Fota Alesia Pileckaha.
U savieckija časy sa słovam «chleb» spałučalisia dva prymietniki: «učorašni» ci «siońniašni». Heta byli abo palanica, abo «brykiecik» — toj samy brykiecik, jaki ciapier šmat kamu padajecca smačniejšym za ŭsie astatnija. Ciapier ža majem chlaboŭ — na vybar.
Turysty biełaruskim čornym chlebam zachaplajucca, asabliva pradukcyjaj staličnych piakarań.
Jak patłumačyła nam hałoŭny technołah «Minskchlebprama» Nina Łuščyk, usie siem chlebazavodaŭ Minska majuć svoj asartymient.
Samyja papularnyja sarty chleba na siońnia: «Vodar», «Naračanski» i «Majski». Jany roznyja pa svaich smakavych jakaściach, ale nie nadta darahija — hetym i tłumačycca ich papularnaść. A taksama tym, što receptura ich źbirałasia pa vioskach, tamu, naprykład, «Naračanski» sami chlebapioki nazyvajuć «babčynym». Darečy, jon ža — adzin ź pieršych zavarnych chlaboŭ, što pačali pradukavacca ŭ Biełarusi. Inšy — dosyć śpiecyfičny «Baradzinski», jaki taksama paśpieŭ nabyć šmat amataraŭ.
Što tyčycca chleba «z razynkaj» (tut u pieranosnym sensie), to i vybar takoha ŭ nas bahaty. Kožny choć raz kuplaŭ «Trajecki» chleb. Jon adnosicca da chlaboŭ desiertnaha typu — jość varyjanty z kurahoj, razynkami i arechami. Taki chleb raźličany nie na ŭžyvańnie razam z supam. Chutčej «samadastatkovy» chleb, jaki možna padavać da harbaty. Darečy, niadaŭna źjaviŭsia «Trajeckičempijon» z kunžutam i nasieńniem słaniečnika, lonu i harbuza.
Kali razmova zajšła pra chleb da harbaty, sam saboj uzhadaŭsia tastavany chleb, a taksama znakamity mif, što ad jaho možna vielmi chutka rastaŭścieć. Tak, u tostavy chleb dadajuć toj samy «palapšalnik», što i ŭ Jeŭropie. Heta roźnić jaho ad zvykłaha chleba. Ale, kab nie taŭścieć, treba prosta viedać mieru ŭ jaho pajadańni.
Čym ździvić haściej
Pra biełaruski chleb u susiednich krainach viedajuć. Voś top-3 śpiecyfičnych chlaboŭ, jakimi možna pryjemna ździvić zamiežnika.
1. «Radziviłaŭski» — chleb sa šmatlikimi dabaŭkami, u recepturu jakoha ŭvachodziać try najmieńni kvasu. Pamier bochana i vaha hetaha chleba ŭražvaje — 2,4 kiłahrama. Isnuje ŭ suvienirnym pakunku z familnym hierbam Radziviłaŭ. Hety zavarny chleb možna jeści i jak harnir, i jak asobnuju stravu. Jon smačny i ŭ buterbrodach. Jaho važnaja asablivaść — zastajecca śviežym dva tydni.
2. «Jubilarny» — jašče adzin chleb, recept jakoha byŭ pryviezieny ź vioski. Hatujecca jon na klanovym liście, ad hetaha maje śpiecyfičny prysmak i daskanała pasuje da mnohich stravaŭ, asabliva supoŭ biełaruskaha typu.
3. «Viaskovy z sałam». Što ŭ im niezvyčajnaha, zrazumieła z nazvy. Heta ciažki, ale vielmi sytny chleb, jaki chlebapioki nazyvajuć «mužčynskim», — padjasi takoha zranku, i da viečara chodziš syty.
Samyja papularnyja chlaby ŭ Minsku
- «Vodar»
«Naračanski»
«Majski»
Top-3 śpiecyfičnych chlaboŭ
- «Radziviłaŭski»
«Jubilarny»
«Viaskovy z sałam»