Papiaredžvajem: pad kožnym filmam akramia pieršaha nie biełaruskija, a mierkavanyja suśvietnyja daty premjer. Biełaruskaja premjera moža adbycca paźniej ci navat na dzień raniej, a moža i nie adbycca ŭvohule. Suśvietnaja premjera moža być pieraniesienaja. Nazvy filmaŭ u biełaruskim prakacie mohuć istotna adroźnivacca ad aryhinalnych nazvaŭ.
Zychod: Cary i Bohi
(Exodus: Gods and Kings)
1 studzienia
Pieršaja ŭ biełaruskich kinateatrach stužka hoda raspaviadzie biblejskuju historyju Majsieja (pa śćvierdžańniach stvaralnikaŭ) dastatkova realistyčna. Film z «Betmenam» Krystyjanam Bejłam u hałoŭnaj roli užo paśpieli zabaranić da pakazu ŭ Maroka praz čałaviečaje pradstaŭleńnie Boha i Jehipcie praz «sijanizm».
Zakładnica-3
(Tak3n)
9 studzienia
Niemaładomu Lijamu Nisanu znoŭ pryjdziecca vyzvalać blizkich jamu ludziej. Na hety raz pieraškoda surjoznaja: usia palicyja. Jaho hieroja, Brajana Miłsa, abvinavačvajuć u zabojstvie ŭłasnaj žonki.
Kibier
(Blackhat)
16 studzienia
Krys «Tor» Chemsvart pasprabuje nie rasčaravać kampjutarščykaŭ: film ź im u hałoŭnaj roli pretenduje na realistyčny pakaz chakierstva. Jaho hieroj — kibierzłačynca, jakoha najmaje FBR dla baraćby ź vielmi biaźlitasnym chakieram.
Mardekaj
(Mortdecai)
23 studzienia
Za vusami słavutaha art-ekśpierta i machlara Čarłza Mardekaja chavajecca sam Džoni Dep. Ujavicie: Kapitan Džek Vierabiej stanovicca Astapam Benderam i adnačasova Ostynam Paŭersam.
Uschod Jupitar
(Jupiter Ascending)
6 lutaha
Stvaralniki «Matrycy», brat i siastra Vačoŭski (tak, adzin z bratoŭ paśpieŭ pamianiać poł) viartajucca! I jany abiacajuć hrandyjoznaje vidovišča. Praŭda, siužet zdajecca krychu prastadušnym: dziaŭčynka pa imi Jupitar sustrakaje «prynca na biełym kani» Kiejna, jaki raspaviadaje joj pra jaje los: uratavać uvieś suśviet, značna šyrejšy za viadomy čałaviectvu.
50 adcieńniaŭ šeraha
(Fifty Shades of Grey)
13 lutaha
Džejmi Dornan, vykanaŭca hałoŭnaj roli ŭ ekranizacyi rezanansnaha ramanu E.Ł. Džejms, śćviardžaje, što ŭ filmie nie budzie porna. Peŭnyja eratyčnyja sceny buduć, ale nijakich aholenych ciełaŭ. Razychodzimsia? Ci jość i tyja, chto palubiŭ knihu nie za apisańnie pałavych aktaŭ?
Čapi
(CHAPPiE)
6 sakavika
Čapi — ekśpierymientalny robat, naładžany kab vučycca i adčuvać jak čałaviek. Miły, amal jak Uołł-i. Dy biada: skradzieny złačyncami (u vykanańni hurta Die Antwoord) i navučany imi bandyckim štukam. Režysior stužki — Nił Błomkamp, viadomy pa «Rajonie №9» i «Elizijumie», tamu možna spadziavacca, što budzie dastatkova i ekšnu, i humaru.
Papiałuška
(Cinderella)
13 sakavika
«Dysnej» vyrašyli pieraźniać svaju kłasičnuju kazku 65-hadovaj daŭniny. Mienavita jak kłasičnuju kazku, biez usialakich žarcikaŭ. Hrać Papiałušku, kažuć, zaprašali Emu «Hiermijonu» Uotsan, ale ŭ vyniku rola dastałasia mieniej viadomaj, ale nie mieniej pryvabnaj Lili Džejms.
Farsaž-7
(Furious 7)
3 krasavika
Honačnaja saha ź Vinam Dyzielem i Połam Uokieram doŭžycca ŭžo 14 hod i spyniacca nie źbirajecca. Navat paśla śmierci Poła Uokiera, jaki zahinuŭ u aŭtakatastrofie ŭ listapadzie 2013-ha. Scenar pierapisany tak, kab jaho hieroj syšoŭ u adstaŭku (nie abydziecca biez kampjutarnaj hrafiki), a sieryju filmaŭ možna było praciahnuć.
My, braty / Aviel
(My, braťja)
18 krasavika
Biełaruski nacyjanalny kinaprajekt naŭrad ci źbiare sotni miljonaŭ u suśvietnym prakacie, ale ŭ Biełarusi maje ŭsie šancy stać chitom. Tut i restaŭracyja znajomych mnohim padziej na Płoščy-2010, i miematyčnaja fraza «Čto-to nie tak», i zdymki vykanaŭcy hałoŭnaj žanočaj roli ŭ Playboy i Maxim…
Mściŭcy: Era Altrona
(Avengers: Age of Ultron)
1 maja
Marvel nastolki ŭdała sumiaščaje epičny bajavik i niapošły humar u ekranizacyjach svaich supierhierojskich komiksaŭ, što ŭžo i nie tak važna, ad kaho tam buduć ratavać Ziamlu. Usio roŭna ŭsie pojduć na Toni Starka, a chto nie na jaho, toj na Čornuju ŭdavu.
Šalony Maks: Daroha lutaści
(Mad Max: Fury Road)
15 maja
Praz 36 hod paśla pieršaha «Šalonaha Maksa» i praz 30 paśla apošniaha sikveła lehienda žanru postapakalipsis vierniecca na darohu z aryhinalnym ruchavikom — režysioram Džordžam Mileram. Dziŭnyja mašyny, pustelnia, chajvei i strelby — usio astatniaje taksama na miescy. Tolki zamiest Meła Hibsana Tom Chardzi.
Ziamla budučyni
(Tomorrowland)
22 maja
Nie čapajcie nieznajomyja značyki, a toje niekatoryja telepartujuć u dysnejeŭskuju chajtek-kazku. Ci nie zusim kazku, a kalektyŭnuju pamiać. Zamanliva? Džordž Kłuni bonusam.
Śviet Jurskaha pieryjadu
(Jurassic World)
12 červienia
Praz 10 hod «vytvorčaha piekła» čarhovy praciah «Parku Jurskaha pieryjadu» ŭsio ž trapić na ekrany. U samim parku taksama minuła niamała času: 22 hady z adkryćcia. Intares publiki zhasaje, prychodzicca prydumlać novyja fokusy. Viadoma, čym toje skončycca. Darečy, stužku paśpieli raskrytykavać za nierealistyčnych dynazaŭraŭ: maŭlaŭ, lalki 1993 hoda vyjšli lepiej za kampjutarnyja madeli 2014-ha.
Hałavałomka
(Inside Out)
19 červienia
Novy multfilm Pixar raspaviadzie nam pra našych tarakanaŭ u hałavie. Tarakany miłyja, antrapamorfnyja i puchnatyja. Zvać ich Radaść, Smutak, Strach, Hnieŭ i Hreblivaść, žyvuć jany ŭ hałavie 11-hadovaj Rajli Andersan.
Terminatar: Hienezis
Terminator: Genisys
1 lipienia
Terminatar z Arnoldam Švarcenehieram viartajecca! Ale troški ŭ inšy śviet: Džon Konar dasyłaje ŭ minułaje lejtenanta Kajła Ryza, kab toj uratavaŭ Saru Konar, maci Džona. Ale Kajł znachodzić zusim nie toje, da čaho jaho rychtavali. Ale Sara Konar užo vychavanaja terminataram-Švarcenehieram.
Mińjony
(Minions)
10 lipienia
Bananapadobnyja stvareńni z «Brydki ja» atrymali słavu chiba nie bolšuju za hałoŭnych hierojaŭ multfilma, ale ich historyja dahetul nie była raskrytaja. Jak vyśvietlicca, jany vielmi staražytnyja stvareńni, jakija prahnuć adnaho: słužyć samamu ahidnamu złodzieju. Praŭda, złodziej naŭrad budzie rady.
Fantastyčnaja čaćviorka
(The Fantastic Four)
7 žniŭnia
Kali «supierhierojskaje kino Marvel» nasamreč stała Brendam ź vialikaj litary, možna pasprabavać znoŭ pierazapuścić ekranizacyju Fantastyčnaj čaćviorki. Papiarednija sproby (nie samyja ŭdałyja) rabilisia ŭ 1994 i 2005 hadach.
Monstry na kanikułach-2
(Hotel Transylvania 2)
25 vieraśnia
Pieršyja «Monstry na kanikułach», što raspaviadali historyju prostaha chłopčyka, jaki patrapiŭ u kampaniju niačyścikaŭ dy zakachaŭsia ŭ vampirku, mieŭ niečakany pośpiech. U praciahu stužki monstry pajeduć adpačyvać, ale im nie ŭratavacca ad ludziej.
Barvovy pik
(Crimson Peak)
16 kastryčnika
Žudzik ad režysiora «Łabirynta Faŭna» i «Cichaakijanskaj miažy» dy scenarysta «Chobitaŭ» — Hiljerma del Tora. Hatyčny ramans z pryvidami Anhlii XIX st., jaki pakaža, što pryvidy strašniejšyja za ludziej.
007: Śpiektr
(Spectre)
6 listapada
Dvaccać čaćvierty film pra lehiendarnaha ahienta 007, Džejmsa Bonda, z Deniełam Krejham u hałoŭnaj roli. Jak zaŭsiody darahija mašyny (u pryvatnaści Aston Martin DB10), pryhožyja žančyny (u ich liku Monika Biełučy), terarysty i palityčnyja intryhi.
Hałodnyja hulni: Sojka-pieraśmiešnica, častka 2
(The Hunger Games: Mockingjay - Part 2)
20 listapada
Na čaćviertuju častku «Hałodnych hulniaŭ» budzie, peŭna, ciažkavata zaciahnuć tych, chto nie čytaŭ knihu. Tyja ža, chto čytaŭ, viedajuć, što pavolny hutarkovy tryler papiaredniaj častki źmienicca praktyčna čystym ekšnam, pieramohaj dabra nad złom, a potym i pieramohaj inšaha dabra nad pieramožnym dabrom.
Zornyja vojny: Siła prabudžajecca
(Star Wars: The Force Awakens)
18 śniežnia
Stužka narabiła niamała šumu jašče da pieršaha trejleru, a pieršy trejler litaralna ŭzarvaŭ internet śvietłavym miačom novaj formy. Usio, što viadoma pra film, «Naša Niva» sabrała tut.
Misija nievykanalnaja-5
(Mission: Impossible 5)
25 śniežnia
«Novaja bandyjana» z Tomam Kruzam. Pra scenar pakul ničoha nie viadoma. Chiba viadoma, što hieroju Toma Kruza pryjdziecca prahulacca pa fiuzielažy ahramadnaha samalota, admachvajučysia ad viertalota nad hałavoj.
Ahidnaja vaśmiorka
(The Hateful Eight)
śniežań 2015
Vośmy film Kvencina Tarantyna raspaviadzie pra Dziki Zachad paśla Hramadzianskaj vajny i nie budzie praciaham «Džanha». Kultavy režysior abiacaje tradycyjny «spahieci-vestern». Scenar filma ŭciok u internet, ale śćviardžajecca, što jon nie byŭ sapraŭdnym.
Jakich filmaŭ čakajecie vy?
