Andrej Aramnaŭ: «Ja bolš tak nie budu»

«Ja aformiŭ dakumienty na ŭłasny lehkavik, u vyniku čaho nie strymaŭsia i vypiŭ piva». Za nieadnarazovaje kiravańnie aŭto ŭ niećviarozym stanie ałmpijskaha čempijona pakarali štrafam 150 bazavych vieličyniaŭ (5 młn 250 tys. rubloŭ). Repartaž Siamiona Piečanko z zały sudu + fotarepartaž Julii Daraškievič.

29 maja ŭ Barysaŭskim mižharnizonnym vajskovym sudzie była razhledžanaja kryminalnaja sprava ŭ dačynieńni da alimpijskaha čempijona Andreja Aramnava, jakoha paŭtorna zatrymali za rulom aŭtamabila ŭ stanie ałkaholnaha apjanieńnia.

Na sud alimpijski čempijon pryjšoŭ u aranžavaj bajcy z kapiušonam u supravadžeńni piaci mužčynaŭ (jak vyśvietliłasia ŭ sudzie, to byli treniery, pradstaŭniki spartyŭnaha kłubu «Dynama»).

Pabačyŭšy fatohrafaŭ, Andrej spyniŭsia pierad bramaj vajskovaha sudu. «Vy što, zvarjacieli?!» — zapytaŭ jon u žurnalistaŭ, sprabujučy naciahnuć na hałavu kapiušon. Jahonamu trenieru daviałosia niekalki razoŭ prasić taho prajści u sud. Spartoviec uskočyŭ u budynak nizka nachiliŭšy hałavu dy schavaŭšysia za śpiny svaich tavaryšaŭ. Nie abyšłosia biez pryhodaŭ i ŭ zale sudu: «Treba było ŭ Piekinie fatahrafavać! A to ŭ «Kamsamołcy» tolki dva zdymki było, i ŭsio», — nie sunimałasia śvita čempijona. Žurnalistaŭ pry hetym źvinavacili ŭ tym, što siońnia Aramnaŭ nie zmoža treniravacca, a jamu ž treba było ŭ hety dzień «dziesiać tonaŭ padniać».

Akramia žurnalistaŭ dy supravadžeńnia spartoŭca ŭ sudzie nikoha nie było — ni prychilnikaŭ, ni rodnych. Adčuvałasia, što ŭ takoj ciesnaj kampanii pradstaŭniki presy byli niežadanymi haściami.

Na sudzie staršyniavaŭ pałkoŭnik justycyi Karanieŭski A.P. Na jaho pytańni znakamity parušalnik, jaki ŭ sudzie baraniŭsia samastojna, adkazvaŭ nie hučna, časta zabyvaŭ ustać, kali da jaho źviartaŭsia Vysoki sud. «Vy nie rychtavalisia da pasiedžańnia? — spytaŭ sudździa. —

Ja zdahadvaŭsia, jakim budzie vynik, tamu rychtavaŭsia słaba» — byŭ adkaz.

Sa słovaŭ dziaržaŭnaha abvinavaŭcy stała viadoma, što alimpijskaha čempijona dvojčy zatrymlivali za kiravańnie aŭto ŭ niećviarozym stanie — u śniežni 2008 h. i lutym 2009 h. Paśla pieršaha vypadku jaho pazbavili prava kiravać aŭtamabilem terminam na try hady dy pakarali štrafam u 1050000 rubloŭ. Druhoje zatrymańnie paciahnuła za saboj kryminalnuju spravu, jakuju raspačali ŭ sakaviku pavodle č. 2 art. 317‑1 KK (kiravańnie transpartnym srodkam asobaj, jakaja znachodzicca ŭ stanie ałkaholnaha apjanieńnia, pieradača kiravańnia transpartnym srodkam takoj asobie ci admova ad prachodžańnia pravierki (ahladu)). Artykuł praduhledžvaje pakarańnie ŭ vyhladzie štrafu, papraŭčych pracaŭ da dvuch hadoŭ, ci aryštu da šaści miesiacaŭ.

Spravu nakiravali ŭ vajskovy sud, bo Aramnaŭ ad studzienia 2008 hodu jon słužyć na kantraktnaj asnovie instruktaram pa fizičnaj padrychtoŭcy ŭ staličnaj vajskovaj čaści № 5448 (ad vieraśnia 2008 h. — praparščyk).

Adkazvajučy na pytańni abvinavaŭcy, Aramnaŭ kazaŭ, što dakładna nie pamiataje dataŭ, kali jaho zatrymlivali. Pa jaho słovach, u časie apošniaha zatrymańnia

jon admoviŭsia ad praviadzieńnia ekśpiertyzy, bo z «minułaha vopytu» viedaŭ, što ałkahol u kryvi znojduć.

«Tady ja niejak nie razumieŭ, što rablu. Ciapier usio zrazumieŭ i raskajvajusia». Na pytańnie sudu, čamu ŭsio ž jon parušaŭ praviły darožnaha ruchu, spartoviec adkazaŭ, što na jaho paŭpłyvaŭ «vialiki pośpiech u Piekinie» i małady ŭzrost. Spartoviec nie adzin raz užyŭ u sudzie słova «biespakaranaść», niekalki razoŭ paŭtaryŭ, što nie vieryŭ, što ŭ toj dzień (28 lutaha 2009 h. — NN) jaho mohuć spynić, što ŭsio sydzie z ruk. Akurat paśla pieršaha zatrymańnia jon atrymaŭ trochpakajoŭku ŭ stalicy, inšyja ŭznaharody, a pierad apošnim incydentam aformiŭ dakumienty na ŭłasny lehkavik, u vyniku čaho nie strymaŭsia i «vypiŭ piva».

Abvinavaŭca zapatrabavaŭ dla Andreja Aramnava pakarańnie ŭ vyhladzie štrafu hetym razam u piać razoŭ bolšaha.

«Ja bolš tak nie budu» — zajaviŭ u apošnim słovie abvinavačany.

«U maim žyćci mnohaje pieraviarnułasia paśla hetaha zdareńnia, ja adčuvaju, što staŭ darosłym, parazumnieŭ» — kazaŭ alimpijec. Jon całkam pryznaŭ svaju vinu i raskajaŭsia. Vysoki sud heta ŭličyŭ i praz hadzinu vynies vierdykt, jaki całkam supaŭ z prapanovaj dziaržaŭnaha abvinavačańnia. Vyrak ustupić u siłu ciaham dziesiaci sutak, za hety čas Aramnaŭ moža abskardzić jaho ŭ Biełaruskim vajskovym sudzie.

«U mianie ŭsio narmalna! Čakajcie novych zavajovaŭ na suśvietnych spabornictvach!» — skazaŭ spartoviec žurnalistam na raźvitańnie. Vyhladaŭ jon zadavolenym.

Siamion Piečanko, Barysaŭ‑Miensk