Navukoŭcy adnavili abličča čałavieka, jaki žyŭ u Jeŭropie miž 3365 i 3118 hodam da našaj ery.

U 1991 hodzie jaho mumiju, umierzłuju ŭ lod, vypadkova adšukali niamieckija turysty ŭ ledaviku Šnalstal u Alpach. Spačatku jany padumali, što heta chtości ź mienš ščaślivych sučaśnikaŭ. Adnak vyklikanaja palicyja zapadozryła niaładnaje, śledam pryjechali navukoŭcy i achnuli: heta była ŭnikalnaja ŭdača. Pobač ź ciełam zachavalisia rečy i zbroja, na ciele — takaja-siakaja vopratka, u straŭniku — pareštki ježy. Historyki atrymali mahčymaść daviedacca mnoha novaha pra žyćcio ludziej 5300 hadoŭ tamu.

Stan zachavanaści mumii dazvoliŭ navat pravieści rasśledavańnie pryčynaŭ śmierci Ledzianoha čałavieka (abo Otcy Ajsmana), jak jaho ŭmoŭna nazvali. Pavodle adnoj viersii, jon byŭ zabity (pra heta śviedčyli paškodžańni cieła, taksama na jaho skury znajšli ślady čužoj kryvi, nibyta jon doŭhi čas nios paranienaha tavaryša). Pavodle inšaj viersii, jon zahinuŭ raniej i byŭ pachavany ŭ ledaviku, adnak padčas abvału cieła absunułasia našmat nižej pa schile.

Cikava, što na skury Ajsmana byli vyjaŭlenyja prymityŭnyja tatuiroŭki.

Da 20-hodździa ad času znachodki čałavieka Miednaha vieku, było vyrašana adnavić jaho abličča z vykarystańniem samych novych kryminalistyčnych technałohij. Rekanstrukcyi rabilisia i raniej, adnak byli jany bolš ramantyzavanymi. Hetaja padajecca najbolš realistyčnaj:

tak vyhladajuć badziahi, što viedajuć choład, hoład i biadu. Jakraz takim i było žyćcio Otcy Ajsmana.

Vynik pracy hałandskich śpiecyjalistaŭ — trochvymiernuju rekanstrukcyju — možna bačyć u archieałahičnym muziei ŭ Balcana (Italija). Jaje prezientacyja adbyłasia 28 lutaha.

Taksama da 20-hodździa znachodki navukoŭcy abiacajuć apryludnić rasšyfravanyja dadzienyja DNK Ajsmana. Pakul viadoma tolki toje, što

naščadkaŭ Ledzianoha čałavieka nie zachavałasia.
A raniej navat uźnikali sprečki miž niemcami i italjancami — čyj prodak byŭ znojdzieny ŭ pamiežnaj zonie. Adnak jaho hienom nie supadaje ź nivodnym varyjantam hienomaŭ sučasnych jeŭrapiejcaŭ.
Клас
0
Панылы сорам
0
Ха-ха
0
Ого
0
Сумна
0
Абуральна
0

Chočaš padzialicca važnaj infarmacyjaj ananimna i kanfidencyjna?