DAI HUUS Minharvykankama doŭhi čas admaŭlałasia skazać, chto znachodziŭsia za rulom darahoha aŭtamabila, choć na forumach vidavočcy śćviardžali, što kiravaŭ «Bentli-Kantynientalem» Michaił Zacharaŭ, jaki da taho ž byŭ absalutna pjanym.

Tym časam hrudźmi na ambrazuru lehła dziaŭčyna sknadalnaha treniera. Jana zajaviła, što za rulom była jana. Paśla hetaha DAI vymušanaje było ŭžo dać aficyjnyja tłumačeńni i zajavić, što ŭsio ž za rulom znachodziŭsia mužčyna 1962 hoda naradžeńnia. Praŭda, u DAI admovilisia nazvać proźvišča vinavataha ŭ DTZ i skazać, ci byŭ jon pjany (DAI maje praviła nie razhałošvać asabistych źviestak). Była tolki abvieščanaja infarmacyja, jakaja paćviardžała, što kiroŭca «Bentli-Kantynientala» ź miesca zdareńnia nie ŭciakaŭ.

Internet-vydańniu «Ježiednievnik» udałosia atrymać aficyjnyja dakumienty,

u jakich karotka i jasna apisana, što adbyłosia z elitnaj mašynaj, chto siadzieŭ za rulom i ŭ jakim jon byŭ stanie.

Pavodle dakumientaŭ DAI, za rulom «Bentli-Kantynientala», darečy, całkam novaha — 2011 hoda vypusku — znachodziŭsia nie chto inšy, jak Michaił Zacharaŭ. Pry hetym pa vonkavych prykmietach jon sapraŭdy znachodziŭsia ŭ apjanieńni. Pakolki dźvie aŭtamašyny atrymali tolki miechaničnyja paškodžańni i nichto ź ludziej nie paciarpieŭ, supracoŭniki DAI prapanavali Michaiłu Zacharavu prajści miedycynski ahlad. Ale znakamity trenier admoviŭsia heta zrabić, na što mieŭ poŭnaje prava. Pa zakonie abaviazkovy miedycynski ahlad kiroŭcy ažyćciaŭlajecca tolki ŭ tych vypadkach, kali ŭ DTZ jość paciarpiełyja. Adnak Kodeksam ab administracyjnych pravaparušeńniach admova ad miedycynskaha ahladu kvalifikujecca taksama jak kiravańnie transpartam u stanie apjanieńnia.

Mienavita tamu ŭ dačynieńni da Michaiła Zacharava byli składzienyja dva administracyjnyja pratakoły.

Pieršy pratakoł pa art. 18.16, p.1 (Kiravańnie transpartnym srodkam asobaj, jakaja znachodzicca ŭ stanie ałkaholnaha apjanieńnia abo ŭ stanie, vyklikanym užyvańniem narkatyčnych srodkaŭ, psichatropnych, taksičnych abo inšych adurmańvalnych rečyvaŭ, abo pieradača kiravańnia transpartnym srodkam takoj asobie, a taksama admova ad prachodžańnia va ŭstanoŭlenym paradku pravierki (ahladu) na pradmiet vyznačeńnia stanu ałkaholnaha apjanieńnia abo stanu, vyklikanaha ŭžyvańniem narkatyčnych srodkaŭ, psichatropnych, taksičnych abo inšych adurmańvalnych rečyvaŭ) KAP Biełarusi.

Hety artykuł praduhledžvaje pakarańnie pazbaŭleńniem pravoŭ kiravańnia transpartnym srodkam da troch hadoŭ.

Druhi pratakoł u dačynieńni da Michaiła Zacharava byŭ składzieny pa art. 18.22 p.5 (Parušeńnie asobaj, jakaja kiravała transpartnym srodkam, inšych praviłaŭ darožnaha ruchu, akramia parušeńniaŭ, praduhledžanych artykułami 18.12–18.16, 18.19–18.21 hetaha Kodeksa i častkami 1–4 hetaha artykuła) KAP Biełarusi.

U vyniku atrymlivajecca,

što fakt znachodžańnia Michaiła Zacharava za rulom u pjanym vyhladzie aficyjna zafiksavany nie byŭ, ale jaho dziejańni ŭsio roŭna byli acenienyja pa adpaviednym artykule KAP Biełarusi.
Adsiul robicca zrazumieła, čamu dziaŭčyna kinułasia abaraniać znakamitaha treniera. Vidavočna, u inšym stanie, čym Michaił Zacharaŭ, jana mahła lohka prajści miedahlad i nie bajacca surjoznaj adkaznaści.
Клас
0
Панылы сорам
0
Ха-ха
0
Ого
0
Сумна
0
Абуральна
0

Chočaš padzialicca važnaj infarmacyjaj ananimna i kanfidencyjna?