U 2011 hodzie biełaruskija turysty mohuć atrymać mahčymaść adpačyvać u Charvatyi bieź viz.

Pra heta paviedamiŭ žurnalistam dziaržsakratar pa turyźmie Ministerstva turyzmu Charvatyi Branka Hyrhič 27 kastryčnika paśla adkryćcia vystavy «Turbiźnies-2010» u Minsku.

Pavodle jaho słoŭ, Ministerstva turyzmu Charvatyi prapanavała svajmu ŭradu ŭklučyć Biełaruś u śpis krain, dla jakich zdymajucca vizy na čas letniaha siezona. Letaś da takich dziaržaŭ byli adniesienyja Rasija i Ukraina.

«90%, što buduć źniatyja vizy na čas letniaha adpačynku na 6 miesiacaŭ (z 1 maja pa 1 listapada) i dla Biełarusi», — skazaŭ Hyrhič.

Dziaržsakratar adznačyŭ, što ŭmovaj dla źniaćcia viz źjaŭlajecca zaklučeńnie pahadnieńnia pamiž Biełaruśsiu i Charvatyjaj ab supracoŭnictvie ŭ śfiery turyzmu, jakoje padpisana siońnia ŭ Minsku.

U svaju čarhu namieśnik ministra sportu i turyzmu Biełarusi Česłaŭ Šulha paviedamiŭ, što pahadnieńnie praduhledžvaje dadatkovaje infarmacyjnaje ŭzajemadziejańnie ŭ śfiery turyzmu pamiž krainami. Płanujecca abmien vopytam u častcy padrychtoŭki turystyčnych kadraŭ, abmiarkoŭvajecca mahčymaść stvareńnia pramoha avijarejsu pamiž Biełaruśsiu i Charvatyjaj.

Akramia taho, adznačyŭ Šulha, biełaruski bok spadziajecca pryciahnuć patencyjalnych inviestaraŭ z Charvatyi, jakija b mahli ŭkładvać srodki ŭ raźvićcio sietki hatelaŭ u Biełarusi.

Branka Hyrhič vykazaŭ nadzieju, što pahadnieńnie źnimie ŭsie barjery, što isnavali pamiž dźviuma krainami ŭ śfiery turyzmu. Biełaruski rynak turpasłuh cikavy dla Charvatyi, padkreśliŭ jon.

Клас
0
Панылы сорам
0
Ха-ха
0
Ого
0
Сумна
0
Абуральна
0

Chočaš padzialicca važnaj infarmacyjaj ananimna i kanfidencyjna?