Kniha «Moc smaku» budzie «samaj patrebnaj u volnaj Biełarusi». Juryj Kačuk sabraŭ bolš za 350 receptaŭ.
«Moc smaku». Tak nazyvajecca kniha. Usie sabranyja recypty, a ich 361, aŭtar sam pryhatavaŭ i pakaštavaŭ. Bolšaść ź ich supravadžajuć i fotazdymki. A dzie fotaaparat nie moh pieradać uvieś kałaryt, ilustracyi zamianili na naciurmorty Vasila Šamruka.
«Ja daŭno zajmajusia hetym. Lublu hatavać, lublu ŭrazić čałavieka biełaruskaj kuchniaj. Kali bačyš recepty ŭ knihach kštałtu «Kuchnia narodaŭ SSSR», to razumieješ, što hety nie biełaruskija stravy. Antrekot pa-saviecku. Spačatku pačaŭ pa bližejšych vioskach daviedvacca recepty. Paśla dalej adjazdžaŭ». Sabranyja ŭ knizie stravy i napoi – z roznych kutkoŭ Biełarusi. A najpierš z rodnaj dla aŭtara Zelvienščyny. Pačynajučy ad znajomych kožnamu jaječni, chaładniku da niazvyčnych dla vucha haradskoha žychara nazvaŭ – šupienia, juc. Tut i sałaty, i stravy z ryby, miasa, supy. Navat dla saleńnia sała jość svaje recepty. A samym ekskluziŭnym Juryj nazyvaje «bebach» — stravu, jakuju sustreŭ tolki ŭ svajoj siamji, i pieradajecca jana z pakaleńnia ŭ pakaleńnie. Niekatoryja recepty jon uziaŭ z knihi Ł.Zavadskaj «Kucharka litoŭskaja». Ale jakija daviałosia adaptavać da siońniašniaha stała.
Pieršaja knižka sp. Kačuka «Tradycyjnyja stravy Biełastoččyny i Hrodzienščyny» vyjšła ŭ saaŭtarstvie ź Janinaj Čyžeŭskaj u Biełastoku. Ale vyrašyŭ praciahvać. «Jak skazaŭ francuzski kuchar Bryja-Savaren,
adkryćcio novaj stravy značyć dla ščaścia čałaviectva kudy bolš, čym adkryćcio novaj zorki».
I nazyvaje knihu «Moc smaku» «samaj patrebnaj u volnaj Biełarusi».
Ci budzie jašče praciah? Aŭtar zapeŭnivaje, što budzie. Bo nie paznajomiŭsia pa-sapraŭdnamu jašče z paleskaj kuchniaj. Ale na heta pojdzie jašče niekalki hadoŭ. A pakul sp. Juryj šukaje mahčymaści vydavć knihu ŭ pierakładzie na zamiežnyja movy. Jon ličyć, što najpierš admietnaściu svajoj kuchni možna zacikavić zamiežnika našaj krainaj, i dakazać jaje samastojnaść.
Juryj Kačuk. Moc smaku. Biełaruskaja kuchnia. — Biełastok: Ortdruk, 2010. — 228 s.
Nabyć knihu možna tut. abo tut
Bebach
Składniki: 2 śvinyja straŭniki, 0,5 kh svojskaj kaŭbasy, 300 h lubivaj śvininy, 300 h morkvy, 300 h cybuli, 200 h pamidoraŭ, 3 zubki časnaku, prypravy, sol.
Dla palivańnia: 30 h sušanych ci 200 h śviežych hryboŭ, 200 h śmiatany, 100 h tamatavaj pasty, 2 st. łyžki śmietankovaha masła, 3 st. łyžki muki, prypravy, sol.
U padrychtavany śviny straŭnik zakłaści syruju svojskuju kaŭbasu, kavałački lubivaha śvinoha miasa, naciortuju morkvu, našatkavanuju cybulu, zdroblenyja pamidory biez skury, kavałački jašče adnaho drobna narezanaha zvaranaha straŭnika, ścisnuty časnok, prypravy (tolki nie łaŭrovy list!), sol. Straŭnik zašyć. Advaryć chvilin 10 u salonaj vadzie. Vadu źlić, znoŭ zalić salonaj vadoj i varyć 5 hadzin. Vadu źlić. Na blasie ŭ piečy zapiakać bebach 20-30 chvilin, čas ad času palivajučy toŭčanymi pamidorami z časnakom.
Palivańnie: muku padsmažyć da koleru zabielenaj kavy. Hryby advaryć u nievialikaj kolkaści vady, drobna narezać i padsmažyć na śmietankovym maśle, dadać muku, dobra pieramiašać, ulić hrybny advar, śmiatanu i tamatavuju pastu, pasalić i dadać prypraŭ. Tušyć 5 chvilin. Palivać narezanyja kavałki bebachu.
