U Babrujsku na 86-m hodzie žyćcia pamior najstarejšy hramadzki aktyvist horadu Michaił Miaziak. Jon byŭ adnym z zasnavalnikaŭ miascovaha nacyjanalna-demakratyčnaha ruchu. U 1989 hodzie braŭ udzieł u pieršym Vilenskim źjeździe Biełaruskaha Narodnaha Frontu «Adradžeńnie». Jaho siabram zastaŭsia nazaŭždy.

Michaił Alaksandravič Miaziak naradziŭsia 15 lutaha 1924 hodu ŭ Zachodniaj Biełarusi, na adnym z chutaroŭ Baranavickaha pavietu.

Za Polščaj, jak jon sam pra siabie kazaŭ, skončyŭ siamihodku i himnaziju kniazia Radziviła ŭ Niaśvižy. Potym pastupiŭ u kaledž u Varšavie, što ŭratavała ad savieckich represijaŭ. Siamju Saviety raskułačyli j sasłali ŭ Sybir. U Varšavie jaho zaśpieła Druhaja ŭsiaśvietnaja vajna.

Vajavaŭ u savieckim vojsku. Mieŭ bajavyja ŭznaharody
.

Pa vajnie pracavaŭ jurystam u strukturach unutranych spraŭ. Z pačatkam pierabudovy schiliŭsia da biełaruščyny. Ad taho času pobač z bajavymi ŭznaharodami nasiŭ i bieł-čyrvona-bieły značok.

«U Babrujsku ŭ nacyjanalna-demakratyčnym ruchu heta była postać numar adzin. Hety čałaviek zasnoŭvaŭ u horadzie Biełaruski Narodny Front. Hety čałaviek — prykład addanaści idei, jakoha nie cikavili vuzka karparatyŭnyja asabistyja intaresy. Heta čałaviek, jaki dumaŭ pra krainu, mienavita pra biełaruskuju budučyniu našaj krainy», kaža pra niabožčyka Aleś Čyhir.

Maładoje pakaleńnie frontaŭcaŭ nazyvała Michaiła Alaksandraviča pa-svojsku — dziedam.

Jon nie nazalaŭ moładzi padkazkami, jak žyć, jak rabić — najpierš byŭ im siabram:

«Michaił Alaksandravič byŭ prykładam mužnaści, enerhičnaści dy aptymizmu. Da apošnich svaich dzion jon vybiraŭsia ŭ horad i ahitavaŭ ludziej. Było cikava pačuć pra jaho frantavyja hady, jak jon pad tankam try dni lažaŭ uzimku, kali pad Stalinhradam byŭ. Na ŭsich schodach maładyja siabry viedali, što jon zaŭždy prymie naš bok, padtrymaje našyja idei i prapanovy», zaznačaje frontaŭski aktyvist Siarhiej Łacinski.

Apošni schod, u jakim braŭ udzieł Michaił Miaziak, byŭ pryśviečany farmavańniu inicyjatyŭnaj hrupy tady jašče pretendenta na prezydenctva Ryhora Kastusiova. Palityk zhadvaje:

«Jon zadavaŭ pytańni: „Ci hatovy ja zmahacca da kanca?“ Jon kazaŭ, što treba iści da ludziej. Mnie vielmi pryjemna, što ŭdzielnik pieršaha źjezdu BNF zastaŭsia na svaim pastu da kanca. Ja jaho viedaŭ jak ščyraha biełarusa, ščyraha prychilnika biełaruskaści, ščyraha prychilnika biełaruskaha hramadztva».

Pachoviny Michaiła Miaziaka adbuducca ŭ aŭtorak.

Rodnyja abrali miescam apošniaha jaho spačynu mohiłki ŭ pasiołku Biarezavičy, što pad Babrujskam.

Клас
0
Панылы сорам
0
Ха-ха
0
Ого
0
Сумна
0
Абуральна
0