U Pieršamajskim sudzie Minska zakančvajecca razhlad kryminalnaj spravy suprać ułaśnika firmy «Pierśpiektyva-InviestBud»/«BranskŽyłBud» Siarhieja Dziemčuka. Jaho abvinavačvajuć u machlarstvie ŭ asabliva bujnym pamiery. Firma Dziemčuka sabrała amal 10 miljonaŭ dalaraŭ u biełaruskich rublach na budaŭnictva troch šmatpaviarchovikaŭ kala aŭtavakzała «Maskoŭski». Ale ŭ vyniku nivodnaj kvatery tak i nie pabudavali. I ciapier jamu pahražaje da dziesiaci hadoŭ turmy. Vychodzić, pa hodzie za kožny atrymany miljon dalaraŭ.

Taćciana zapłaciła $50 tysiač za adnapakajoŭku ŭ adnym z hetych damoŭ pa kursie šaścihadovaj daŭniny. Siońnia suma značna mienšaja.
Jana pracuje ŭ ryełtarskaj firmie, dzie ŭ 2006 i ŭbačyła rekłamku prajekta. «Ja nikoli nie dumała, što ŭ takoj zakonnaj dziaržavie... Ja tamu i pierajechała z Rasii, bo tam — biasčynstva», — kaža žančyna. Praz hetuju situacyju ŭ jaje razvaliłasia siamja.
Firma Siarhieja Dziemčuka ŭ 2004 vyjhrała tendar. Jana abaviazałasia ŭźvieści novy budynak mieteacentra za horadam i zakupić dla jaho abstalavańnie.
Za heta firmie addavali pad budaŭnictva damoŭ učastak za Maskoŭskim aŭtavakzałam. Praz hod užo pačali šukać dolščykaŭ, patrabujučy ad ich stapracentnuju pieradapłatu. 128 čałaviek zhadzilisia.

Tolki čas išoŭ, a nijakaha budaŭnictva nie viałosia. Jak vyjaviła pravierka Kamiteta dziaržkantrolu, hrošy zabudoŭščykaŭ byli pieraviedzienyja na rachunki inšych firmaŭ, zasnavalnikam ci suznasnavalnikam jakich źjaŭlaŭsia Dziamčuk. I nakiravanyja na inšyja prajekty.

Dzivosy z damami za aŭtavakzałam pačalisia ŭžo ŭ dzień zaklučeńnia damovaŭ.
Alena dvojčy «pahareła» na hetych kvaterach. Siamja akurat atrymała spadčynu z­za miažy, kali daviedałasia pra prajekt «Pierśpiektyvy-InviestBuda». Vyrašyli abiedźvium dočkam pabudavać pa kvatery. Kali ŭ adnoj dački kvadratny mietr žytła kaštavaŭ amal 1000 dalaraŭ, to ŭ druhoj — 2000. A zaklučalisia damovy ŭ adzin dzień. Tolki paśla telefanavańniaŭ i paprokaŭ sumu pamienšyli da 1600. Žančyna kaža, što ceny bralisia z hałavy i nie byli ničym abhruntavanyja.
Pieršy sud nad Siarhiejem Dziemčukom adbyŭsia letaś. Spravu inicyjavaŭ Departamient finansavych rasśledavańniaŭ KDK.
Dziemčuka abvinavacili va ŭčynieńni majomasnaj škody biez prykmiet kradziažu. U pracesie vystavili novaje abvinavačvańnie — machlarstva. Biznesoviec ža zajaviŭ, što jon byŭ tolki ŭłaśnikam firmy, ale nie kiraŭnikom. A tamu nie moh rasparadžacca hrašyma. U vyniku jaho apraŭdali. Pavodle sudździ, nie byŭ dakazany kradziež hrošaj i ich niametavaje vykarystańnie. Maŭlaŭ, heta abjektyŭnyja pryčyny, ryzyka ŭ viadzieńni biznesu. Bieź źmienaŭ prysud pakinuli i paśla razhladu kasacyjnaj skarhi.

26 čałaviek, jakija razarvali damovy i patrabavali viarnuć hrošy praz sud, atrymali ich. Ale z ulikam apošniaj devalvacyi vartaść tych sum utraja źmienšyłasia. I siońnia jany chočuć, kab im vypłacili roźnicu. Ale bolšaść dolščykaŭ zastałasia i biez kvater, i biez hrošaj. Adzin mužčyna pamior navat. Daktary vyjavili ŭ jaho rak. Adzinaj nadziejaj była apieracyja ŭ Hiermanii. Ale patrabavalisia hrošy. Mužčyna vyrašyŭ admovicca ad kvatery, a hrošy puścić na apieracyju. Nie dačakaŭsia.

Клас
0
Панылы сорам
0
Ха-ха
0
Ого
0
Сумна
0
Абуральна
0

Chočaš padzialicca važnaj infarmacyjaj ananimna i kanfidencyjna?