Narešcie, zima zakončyłasia i nadyšoŭ čas zvodzić ź joj rachunki. Try chałodnyja miesiacy padaravali muzyčnym amataram mnostva cikavych relizaŭ. Razam z A1 Xplore Music ad Deezer my sabrali 20 samych roznych albomaŭ: ad novaha pračytańnia kłasiki da rytmaŭ filmaŭ Tarancina.
Mumij Trołl — Pośle zła
Hod hłabalnych niaŭdač akazaŭsia paśpiachovym u tvorčaści kultavaha rasijskaha hurta. Adsutnaść hastrolaŭ i kancertaŭ dazvoliła vypuścić ažno dva albomy.
Albom-niespadziavanka «Prizraki zavtra» vyjšaŭ u kastryčniku, a ŭ pačatku śniežnia adbyŭsia asnoŭny reliz, zapis jakoha pačynaŭsia jašče ŭ dakavidnuju epochu. U im Illa Łahucienka pradkazaŭ budučyniu «paśla zła».
A što jość toje samaje zło — karanavirus ci niešta inšaje, — kožny vyznačyć sam.
Taylor Swift — Evermore
Tejłar Śvift taksama skarystałasia 2020-m napoŭnicu, vypuściŭšy dva albomy: «Folklore» i «Evermore».
Jany padobnyja nie tolki pa nazvach, ale i pa hučańni. U ich zapisie ŭdzielničaŭ adzin skład muzykaŭ, a estetyka i hučańnie «Folklore» tak zachapili śpiavačku, jakaja zvyčajna z kožnym nastupnym relizam pačynaje novy raździeł svajoj tvorčaści, što jana vyrašyła ničoha nie łamać.
I vypuściła albom u svoj 31-y dzień narodzinaŭ u jakaści padarunka svaim prychilnikam.
Kasta — Čierniła ośminoha
U rep-kalektyva, čyja tvorčaść minułaj vosieńniu stała vielmi blizkaj kožnamu biełarusu, u śniežni vyjšaŭ čarhovy albom, vokładku jakomu stvaryŭ biełaruski dyzajnier Alaksiej Limonaŭ.
«Kasta» admoviłasia ad kałamburaŭ u naźvie alboma, ale šmatlikich namiokaŭ, sensaŭ i tonkaha humaru ŭ tekstach mienš nie stała.
The Avalanches — We Will Always Love You
Aŭstralijskija elektronščyki vielmi surjozna pastavilisia da stvareńnia svajho treciaha alboma. Jaho kancepcyja sychodzić hłyboka ŭ temu śmierci, tahaśvietnaha žyćcia, zorak i niabiesnych istot.
Dla stvareńnia muzyki duet uziaŭ sotni sempłaŭ sa starych płytak. Pracu z takoj muzykaj, čyje vykanaŭcy daŭno pamierli, muzyki nazyvajuć svojeasablivym «vyklikam duchaŭ».
Taki hłyboki padychod vielmi stanoŭča byŭ acenieny krytykami, niekatoryja nazvali «We Will Always Love You» sapraŭdnym šedeŭram.
Paul McCartney — McCartney III
Prosta ŭjavicie sabie: u svaje 78 hadoŭ ser Poł MakKartni sam napisaŭ muzyku, pradumaŭ aranžyroŭku i zapisaŭ u adzinočku ceły albom — sam syhraŭ na ŭsich instrumientach!
Paśla pačatku «rokdaŭnu» (heta słova prydumaŭ sam MakKartni) muzyka zakryŭsia na svajoj fiermie i navat nie dumaŭ, što jaho muzicyravańnie ŭ vyniku da čahości pryviadzie. A ŭ vyniku atrymaŭsia «McCartney III» — redki prykład addanaści tvorčaści, natchnieńnia, prafiesijanalizmu i biaskoncaj siły duchu.
Viagra Boys — Welfare Jazz
Heta nie toje, pra što vy padumali. Da ŭkrainskaha žanočaha trya Viagra Boys nie majuć nijakaha dačynieńnia.
Heta šviedski post-pank hurt, jaki ličać adnym z najlepšych kancertnych kalektyvaŭ Jeŭropy. Im reśpiektuje Ihi Pop, a albom pryśviečany palitycy šviedskaha ŭrada, jaki choča padtrymlivać tolki «vysokaje mastactva» i nie prymaje brutalnych rokieraŭ.
Rhye — Home
Rhye — redki prykład hurta, jaki raźvivajecca nie ŭšyrki, a ŭhłyb. Zamiest ekśpierymientaŭ, jakimi nie hrebuje bolšaść, duet praciahvaje stvarać lohkuju nastalhičnuju muzyku, jakaja ŭnosić słuchača ŭ miesca jahonaj mary, dzie niama nijakich turbot.
Nazva alboma adlustroŭvaje źmieny ŭ žyćci salista Majka Miłaša. Doŭhi čas jon pierajazdžaŭ ź miesca na miesca, pakul u vyniku nie pasialiŭsia kala kańjona Tapanha na poŭnač ad Łos-Andželesa. Tam u chatniaj studyi była zapisana bolšaja častka materyjału. Hučańnie maksimalna adlustroŭvaje zdabyty ŭnutrany spakoj artysta, jaki narešcie znajšoŭ svoj dom.
Leibonik — Žaki
Narešcie adzin z samych pazityŭnych ajčynnych hurtoŭ zapisaŭ svaje chity i vypuściŭ debiutny albom «Žaki».
Hetyja pieśni dobra viadomyja amataram biełaruskaj muzyki i naviedvalnikam šmatlikich dvarovych kancertaŭ, jakija vosieńniu daŭ Siarhiej Bašłykievič.
Kali ŭ vas kiepski nastroj, to vielmi raim pasłuchać «Žaki».
Weezer — OK Human
Karanavirus pakinuŭ muzykam hihanckaje pole dla tvorčaści, zamknuŭšy ich u svaich studyjach. Weezer, jakija zaŭsiody vyłučalisia ekśpierymientami i muzyčnaj uradžajnaściu, vykarystali dla zapisu svajho 14-ha alboma tolki anałahavyja instrumienty i ceły arkiestr z 38 čałaviek.
«Albom «OK Human» byŭ stvorany ŭ toj pieryjad, kali instrumientalisty stali pieražytkam minułaha. Usio, što my mahli, — heta zazirnuć u staražytnyja časy, kali ludzi sapraŭdy niešta značyli i kali ciomnaj fantazii pra zachop ułady technałohijami jašče nie isnavała», — havorycca ŭ zajavie hurta.
Black Country, New Road — For the First Time
Małady łondanski hurt ź pieršych sinhłaŭ u 2019 hodzie prymusiŭ havaryć pra siabie, a debiutnik «For the First Time» jašče da relizu najbolš śmiełyja krytyki zapisali ŭ patencyjna najlepšyja albomy hoda.
U vyniku śmiełaja sumieś z post-panku, mat-roku i fry-džazu siamiorki brytanskich zumieraŭ jaŭna apraŭdała čakańni słuchačoŭ, u jakich za dva hady paśpieŭ istotna razhulacca apietyt.
Foo Fighters — Medicine at Midnight
Pieršy za try hady albom Foo Fighters rychtavali da jubilejnaha tura, kab tryumfalna sabrać bieźlič stadyjonaŭ pa ŭsim śviecie. Ale pa viadomych pryčynach reliz zaciahnuŭsia, tamu jaho možna vykarystoŭvać u jakaści treniroŭki budučych pajezdak.
Ci jak leki ad niehatyvu, bo bolšaha pazityvu ŭ dyskahrafii hurta vy nie znojdziecie. «Medicine At Midnight» čaplaje stanoŭčaj enierhijaj, a muzyki pakłapacilisia, kab treki byli raznapłanavymi i niasumnymi.
The Silicon — Woody Goes to Nice
Hetaje trya možna nazvać biełaruskim supierhurtom: udzielnikaŭ The Silicon vy možacie viedać pa tvorčaści ŭ składzie inšych kalektyvaŭ. Dźmitryj Papłaŭski hraje ŭ «Pietle Pristrastija», a basist Kanstancin Kaleśnikaŭ — u «Nahuali».
Kalektyŭ hraje ŭ niezvyčajnym žanry siorf-rok. Amatary filmaŭ Kviencina Tarancina prosta abaviazanyja paznajomicca z tvorčaściu The Silicon i nacisnuć padabajku ich novamu albomu.
God is an Astronaut — Ghost Tapes #10
Ad roku ciopłych plažaŭ pierachodzim da ciažkich hitarnych ryfaŭ. Irłandcy z God is an Astronaut daŭno atrymali status kultavaha post-rok kalektyvu, ale spačyvać na łaŭrach muzyki nie źbirajucca, što dakazvajuć novymi albomami.
Pakul nie nastupiła ciopłaja viasna, my vam znajšli najlepšy saŭndtrek dla špacyraŭ pa vulicach, ź jakich jašče nie syšoŭ zimovy brud.
Mogwai — As the Love Continues
Kali vam post-roku akazałasia zamała, to trymajcie płytku jašče adnych znanych «paštaljonaŭ», jakija praz 25 hadoŭ paśla debiutu znoŭ uznačalili brytanskija čarty.
U adroźnieńnie ad svaich irłandskich kaleh, Mogwai hučać nie tak zmročna i muzyčna bolš raznastajna, dałučyŭšy da tradycyjnych rok-instrumientaŭ i saksafon.
Christian Löffler — Parallels: Shellac Reworks By Christian Löffler
Niamiecki elektronščyk Kryścijan Lofler sumiaściŭ svaje miełodyi z uryŭkami z rabot Bacha, Bietchoviena i inšych kłasičnych kampazitaraŭ.
U vyniku atrymaŭsia davoli śmieły ekśpierymient, metaj jakoha było viarnuć adčuvańnie prostaści i čałaviečnaści ad prasłuchoŭvańnia kłasičnych tvoraŭ.
«Kali ja słuchaŭ zapisy, ja padumaŭ, što muzyka Bietchoviena na samaj spravie vielmi čałaviečnaja i dastupnaja, ale stała niejkaj nieziamnoj paśla dziesiacihodździaŭ pierajhravańnia i pieraasensavańnia. Ja chacieŭ viarnuć jaje da samych prostych adčuvańniaŭ», — tłumačyć Lofler.
Julien Baker — Little Oblivions
Amierykanskaja śpiavačka Džuljen Bejkier pajšła pa šlachu Poła MakKartni i stvaryła svoj albom całkam sama ŭ siabie doma ŭ Memfisie.
Heta adnačasova piaščotnaja i zmročnaja rabota z aŭtabijahrafičnym napaŭnieńniem na samyja roznyja, časam niepryjemnyja temy.
Nick Cave & Warren Ellis — Carnage
Udzielnikam The Bad Seeds Niku Kiejvu dy Uarenu Elisu spatrebiłasia 30 hadoŭ pracy ŭ ramkach adnaho kalektyvu, kab pryjści da kałabaracyi ŭ jakaści dueta.
«Carnage» zapisali za paru tydniaŭ na studyi ŭ Łondanie padčas łakdaŭnu. Kiejv apisvaje reliz jak «vielmi pryhožuju, ale ŭsio ž brutalnuju płytku, jakaja stała častkaj hramadskaj katastrofy».
Ziemfira — Bordierłajn
Rasijskaja śpiavačka paradavała šmatlikich prychilnikaŭ pieršym za 8 hadoŭ poŭnafarmatnym albomam.
Vialikaje bačycca na adlehłaści, tym bolš u vypadku z tvorcami maštabu Ziemfiry ludzi schilnyja pierabolšvać svaje čakańni.
I nakolki sama Ziemfira poŭnaja supiarečnaściaŭ, tak i jaje tvorčaść vyklikaje vialiki dyjapazon absalutna roznych mierkavańniaŭ i reakcyj: ad abvinavačvańniaŭ u płahijacie vokładki — da vodhukaŭ pra hienijalnaść «Bordierłajna».
Balthazar — Sand
Kab adyści ad sprečak nakont alboma Ziemfiry, možna pasłuchać piaty albom bielhijskich indy-rokieraŭ Balthazar.
Jany zrabili svoj saŭnd jašče bolš pavietranym, źniziŭšy hitarny ŭpłyŭ. U vyniku atrymaŭsia albom, słuchajučy jaki vielmi pryjemna sustrakać viasnu.
Altin Gün — Yol
Hety hurt hraje ŭ styli «anatalijski rok» — jon utvaryŭsia ŭ Turcyi ŭ 70-ch šlacham źmiašeńnia tradycyjnaj muzyki z rokam pad upłyvam Led Zeppelin, The Beatles i The Rolling Stones.
U 2018-m hałandski bas-hitaryst Jaśpier Fierchulst raźmiaściŭ u fejsbuku abviestku z naboram muzykantaŭ, kab pasprabavać hrać anatalijski rok. Tak źjaviŭsia hurt Altin Gün, a ich pieršy albom byŭ naminavany na Hremi.
A1 Xplore Music ad Deezer — heta 73 miljony piesień, tysiačy padkastaŭ i aŭdyjaknih, a taksama mahčymaść słuchać muzyku biez raschodu mabilnaha trafiku i afłajn.
