Lidar hramadzianskaj kampanii «Havary praŭdu» aficyjna abviaściŭ pra svoj udzieł u prezidenckaj kampanii. Heta adbyłosia 16 vieraśnia a 8.30 u «Pacia Picy».
Videa Alesia Kudryckaha.
«Ja pryniaŭ rašeńnie brać udzieł u prezidenckaj kampanii. Pryniaŭ rašeńnie ŭdzielničać, kab pieramahčy i stać prezidentam»,— pačaŭ sustreču z žurnalistami lidar hramadzianskaj kampanii «Havary praŭdu». Jon havaryŭ pa-biełarusku, u tym liku i z rasijskimi žurnalistami.
Jon ahledzieŭ pamiaškańnie i paprasiŭ fotaaparat. «Ja vas sfatahrafuju zaraz, a kali stanu prezidentam, to tyja z vas, chto maje słovy pra pieramohu i prezidenctva sustreŭ biez aptymizmu. u moj žurnaliscki puł nie trapiać», — pažartavaŭ Niaklajeŭ.
Zabiahajučy napierad, možna supakoić čytačoŭ, što kandydat pavinšavaŭ Biełaruskuju asacyjacyju žurnalistaŭ z 15-hodździem i pieradaŭ jaje staršyni Žanie Litvinoj bukiet kvietak. «Kab nie było niezaležnaj presy, nie było b i našaj kampanii», — padkreśliŭ paet.
Sustreča z žurnalistami była abstaŭlenaja, jak biźnies-śniadanak. Na stałach pradstaŭnikoŭ presy čakaŭ prajekt prahramy Niaklajeva na 2011-2015 hh, vykanany ŭ vyhladzie palityčnaha mieniu. Čamu paet pajšoŭ u palityku?
Niaklajeŭ pracytavaŭ słovy Kastusia Kalinoŭskaha ź pieršaha numara «Mužyckaj praŭdy». «Što źmianiłasia z tych časoŭ? Sutnasna — ničoha»,— kanstatavaŭ paet i zajaviŭ, što krainu treba mianiać, mianiać sistemu, vyvodzić Biełaruś na cyvilizavanyja rejki. Tamu i była stvoranaja kampanija «Havary praŭdu». Jak heta zrabić? «Asnoŭnaj stravaj» prahramy Niaklajeva idzie palityčnaja i kanstytucyjnaja reforma.
Niaklajeŭ abiacaje pierachod da parłamiencka-prezidenckaj formy kiravańnia. «Choć ja ad pačatku byŭ vyklučna za parłamienckuju formu».Jon pryhadaŭ słovy kiraŭnika Rasii Dźmitryja Miadźviedzieva pra parłamienckuju formu kiravańnia, jakuju toj akreśliŭ, jak nieprymalnuju dla Rasii. Niaklajeŭ padkreśliŭ, što ŭ biełarusaŭ jość dośvied parłamientaryzmu, jon zachavaŭsia, i jaho treba raźvivać.
Łozunham svajoj kampanii Niaklajeŭ abraŭ słovy «Ja pryjšoŭ, kab vy pieramahli».Hetyja słovy byli ŭklučanyja ŭ novy vierš paeta, u jakim biełarusy — snapy na čužym toku, jakija chto choča, toj i małocić. Jon pryjšoŭ, kab złamać hety zły rok. «Boh na niebie, praŭda na ziamli», — dekłamavaŭ paet.
«My ŭsie kažam, što lubim Biełaruś. Niama padstavaŭ nie vieryć, što Łukašenka dy jaho atačeńnie jaje nie lubiać. Roźnica ŭ tym, ci balić u ich serca za našu movu, kulturu. Voś u mianie balić. Niejmavierna balić»,— pryznaŭsia Niaklajeŭ.
Novaje stahodździe, pa słovach paeta, nie źniała prablemy vyklikaŭ movie i niezaležnaści małych krainaŭ. Biełaruś — nie takaja ŭžo i małaja kraina, kaža Niaklajeŭ, ale tyja vykliki jość i ŭ jaje. Kab vyžyć duchoŭna, treba vyžyć fizična, upeŭnieny jon. Paet pracytavaŭ vyniki pierapisu i akcentavaŭ uvahu na skaračeńni nasielnictva. «Nas stała na paŭmiljona mienš. Heta vialiki abłasny horad». Jon adznačyŭ, što łukašenkaŭskaja Biełaruś — nie sacyjalnaja, a sacyjalistyčnaja dziaržava. U nas idzie pieraraźmierkavańnie bahaćciaŭ. Treba mianiać sistemu, skiroŭvać krainu na cyvilizavany šlach.
Hałoŭnaj zadačaj Niaklajeŭ bačyć toje, kab zrabić absalutna niemahčymym viartańnie siońniašniaj sistemy ŭ budučyni.
Ci moža apazicyjny kandydat u adzinočku pieramahčy Łukašenku? Moža, upeŭnieny Niaklajeŭ. U lubym vypadku, jon nie budzie adzin. Bo na stadyi zboru podpisaŭ stanie jasna, chto zdolny praciahvać kampaniju, a chto nie. U hety momant najbolš zdolny atrymaje padtrymku tych, chto z dystancyi sydzie.
«Dobra, što jany sabralisia razam», — kaža paet pra sustreču čatyroch imaviernych kandydataŭ u Bierštach. Jon upeŭnieny — hety dy inšyja prykłady śviedčać, što apazicyja ŭsio jašče maje šaniec abjadnacca.Kali maješ unikalny šaniec, to musiš uźniacca nad ułasnymi ambicyjami. Jon pryhadaŭ, što niekali i ŭ litaraturu ŭvarvaŭsia, jak siońnia ŭ palityku. «Ja razumieju našych palitykaŭ. Usie jany nasamreč zmahalisia ŭsie hetyja hady. A tut pryjšoŭ niejki paet i adrazu da ich». Paet patłumačyŭ, što kryŭdy na jaho trymajuć za toje, što nibyta ŭ jahonuju kampaniju pieraciakło šmat partyjnych aktyvistaŭ. «Dzie ž mnie brać tych ludziej? Ja ž ich nie ŭ partyju kliču. My adrazu zajavili pra siabie, jak pra hramadzianskuju płatformu, dałučycca da jakoj moža luby achvočy». Jon dadaŭ, što ŭ kamandzie jość i pradstaŭniki ŭłady. «Ja nie z tych palitykaŭ, što z prychodam da ŭłady kamienia na kamni nie pakidajuć ad staroj administracyi».
Recept pieramohi ad Niaklajeva stary, jak śviet – pryjšoŭ, ubačyŭ, pieramoh.P jaho słovach, kali ŭłady stvorać usie nieabchodnyja ŭmovy dla svabodnych i prazrystych vybaraŭ, jon nie vyjdzie na płošču. Kali hetaha nie budzie, to płošča źjavicca sama saboj. Jon pierakanany, što Biełarusi nie pasuje siłavoje vyrašeńnie supraćstajańnia ŭładaŭ i apazicyi. Pry hetym paet pryznaŭ, što dekłaravany pryncyp roŭnaści ŭsich kandydataŭ nie spracoŭvaje ŭžo ciapier. Siońnia ž pavinna adbycca farmavańnie inicyjatyŭnaj hrupy. Niaklajeŭcy tak i nie zdoleli adšukać adpaviednaha pamiaškańnia aproč siadziby BNF u Minsku.
Paet pryznaŭsia, što stamiŭsia adbivacca ad abvinavačvańniaŭ u prarasijskaj dziejnaści.
«Ja byŭ i jość biełaruskim paetam, ja biełaruski kandydat i ja stanu biełaruskim prezidentam», — adčakaniŭ Niaklajeŭ.Sustreču jon vioŭ vyklučna pa-biełarusku, navat na pytańni rasijskich telekanałaŭ adkazvaŭ na biełaruskaj movie. Na joj nadrukavany i prajekt jaho prahramy. «Siońnia dzień Salidarnaści. Dyk budziem salidarnymi!» — takimi słovami skončyŭ Niaklajeŭ aficyjnuju častku sustrečy.
