A niekali ž kłasičnych jeŭrapiejskich amletaŭ na našych ziemlach, badaj, nie hatavali, hałoŭnymi stravami ź jajek byli voś hetyja — hrybki i dračony. Heta amal adno i toje ž, ale dračona — bolš charakternaja dla Rusi, a hrybok — dla Litvy. Štości siaredniaje pamiž amletam i blinami — i na smak, i na vyhlad. Jašče niekatoryja stravy z hetaj katehoryi čymści padobnyja da italjanskaj frytaty (frittata, amlet z načynkaj). Prynamsi, kali vy chočacie paekśpierymientavać z całkam sučasnaj, ale z tradycyjnymi tutejšymi načynkami frytataj, dyk ja b raiŭ jaje nazvać pa tradycyi hrybkom. Recepty tradycyjnych litoŭskich hrybkoŭ možna znajści ŭ «Kucharcy litoŭskaj» Vincentyny Zavadskaj, a taksama ŭ nastalhičnych natatkach emihrantaŭ-«kresaviakaŭ» i ich naščadkaŭ, naprykład, tut.

Bazavy recept hrybka dosyć prosty: vam spatrebiacca 3 šklanki małaka, 7 jajek, 1,5 st. łyžki śmietankovaha masła, 2 šklanki muki, trochi soli. Uźbić razam małako, jajki, łyžku toplenaha masła, zasypać muku, kab atrymałasia ciesta trochi huściejšaje, čym na naliśniki, staranna pieramiašać (raścierci kamiaki). Nalić pryhatavanaje ciesta na vialikuju patelniu, dobra zmazanuju alejem (nie vielmi vysokim słojem) i pastavić u papiarednie razahretuju duchoŭku, zapiakać na nie vielmi vysokaj tempieratury, 140–150 S. (Kali ciesta atrymałasia zašmat, lepš padzialić jaho na 2 porcyi i zapiačy asobna). Kali ŭtvorycca zapiečanaja skarynka, pakłaści ŭhary niekalki kavałkaŭ masła i zapiakać jašče 5–10 chvilin.

Niekali hrybki spažyvali nie tak jak samastojnuju stravu, jak kroili ich na nievialičkija kavałki i jeli jak zakusku da supoŭ (polivak).

Blizki da hrybkoŭ typ stravy — dračona. U joj, badaj, praporcyja muki i jajek bolš ssunutaja ŭ bok muki, a časam zamiž muki moža ŭžyvacca i tarkavanaja bulba, što radnić hety vid dračony sa zvykłymi dranikami.

Niekatoryja sučasnyja kulinary-ekśpierymientatary navat navučylisia hatavać takuju dračonu ŭ elektronnaj chlebapiečcy.

Ale, viadoma, takaja dračona ŭžo dosyć dalokaja ad hrybka i tym bolej ad amletu abo frytaty. Šmat uvahi biełaruskaj dračonie addaŭ viadomy kulinarny piśmieńnik V. Pachlobkin, i chacia časam jahonyja mierkavańni pra biełaruskuju kuchniu vielmi sprečnyja, jahonym študyjam dračony možna ŭ cełym daviarać. Dyk voś, sapraŭdnuju biełaruskuju dračonu, pavodle Pachlobkina, robiać z žytniaj muki (časam z dadatkam jačmiennaj, pšaničnaj abo hračanaj) i z asablivaha ciesta — «utornaha», h.zn. takoha, jakoje nie całkam padyšło, a tolki trochi zakisła — ale biez draždžej. Kali «ŭtornaj kisłaty» brakuje i ciesta zakisaje marudna, možna dadać u jaho trochi kvasu abo małočnaj syrovatki. Dračony, jak i hrybki, zapiakajuć na vielmi słabym ahni — u ideale na lohkim duchu ruskaj piečki. Ale možna na patelni ŭ duchoŭcy abo navat na pavierchni plity. I, darečy, kali ŭziać dračonu, jakaja ŭ Pachlobkina nazyvajecca «haradskoj», jana ŭžo vielmi padobnaja da litoŭskaha hrybka.

Dračona «haradskaja»

kubak małaka, 7 jajek, 1, 5 st. łyžki śmietankovaha masła, 2 šklanki muki, trochi soli.

1,5 šklanki pšaničnaj muki, 10 jaječnych žaŭtkoŭ, 5 jaječnych białkoŭ, 3–4 st. łyžki cukrovaj pudry, 1 šklanka viarškoŭ, 1 st. łyžka śmietankovaha masła («čubataja» abo «z horkaj»), 0,5 łyžački soli.

1. Raścierci žaŭtki z cukram.

2. Pastupova dasypać muku i dalić viarški. Pieramiašać i raścierci ŭ ełastyčnaje ciesta.

3. Pasalić i ŭźbivać ciesta paŭhadziny (oho!).

4. Dadać uźbityja ŭ pienu białki, jašče raz staranna pieramiašać.

5. Na razahretuju patelniu z masłam ulić ciesta, pastavić u dobra razahretuju duchoŭku na słaby ahoń na 15–20 chv.

A voś hrybok ad Paŭła Halankova, siabra Hildyi šef-kucharaŭ Biełarusi

1,5 šklanki pšaničnaj muki, 4 jajki, 1,5 łyžki toplenaha śmietankovaha masła, 0,5 łyžački soli, trochi masła dla zmazki pavierchni (0,5–1 łyžka).

Uźbić razam małako, jajki, muku i toplenaje masła. Raspalić patelniu, zmazać masłam abo alejem i nalić ciesta. Pastavić u duchoŭku pry 180 S na 12 chvilin (ale lepš stavić mienš intensiŭny tempieraturny režym — A.B). Za 2 chv. da hatoŭnaści zmazać hrybok toplenym masłam.

Клас
0
Панылы сорам
0
Ха-ха
0
Ого
0
Сумна
0
Абуральна
0

Chočaš padzialicca važnaj infarmacyjaj ananimna i kanfidencyjna?