...pierakusvać
Snekami nazyvajuć lohkija zakuski — šakaładki, čypsy, areški, sucharyki, hłazuravanyja syrki. Vidavočna, što ich lohkaść — paniaćcie adnosnaje, bo pa kolkaści kałoryj niekatoryja ź ich mohuć zamianić paŭnavartasny abied. Dyjetołahi ŭpeŭnienyja ŭ tym, što pamiž kulturaj fastfudu i lišniaj vahoj isnuje pramaja suviaź: lišak kałoryj pry niedachopie karysnych i bałastnych rečyvaŭ pryvodzić da takich niehatyŭnych nastupstvaŭ, jak parušeńnie abmienu rečyvaŭ, dyjabiet, adkładańnie chalesterynu ŭ sasudach. Śpiecyjalisty rekamiendujuć zrabić pierakus častkaj štodzionnaha racyjonu. U takim vypadku my budziem havaryć pra drobnaje charčavańnie, sutnaść jakoha zaklučajecca ŭ tym, kab ježa pastupała ŭ arhanizm praz peŭny čas.
Aptymalny intervał — praz kožnyja try hadziny.
Naprykład, lohki śniadanak, abied abo viačera ź pierakusami pamiž imi, jakija składajucca z sadaviny, zialeniva, kiefiru abo niatłustaha tvarahu.
...nie jeści paśla 18.00
Kliničnaja praktyka pakazvaje, što ŭstrymańnie ad ježy paśla šaści viečara daje dobry vynik u spravie źnižeńnia vahi. Dyj tym, chto zakłapočany nie stolki vahoj, kolki zdaroŭjem naohuł, lepiej viačerać nie paźniej čym za čatyry hadziny da snu. Inakš nas čakaje i drennaje pieratraŭlivańnie — pakolki nočču ŭsie pracesy žyćciadziejnaści zapavolvajucca, i drenny son.
...nie chapać haračaje
Idealnaja dla pieratraŭlivańnia tempieratura ježy — kala 40 hradusaŭ, padobnaja na tempieraturu cieła. Tady ŭsie stravavalnyja pracesy aptymizujucca. Nadta haračaja ježa — škodnaja, jaje
maksimalnaja tempieratura moža być nie vyšej za 62 hradusy.
...nalahać na supy
Vielmi karysnyja dla stravavańnia supy. Jany lohka zasvojvajucca, jak praviła, składajucca z harodniny, nizkakałaryjnyja. Supy ŭ štodzionnym racyjonie — prafiłaktyka atłuścieńnia, jakoje, pavodle prahnozaŭ, pahražaje stać pavalnym.
...nie zapivać
Varta raźvitacca sa zvyčkaj zapivać ježu. Kali my pjom vadu, čaj ci inšyja napoi padčas jady, my tym samym źnižajem kancentracyju straŭnikavaha soku. Ježa značna daŭžej pieratraŭlivajecca, horš zasvojvajecca. Hetaha možna paźbiehnuć — zrabić nievialikuju paŭzu, z paŭhadziny, pamiž užyvańniem ježy i čajem.
...źbiracca siamjoj
Jašče śpiecyjalisty rajać nie zabyvacca na dadatkovy sens pryniaćcia ježy. Jana pavinna nasyčać nie tolki cieła, ale i dušu. Tamu varta prynamsi raz u dzień zabiaśpiečyć sabie paŭnacenny abied ci viačeru, kali ježa budzie pahłynacca nie na biahu, a siarod blizkich, za sierviravanym stałom.
