Lešak Šarepka 13 listapada pravioŭ pres-kanfierencyju z nahody Dnia niezaležnaści Respubliki Polšča.
«Sioleta Polšča adznačaje mnoha značnych dla sučasnaj polskaj historyi padziej. My śviatkavali 25-hodździe pieršych častkova svabodnych vybaraŭ u Polščy. Paśla hetaha kraina źmianiła kurs i pačała ruchacca ŭ bok Zachadu. Taksama ŭ hetym hodzie spaŭniajecca 15 hadoŭ z momantu dałučeńnia da NATA i 10-hodździe ŭstupleńnia ŭ ES».
Šarepka taksama pryvioŭ dokazy pravilnaha vybaru palityki krainy:
«Za apošnija 20 hadoŭ VUP Polščy pavialičyłasia ŭ 10 razoŭ i ciapier dasiahaje 520 miljardaŭ dołaraŭ — u dziesiać razoŭ bolš za VUP Biełarusi. Za hety čas ekspart Polščy pavialičyŭsia ŭ 14 razoŭ, u tym liku za čas znachodžańnia ŭ ES — u 4 razy. Heta śviedčyć, što naša palityka vybrała pravilny nakirunak».
Šarepka adznačyŭ, što 2014 hod staŭ hodam intensiŭnaha razmarožavańnia polska-biełaruskich adnosin. Adbylisia dvuchbakovyja sustrečy i vizity vysokich čynoŭnikaŭ. Hałoŭnym ža dasiahnieńniem jon paličyŭ adnaŭdieńnie dziejnaści mižviedamstviennaj kamisii Biełarusi i Polščy.
Zakranuŭ pasoł i pytańnie vizaŭ, jakoje vielmi chvaluje biełarusaŭ.
«Pa stanie na 1 kastryčnika 2014 hoda Polšča vydała na 13% bolš za anałahičny pieryjad minuła hoda pa ŭsioj Biełarusi. A minskaje konsulstva pavysiła hety pakazčyk na 20%.
U minułym hodzie my vydali 350 tysiač viz. Na siońnia heta ličba składaje kala 320 tysiač. Dumaju, da kanca hoda my dadzim biełarusam kala 380 tysiač viz, uličvajučy tyja, što vydajucca konsulstvami ŭ Litvie i Łatvii».
Šarepka paćvierdziŭ, što biełaruski bok daŭ Polščy dazvoł na budaŭnictva konsulskich centraŭ. Tamu płanujecca, što
vosiem konsulskich centraŭ źjaviacca ŭžo viasnoj 2015 hoda: pa adnym u kožnym abłasnym centry i jašče dva ŭ bujnych rajonnych centrach — Pinsku i Lidzie.
«My hatovyja pasłać stolki konsułaŭ, kolki patrebna», — adznačyŭ pasoł.
Ź niepryjemnych momantaŭ Šarepka zasiarodziŭ uvahu na mahčymych źmienach u adukacyi, pryniaćcie jakich zakranie palakaŭ, što žyvuć u Biełarusi:
«Ministerstva adukacyi Biełarusi namahajecca źmianić adukacyjny kodeks i pamienšyć kolkaść urokaŭ na movach mienšaściaŭ. Kali heta adbudziecca, takoje rašeńnie paŭpłyvaje na ŭzrovień adukacyi polskamoŭnych ludziej».
Jon taksama adznačyŭ, što tolki 12% z tych hramadzian Biełarusi, jaki nazyvajuć siabie etničnymi palakami, razmaŭlajuć pa-polsku.
