Facebook, najbujniejšaja sacyjalnaja sietka ŭ śviecie, u jakoj zarehistravanyja kala miljarda čałaviek, zajaviła pra svaje płany abjadnać asabistuju infarmacyju karystalnikaŭ z fotaservisam Instagram. Heta dazvolić stvarać abjadnanyja akaŭnty z vykarystańniem baz dadzienych abodvuch servisaŭ.

Padobny krok užo zrabiła miehakarparacyja Google, kali ŭnifikavała bazu dadzienych karystalnikaŭ dla ŭsich svaich servisaŭ: zaraz karystalnikam Gmail, YouTube, Google+ patrebny usiaho adzin akaŭnt.

Facebook zaŭpeŭnivaje, što taki zachad dapamoža palepšyć servisy jak samoj sacyjalnaj sietki, tak i jaje padradzialeńniaŭ kštałtu Instagram, jaki kalifarnijskaja kampanija nabyła ŭ kastryčniku za 715 młn dalaraŭ.

Ale abaroncy pryvatnaści infarmacyi nie zadavolenyja rašeńniami karparacyj. Tak, Google była žorstka raskrytykavana ŭ ZŠA i ES praz toje, što ŭvodzić karystalnikaŭ u padman i nie harantuje tajamnicu pryvatnaha žyćcia. U krasaviku Fiederalnaja handlovaja kamisija ZŠA taksama źvinavaciła Facebook u tym, što kampanija prymušaje karystalnikaŭ dzialicca ź joju našmat bolšym abjomam pryvatnaj infarmacyi, čym jany płanavali. Supiarečnaści byli ŭrehulavanyja, i Facebook pahadziłasia pytacca karystalnikaŭ pry źmienie ŭmovaŭ pryvatnaści, a taksama prachodzić niezaležnyja pravierki ciaham nastupnych 20 hadoŭ.

U hety ž čas abjadnańnie profilaŭ Facebook i Instagram — nie adzinaja značnaja źmiena, jakuju zapłanavała Facebook. Kampanija taksama žadaje źniać u karystalnikaŭ sacsietki mahčymaść kantralavać koła asobaŭ, jakija mohuć listavać im.

Ciapier prapanavanyja źmieny adkryty dla publičnaha kamientavańnia. U tym vypadku, kali kolkaść kamientaroŭ dasiahnie 7 000, aŭtamatyčny servis zapuścić hałasavańnie siarod karystalnikaŭ. Ale raniej Facebook taksama kazała, što hałasavańnie moža być źmieniena na niejki inšy miechanizm zvarotnaj suviazi, bo dla pryniaćcia źmienaŭ nieabchodny ŭdzieł nie mienš jak 30% karystalnikaŭ servisu, ale dva papiarednija razy «jaŭka» nie dasiahała hetaha ŭzroŭniu.

Instagram — biaspłatny servis abmienu fotazdymkami, jaki dazvalaje karystalnikam rabić fotazdymki z dapamohaj mabilnych pryładaŭ (smartfonaŭ, płanšetaŭ, h.d.), chutka apracoŭvać ich dy zahružać u sieciva. Karystalniki Instagram dazvalaje sačyć za abnaŭleńniami svaich «siabroŭ», kamientavać i «łajkać» ich. Fota, zroblenaje ŭ Instagram, možna aŭtamatyčna «zapościć» u Facebook, Twitter, Tumblr, Flickr. Siarod aktyŭnych karystalnikaŭ Instagram — šmat znakamitaściaŭ: servis daje mahčymaść «pabačyć» žyćcio vačami Dženifier Łopes, Viktoryi Azaranki, Siarhieja Hudzilina.

Клас
0
Панылы сорам
0
Ха-ха
0
Ого
0
Сумна
0
Абуральна
0

Chočaš padzialicca važnaj infarmacyjaj ananimna i kanfidencyjna?