Pretendent na pasadu prezidenta Biełarusi Uładzimir Niaklajeŭ padčas sustrečy sa studentami Jeŭrapiejskaha humanitarnaha ŭniviersiteta 14 kastryčnika ŭ Vilni prakamientavaŭ vyniesienaje siońnia Centrvybarkamam papiaredžańnie jaho inicyjatyŭna hrupie.

«Siońnia sprabavali źniać mianie. Papiaredžańniem pakul abyšlisia, bo rabić takija kroki pierad samym pačatkam prezidenckaj kampanii ź ich boku było b vialikaj pamyłkaj, i jany hetaha nie zrabili,« — zajaviŭ Niaklajeŭ.

Palityk miarkuje, što da źniaćcia jaho z prezidenckaj honki nie dojdzie i ŭ budučyni, «niahledziačy na šmatlikija pravakacyi».

Pry hetym, pavodle słoŭ Niaklajeva, biełaruskaje zakanadaŭstva ab vybarach samo šturchaje pretendentaŭ na kroki, jakija orhanami ŭłady pry žadańni mohuć być rascenieny jak parušeńnie.

«Dziŭny ŭ nas zakon pryniali — ja pavinien prasić u čałavieka za mianie padpisacca, ale nie maju prava jaho ahitavać, — skazaŭ Niaklajeŭ, aburyŭšysia, što padčas zboru podpisaŭ nie dazvalajecca ahitacyja. —

Niaŭžo ja pavinien čałavieku prapanavać pastavić podpis, tolki pahladzieŭšy na mianie — źleva, sprava?»

Nahadajem, papiaredžańnie, vyniesienaje inicyjatyŭnaj hrupie lidara kampanii «Havary praŭdu!» na pasiadžeńni 14 kastryčnika, — pieršaje ŭ hetaj prezidenckaj kampanii.

Siarod zafiksavanych parušeńniaŭ — raspaŭsiudžvańnie ahitacyjnaj pradukcyi, vyrablenaj za miažoj (u Rasii), u pieryjad zabarony ahitacyi, zbor podpisaŭ niepaŭnaletnimi, što zabaroniena zakonam, a taksama pieradača paśviedčańniaŭ členaŭ hrupy inšym asobam.

U vybarčym štabie Niaklajeva śćviardžajuć, što daručeńniaŭ niepaŭnaletnim źbirać podpisy ŭ svaju padtrymku jon nie davaŭ, admaŭlajuć i fakt pieradačy paśviedčańniaŭ trecim asobam.

Клас
0
Панылы сорам
0
Ха-ха
0
Ого
0
Сумна
0
Абуральна
0

Chočaš padzialicca važnaj infarmacyjaj ananimna i kanfidencyjna?