Šturmavaja vintoŭka AK-12 raspracoŭki kancerna «Kałašnikaŭ» pieramahła na konkursie pa vybary asnoŭnaj asabistaj zbroi dla bajavoha ryštunku «Ratnik», paviedamiŭ namieśnik ministra abarony RF Juryj Barysaŭ, piša Lenta.ru.
Supiernikam novaha «Kałašnikava» była šturmavaja vintoŭka AJEK-971 vytvorčaści zavoda imia Dziehciarova.
«Absalutna vidavočna — heta aŭtamat Ižmaša. Jon prajšoŭ pa suadnosinach «košt-jakaść», — skazaŭ Barysaŭ. Majecca na ŭvazie Ižeŭski mašynabudaŭničy zavod, jaki raspracoŭvaje i pastaŭlaje AK roznych versij.
Raniej paviedamlałasia, što vajskoŭcy admaŭlalisia ad AK-12, bo jon nie zadavoliŭ ichnych patrabavańniaŭ. Heta vyklikała padazreńni ŭ tym, što AK-12 «pieramoh» tolki za košt svajoj adnosnaj tannaści i mahutnaha łobi ŭ Maskvie.
Zavod Ižmaš naležyć vielmi ŭpłyvovaj dziaržaŭnaj vajenna-pramysłovaj karparacyi «Rasijskija technałohii» («Rastiech»), u toj čas jak zavod imia Dziehciarova — pryvatnaje pradpryjemstva.
AK-12 («aŭtamat Kałašnikava 2012 hoda») pa sutnaści źjaŭlajecca tym ža AK-74M, dapracavanym z punktu hledžańnia erhanomiki, a taksama zdolnym nieści dadatkovyja pryłady — pryceły, lichtary i h.d.
AJEK-971 — šturmavaja vintoŭka, pieršaja viersija jakoj była stvoranaja jašče ŭ 1980-ch i dapracoŭvałasia ŭ 1990-ja. Jana bolš składanaja, čym AK-12, ale maje lepšuju kučnaść, bo vykarystoŭvaje schiemu, jakaja ŭraŭnavažvaje addaču ad strełu za košt sustrečnaha ruchu bałansira i zatvornaj ramy. U vyniku rezka pavialičvajecca trapnaść pry stralbie čerhami.
«Ratnik» musić stać kompleksam ekipiroŭki rasijskaj piachoty novaha pakaleńnia, jon uklučaje palavuju formu z prasunutych matarjałaŭ, srodki abarony, sistemy suviazi i navihacyi, a taksama novuju strałkovuju zbroju kalibraŭ 5,45 ci 7,62 mm.
