Takija zakliki źjavilisia ŭ sacyjalnych sietkach uviečary ŭ sieradu.
Abmierkavańni narodnych hulańniaŭ, što adbylisia na centralnych płoščach niekalkich dziasiatkaŭ haradoŭ Biełarusi, iduć u sotniach halinak płatformaŭ Vkontaktie i Fejsbuk.
Adny ŭdzielniki abmierkavańniaŭ pazityŭna aceńvajuć akcyju i vykazvajuć mierkavańnie, što kolkaść udzielnikaŭ hulańniaŭ budzie raści. Druhija vykazvajuć dumku, što dla pratestu niama dastatkovych pryčyn abo što pieramieny niemahčymyja.
Zakliki źbiracca na centralnych płoščach haradoŭ, pakul u krainie nie adbuducca palityčnyja i ekanamičnyja pieramieny, stali hučać u sacyjalnych sietkach ad pačatku červienia, paśla narastańnia ekanamičnaha kryzisu.

Kolkaść udzielnikaŭ takich hulańniaŭ 15 červienia vyrasła ŭ niekalki razoŭ, ale ni ŭ adnym z rehijanalnych centraŭ nie pieravysiła tysiačy.

Pry hetym udzielniki prajaŭlali ciarplivaść i vysokuju samaarhanizacyju. Jany nie vychodzili na prajeznuju častku, nie ŭstupali ŭ kanflikty z supracoŭnikami milicyi.

U Minsku ludzi ruchalisia pa tratuarach tymi maršrutami, jakija rekamiendavalisia na schiemach, zahadzia źmieščanych u sacyjalnych sietkach na vypadak błakavańnia centralnaj płoščy.
I ŭ Minsku, i ŭ rehijanalnych haradach udzielniki spakojna ŭsprymali zatrymańni. «Nu što ty zrobiš? Ja choć takim sposabam daniasu toje, što chaču skazać. Druhoha sposabu niama. Apošnija haziety zakryvajuć», — skazała reparcioru «Našaj Nivy» žančyna siarednich hadoŭ na pytańnie, ci nie tryvožyć jaje mahčymaść zatrymańnia.

15 červienia ŭ dziesiaci haradach krainy zatrymali nie mienš za 140 čałaviek. Pavodle papiarednich źviestak, ich adpuskali biez składańnia pratakołaŭ.

Zakliki da aŭtamabilistaŭ źjazdžacca ŭ centry haradoŭ u znak salidarnaści stali reakcyjaj na toje, što mnohija mašyny sihnalili ŭ padtrymku ludziej na tratuarach.
Tamu aktyvisty publikujuć ich pad słohanami «Pasihnal» ci «Aŭta-stop».

Prakuratura ŭ aŭtorak, a milicyja ŭ sieradu zaścierahli hramadzian ad udziełu ŭ «niesankcyjanavanych» akcyjach pratestu, choć i nie kankretyzavali, u jakich. Aficyjnaja prapahanda całkam daminuje ŭ ŚMI Biełarusi, ale praktyčna nie pranikaje ŭ sacyjalnyja sietki.

Клас
0
Панылы сорам
0
Ха-ха
0
Ого
0
Сумна
0
Абуральна
0

Chočaš padzialicca važnaj infarmacyjaj ananimna i kanfidencyjna?