, ITransition і многія іншыя. Дарэчы, EPAM — адзіная беларуская кампанія, акцыі якой у мінулым годзе пачалі прадавацца на Нью-ёркскай фондавай біржы. Не МАЗ, не МТЗ, не БелАЗ, а EPAM. Гэта сімвалічна.

Чаму акцыі нават вашай канторкі tut.by нельга купіць на біржы?

Юрый Зісер: Таму што мы не АТ, а ТАА. Мы недастаткова вялікія для выхаду на біржу, нам трэба для гэтага вырасці ў дзясяткі разоў, каб каштаваць пад мільярд даляраў. А беларускі партал цяпер каштуе мільёнаў пятнаццаць. Што ж, біржа — гэта звышзадача і, шчыра кажучы, мая даўняя мара, да якой нашай камандзе трэба будзе ісці яшчэ шмат гадоў.

Чаму калі вас прасілі падпісаць ліст за вызваленне Казуліна, вы адмовіліся?

Юрый Зісер: Не памятаю такога. Ды і наіўна думаць, што палічыліся б з маёй думкай.

Урал! напiсаў(ла) 16 мая 2013 у 16:06

Спадар Зісер, мне здаецца, што ў глыбіні душы, недзе вельмі глыбока, вы добры чалавек. І спрабуеце ўседзець на двух крэслах, але ёсць надзея, што на вашым партале вы спрабуеце прасоўваць апазіцыйныя тэмы часам, хаваючы іх нават пад грыфам «дрэнна». Ну, а цяпер маё пытанне: чаму на машыну добрую грошай шкада?

Юрый Зісер: Дзякуй за «добрага чалавека». Толькі я асабіста нічога не «спрабую», бо не ўмешваюся ў працу рэдакцыі і зусім не ўдзельнічаю ў рэдакцыйных працэсах. А машына ў мяне добрая, вонкава не падобная да іншых. Езджу з радасцю амаль чатыры гады і вельмі задаволены. Калі для Вас «добрая» — сінонім дарагой, то мне заўсёды было глыбока напляваць на прэстыж у чым бы там ні было. Для мяне машына — не дасягненне і не прадмет гонару, а кавалак жалеза, які эканоміць час (хоць і не паляпшае здароўе) плюс магчымасць атрымаць задавальненне за рулём — асабістага шафёра у мяне няма і ніколі не было.

Роман напiсаў(ла) 16 мая 2013 у 16:57

Добры дзень, Юрый Анатольевіч. Не маглі б вы расказаць, якія прыярытэты перад сабой ставіць TUT.BY, якія напрамкі дзейнасці для кампаніі вы лічыце найбольш перспектыўнымі ў беларускім сегменце інтэрнэту, якія TUT.BY плануе/рэалізуе праекты?

Юрый Зісер: Дзякуй за пытанне! Паколькі, як я ўжо згадваў, рэкламны рынак у Беларусі вельмі абмежаваны, і няма перадумоваў да кардынальных змен, у апошнія гады мы зрабілі стаўку на развіццё электроннай камерцыі, якая, паводле нашых прагнозаў, будзе расці хутчэй, чым рэкламны рынак у стагнацыі. У гэтым рэчышчы трэба і разумець нашы праекты SECOND.BY, KUPI.TUT.BY, PLATI.TUT.BY, воблачны хостынг і некаторыя іншыя. Будучыя праекты пералічыць не магу: мы не анансуем праекты да запуску.

Satan напiсаў(ла) 16 мая 2013 у 17:58

Прачытаў пытанні-каменты і зрабіў шырокі facepalm, на месцы Юрыя я б яго зрабіў як мінімум 50 разоў. Але пытанні…

Беларускія вэб-майстры ў вольны час тут думу думалі… чаму ў байнэце так слаба развіты рэкламны рынак? Манетызацыя by-трафіку адбываецца ў асноўным праз адсэнс або дырэкт, а гэта некашэрна. Напрыклад, таварныя цізеркі нават для наяўнага становішча рынку цалкам маглі б сысці за рашэнне. Пытанне: ці не збіраецеся вы папрацаваць над дадзенай нішай?

Юрый Зісер: Рэкламны рынак слаба развіты ад таго, што ў краіне няма канкурэнцыі. Хлебазаводу нумар пяць рэклама не патрэбная. У краіне 70–75% дзяржаўнай эканомікі. 70% прадукцыі ідзе на экспарт. Нашы экспарцёры рэкламуюцца ў Расіі, але не ў Беларусі. Нават многія прыватнікі ўступаюць паміж сабой у цэнавыя змовы, каб пазбегнуць канкурэнцыі — дастаткова ўспомніць касмічныя цэны на кветкі, якія ў нас даражэйшыя, чым у Парыжы ці Нью-Ёрку. Таму рэкламны рынак у нас існуе ў дэма-версіі. Узровень інтэрнэт-рэкламы на душу насельніцтва ў Беларусі ў 18,6 разу ніжэйшы, чым у Расіі. Між тым TUT.BY зарабляе грошы за кошт медыйнай рэкламы і партнёрскіх праграм, і мы разлічваем, што рана ці позна структура эканомікі зменіцца, і рэкламны рынак падымецца. Дарэчы, Google. Adsense у нас наогул няма, а Яндэкс. Дырэкт — толькі ў выніку пошуку, рэалізаванага на рухавічку Яндэкса.

Якія ўражанні ад удзелу на МаеСэнс?

Юрый Зісер: Добрыя ўражанні і добры праект. Буду ўдзельнічаць яшчэ, калі запросяць.

Ну, і так… каб facepalm не губляць. Вы збіраецеся вылучаць сваю кандыдатуру на наступных прэзідэнцкіх выбарах?

Юрый Зісер: Ні ў якім выпадку. Ні на наступных, ні пасля, ні калі-небудзь яшчэ. Як я ўжо казаў у тэлеверсіі, палітыка — не маё ў прынцыпе. Я — бізнэсмэн, інтэрнэтчык, ІТшнік, у нейкай меры аналітык па некаторых праблемах грамадства ў межах сваёй кампетэнцыі, але не палітык. Спрабую ўплываць на працэсы, якія адбываюцца ў меру сваёй кампетэнцыі і ступені ўплыву.

Вадим напiсаў(ла) 18 мая 2013 у 1:00

Як любіце бавіць вольны час і што робіце, каб пазбегнуць негатыву ад людзей?

Юрый Зісер: Вадзіме, калі я не працую — хаджу ў басейн, гуляю ўздоўж Свіслачы, іду па прадукты і г.д. Часам езджу на ровары. Улетку буду на дачы. А вось пазбегнуць негатыву не атрымліваецца. Вядома, скура за гады несправядлівых абразаў і абвінавачанняў ладна патаўсцела, але ўсё роўна часам хвалююся мацней, чым трэба. Адгарадзіцца ад гэтага немагчыма. Ад гэтага хварэеш. Кожны публічны чалавек жыве пад негатывам. Але ўцячы ад гэтага нельга: нават калі перастаць з’яўляцца на публіцы і даваць інтэрв’ю, хтосьці цябе ўсё роўна будзе лаяць, і гэта будзе да цябе даходзіць. І чым вышэйшыя твае дасягненні, тым мацней будуць лаяць. Зрэшты, і хваліць таксама, так што негатыў і пазітыў неразлучныя.