Staršyni tryccaci viciebskich tavarystvaŭ nakiravali kalektyŭny zvarot ministru ŽKH, staršyniam abł- i harvykankamaŭ, kiraŭnictvu Dziaržkantrolu i finadździeła Viciebskaha harvykankama.
Jany prosiać razabracca ŭ situacyi, jakaja skłałasia z atrymańniem biudžetnych asihnavańniaŭ za pieršaje paŭhodździe i pryniać udzieł u vyrašeńni pytańnia pa pakryćciu strat za žyllova-kamunalnyja pasłuhi na 2011 h. «Ja mahła b sabrać i bolej podpisaŭ, ale ŭ nas zanadta mała času — napieradzie aciaplalny siezon, — patłumačyła «NN» adna ź inicyjataraŭ zvarotu Viera Kotava, staršynia viciebskaha tavarystva ŭłaśnikaŭ «Junona». —
My daviedzienyja da adčaju — faktyčna da kanca hoda našy supracoŭniki pavinny pracavać biaspłatna».
Pa jaje słovach, haradski finadździeł u čatyry razy skaraciŭ pamier kampiensacyi na kamunalnyja vydatki.

Pavodle zakona, dziaržava častkova kampiensuje vydatki na techničnaje absłuhoŭvańnie terytoryi žyłych damoŭ,
u tym liku i tych, što nie absłuhoŭvajucca arhanizacyjami žyllova-kamunalnaj haspadarki. Da takich adnosiacca i tavarystvy ŭłaśnikaŭ.
Letaś pamier kampiensacyi składaŭ 5550 rubloŭ na 1 kv.m płoščy doma,
što aciaplajecca. Hetyja narmatyvy davodziacca kiraŭnikam tavarystvaŭ pierad pačatkam finansavaha hoda. Sioleta viciebskija tavarystvy daviedalisia pra pamier kampiensacyi na 2011 hod tolki ŭ siaredzinie lipienia. Pavodle słoŭ Viery Kotavaj, tavarystva atrymała ź finadździeła list, u jakim havorycca, što
sioleta kampiensacyja składzie 1000 rubloŭ.
Jana kaža, što
kali hetaja ličba budzie kančatkova zaćvierdžanaja, jaje arhanizacyja, jak i astatnija 120 viciebskich tavarystvaŭ, paŭstanie pierad nieabchodnaściu zvalnieńnia piersanału.
«U nas tut ceły štat pracuje — ad buchhałtara da dvornika». Nie viedajučy pamieraŭ narmatyvu, tavarystva raźličvała vydatki zhodna sa starym taryfam, uličyŭšy rost inflacyi. Ciapier niajasna, chto kampiensuje hetuju roźnicu. A taksama, jak z takimi cenami i kampiensacyjaj padtrymlivać dom i prylehłuju terytoryju ŭ paradku, jak taho patrabuje žyllovy kodeks.

Staršynia «Junony» kaža, što ŭ domie tavarystva žyvuć daloka nie bahatyja ludzi.

«U nas niama kanśjeržaŭ z achoŭnikami, aharodžanych parkovak i videakamier. Tut žyvuć małazabiaśpiečanyja siemji, jakija nabyvali kvatery pa lhotnych kredytach», —
raskazvaje jana. Kali finadździeł nie pierahledzić pamier kampiensacyi, kamunalnyja vydatki aŭtamatyčna lahuć na plečy žycharoŭ. «Jak patłumačyć, čamu jany musiać płacić hetyja hrošy, kali ŭ susiednim domie, jaki absłuhoŭvaje ŽES, nichto ničoha nie płacić?» — pytaje Viera Kotava i apieluje da 22-ha artykuła Kanstytucyi, zhodna ź jakim usie roŭnyja pierad zakonam, majuć adnolkavyja pravy na abaronu svaich intaresaŭ. Jana prapanuje paraŭnać nie tolki z susiednimi damami, ale i ź inšymi haradami. «Pa našych źviestkach, u Viciebskim rajonie pamier kampiensacyi składaje 7200 rubloŭ, u Minsku 8800, a ŭ Pinsku dziejničaje dyfierencyjny padychod — pamier kampiensacyi zaležyć ad uzrostu doma: čym jon starejšy, tym bolšy narmatyŭ».

Staršyniu tavarystva aburaje staŭleńnie da ich prablemy z boku haradskich uładaŭ. «Jak jakuju delehacyju pryvieźci, dyk adrazu da nas, bo tut zaŭsiody prybrana, akuratna, pryhoža. A jak pačali vyśviatlać, čamu nam skaracili vypłaty, to adrazu pryhrazili nasłać na nas pravierki».

Načalnik finansavaha ŭpraŭleńnia Viciebskaha harvykankama Jaŭhienija Barduška paviedamiła karespandentu «NN», što list ad staršyniaŭ tavarystvaŭ jany atrymali i ŭžo padrychtavali adkaz. Jana patłumačyła, što narmatyŭ pa kampiensacyi vydatkaŭ na techabsłuhoŭvańnie farmujecca zhodna zakanadaŭstva, pałažeńniaŭ Žyllovaha kodeksa i ŭ adpaviednaści z mahčymaściami biudžetu.
«U hetym hodzie jon składzie 1000 rubloŭ», — padkreśliła čynoŭnica. Pa jaje słovach, harvykankam całkam kampiensuje vydatki na absłuhoŭvańnie liftaŭ. «Vy zrazumiejcie, što žyllovy fond tavarystvaŭ u bolšaści vypadkaŭ novy, a voś ŭ padparadkavańni kamunalnaj haspadarki traplajucca damy, jakim za 40 hod. Adpaviedna, vydatki na absłuhoŭvańnie novych damoŭ i starych buduć roznyja». Jaŭhienija Ivanaŭna padkreśliła taksama, što ŭ kamunalnych arhanizacyjach dola zarobkaŭ u fondach składaje da 52%, a ŭ tavarystvach da 68%.

Tavarystva ŭłaśnikaŭ — niekamiercyjnaja arhanizacyja, jakaja abjadnoŭvaje ŭłaśnikaŭ pamiaškańniaŭ u šmatkvaternym žyłym domie.

Stvarajecca z metaj sumiesnaha kiravańnia žyłym kompleksam, zabieśpiačeńnia jaho ekspłuatacyi. Pieravaha padobnych arhanizacyj u tym, što ŭdzielniki tavarystvaŭ samastojna farmujuć supolny biudžet na ramont doma i ŭtrymańnie prylehłaj terytoryi.
U novabudoŭlach stvareńnie tavarystvaŭ ułaśnikaŭ abaviazkovaje dla zabudoŭnika.
Ich žychary — takija ž karystalniki kamunałki, jak i tyja, chto žyvie ŭ damach daŭniejšaha času pabudovy i absłuhoŭvajecca ŭ ŽESie.
Клас
0
Панылы сорам
0
Ха-ха
0
Ого
0
Сумна
0
Абуральна
0

Chočaš padzialicca važnaj infarmacyjaj ananimna i kanfidencyjna?