Takim čynam redaktary spadziajucca adnavić jaho vychad.

Paśla amal hadavoha pierapynku choča adnavić rehularny vychad adno z samych papularnych biełaruskich histaryčnych peryjadyčnych vydańniaŭ — časopis «Spadčyna». Pra heta paviedamiŭ hałoŭny redaktar časopisa Alaksiej Chadyka.

Adna ź niamnohich volnych trybunaŭ dla humanitaryjaŭ — časopis «Spadčyna» — letaś apynułasia pad pahrozaju źniknieńnia. Finansavyja prablemy nie dazvolili vydavać časopis rehularna: u 2009-m «Spadčyna» vyjšła da čytačoŭ tolki adzin raz,

da kanca 2010-ha redakcyja abiacaje vydać taksama adziny sioletni numar.

Z nastupnaha ž hodu raniejšaja peryjadyčnaść časopisa adnovicca, — kaža hałoŭny redaktar Alaksiej Chadyka:

«Ja mieŭ sustreču, abmiarkoŭvajučy hetuju prablemu, ź ministram kultury Paŭłam Łatuškam. Jon prapanavaŭ skłaści da jaho adpaviedny list paśla prezydenckich vybaraŭ. I tady budzie razhledžana pytańnie pra toje, što „Spadčyna“ budzie pierarehistravana, ale budzie jana pierarehistravana jak časopis napałovu niedziaržaŭny, heta značyć — pa-raniejšamu zasnavalnikam budzie centar „Supolnaść“, i napałovu zajaŭleny jakoj-niebudź strukturaj Ministerstva kultury».

Spadar Chadyka zaznačyŭ pry hetym, što niepasrednaj finansavaj dapamohi ad dziaržavy «Spadčyna» nie atrymaje i tamu zachavaje niezaležnaść redakcyjnaje palityki. Adnak Chadyka spadziajecca takim čynam atrymać ofis pa lhotnaj canie i spryjańnie dla viartańnia ŭ padpisny katałoh.

«My chočam pierajści, pa-pieršaje, u kalarovy farmat. Heta budzie ŭžo narmalny eŭrapiejski časopis narmalnaha eŭrapiejskaha farmatu», — dzielicca jon svaimi marami.

Pieršy abnoŭleny numar vyjdzie ŭ sakaviku.

Jahonaja tema — «Ałchimija, historyja i navuka ŭ biełaruskaj kultury». Nastupnyja dva buduć pryśviečanyja adpaviedna 415-m uhodkam Bieraściejskaj unii i pamiaci historyka Paŭła Łojki.

Клас
0
Панылы сорам
0
Ха-ха
0
Ого
0
Сумна
0
Абуральна
0

Chočaš padzialicca važnaj infarmacyjaj ananimna i kanfidencyjna?