Archieołahi znajšli ŭ Viciebskaj vobłaści astatki staražytnaha pasielišča vikinhaŭ, što dakazvaje, što pradstaŭniki nazvanaha naroda žyli na terytoryi Biełarusi.

Pra heta paviedamiła zahadčyca Centra historyi daindustryjalnaha hramadstva Instytuta historyi NAN Biełarusi doktar histaryčnych navuk Volha Laŭko.

Subiasiednica nie ŭdakładniła, dzie mienavita znojdzieny astatki pasielišča, rastłumačyŭšy, što dalejšamu daśledavańniu hetaj terytoryi mohuć pieraškodzić «čornyja kapalniki».

Volha Laŭko raskazała, što ŭ čas raskopak byli znojdzieny elemienty zbroi i bytavyja pradmiety, jakija śviedčać ab tym, što znachodžańnie vikinhaŭ na terytoryi Biełarusi było nie epizadyčnym, tranzitnym, a pastajannym. Siarod samych kaštoŭnych znachodak — źlitki kalarovych mietałaŭ, siarebrany nakaniečnik nožan miača, matryca dla adliŭki pajasavych nakaniečnikaŭ družyńnikaŭ i inšyja.

Akramia taho, archieołahi znajšli i miesca pachavańnia adnaho z družyńnikaŭ-vikinhaŭ razam sa zbrujaj i kaniom.

«Apošniaje adkryćcio vielmi važnaje dla nas, — adznačyła Volha Laŭko. — Hety prykład dakazvaje, što vikinhi ŭ nas žyli».

Śpiecyjalist taksama raskazała, što ŭ Biełarusi praktyčna nie było navukova-daśledčych rabot, pryśviečanych vikinham. U bližejšyja hady vučonyja płanujuć udzialić hetaj temie asablivuju ŭvahu, płanujecca vyznačyć hałoŭnyja asablivaści pobytu vikinhaŭ na terytoryi Biełarusi. Užo viadoma, naprykład, što ich pasieliščy byli nievialikimi i raźmiaščalisia niedaloka ad pasieliščaŭ miascovych žycharoŭ.

Vikinhi — rańniesiarednieviakovyja skandynaŭskija marachody, jakija ŭ VIII–XI stahodździach rabili marskija pachody ad Vinłanda da Bijarmii i ad Kaśpija da Paŭnočnaj Afryki. U asnoŭnym heta byli svabodnyja sialanie dackaha, narviežskaha i šviedskaha pachodžańnia, jakija kačavali za miežami rodnych krain u pošukach lohkaj nažyvy. Pa relihii heta byli ŭ asnoŭnym jazyčniki.

Instytut historyi NAN Biełarusi pravodzić fundamientalnyja navukovyja daśledavańni pa historyi i archieałohii, vykonvaje archieałahičnyja raskopki, a taksama arhanizuje ekśpiertyzu važniejšych navukovych prahram i prajektaŭ u kulturna-histaryčnaj śfiery.

Клас
0
Панылы сорам
0
Ха-ха
0
Ого
0
Сумна
0
Абуральна
0

Chočaš padzialicca važnaj infarmacyjaj ananimna i kanfidencyjna?