Sotni haściej zaprošany na ŭračystuju imšu z nahody 300-hodździa aśviačeńnia Minskaha archikafiedralnaha kaścioła Najśviaciejšaj Panny Maryi. Mierapryjemstva pačniecca 9 kastryčnika ŭ 12.00,

paviedamiŭ 6 kastryčnika na pres-kanfierencyi ŭ Minsku arcybiskup Tadevuš Kandrusievič, mitrapalit Minska-Mahiloŭski.

Pavodle jaho słoŭ, siarod zaprošanych — pradstaŭniki dziaržaŭnych i hramadskich struktur, dypłamaty, ijerarchi i ksiandzy Rymska-katalickaj carkvy ŭ Biełarusi, mitrapalit Minski i Słucki Fiłaret, patryjaršy ekzarch usiaje Biełarusi, a taksama pasłańnik papy rymskaha Bieniedykta XVI kardynał Jožef Tomka — były prefiekt vatykanskaj Kanhrehacyi jevanhielizacyi narodaŭ, jaki budzie pramaŭlać kazań pa-biełarusku. «Heta znak pavahi da Biełarusi i nacyjanalnaj kultury, salidarnaści ź biełaruskimi katalikami i paŭsiudnaści kaścioła», — padkreśliŭ arcybiskup.

Pavodle jaho słoŭ, kardynał Tomka, jaki prybudzie ŭ Biełaruś viečaram 7 kastryčnika, miarkuje sustrecca ź mitrapalitam Fiłaretam i pradstaŭnikami ŭłady, a 10 kastryčnika płanuje ŭznačalić imšu ŭ Maładziečanskim kaściole Śviatoha Juzafa (Minskaja vobłaść), dzie taksama pramović kazań pa-biełarusku.

Uračystaść pad devizam Gaudium et spes («Radaść i nadzieja») budzie mieć dušpastyrski charaktar i pravodzicca na łacinskaj i biełaruskaj movach.

Śviatkavańniu papiaredničaje śpiecyjalnaja dzieviacidzionnaja malitva (navenna) va ŭsich parafijach Minska-Mahiloŭskaj archidyjacezii. U archikafiedralnym kaściole navenna ŭklučaje ružancovuju malitvu, śviatyja imšy i štodzionnaje čytańnie refierataŭ na roznyja temy, u tym liku histaryčnyja. Dla vystupleńnia z refieratami zaprošany i pradstaŭniki pravasłaŭnaj carkvy.

***

Minski archikafiedralny kaścioł zasnavany jezuitami 31 lipienia 1700 hoda. 16 sakavika 1710 hoda chram aśviaciŭ biskup Vilenski Kanstanty Kazimir Bžastoŭski. 28 krasavika 1798 hoda śviatyni była nadadziena hodnaść kafiedralnaha kaścioła. Z krasavika 1905 hoda peŭny čas probaščam kaścioła byŭ biełaruski ksiondz Zyhmunt Łazinski. U paślavajennyja časy chram byŭ adabrany ŭ viernikaŭ i pieradadzieny pad Dom fizkultury. U 1951 hodzie śviatynia była całkam spustošana i pierabudavana. 9 śniežnia 1993 hoda pastanovaj biełaruskaha urada budynak byŭ viernuty katalikam. Vialiki ŭniosak ŭ restaŭracyju kaścioła zrabiŭ kardynał Kazimir Śviontak. 21 kastryčnika 1997 hoda adbyłosia paŭtornaje ŭračystaje aśviačeńnie chrama.

Клас
0
Панылы сорам
0
Ха-ха
0
Ого
0
Сумна
0
Абуральна
0

Chočaš padzialicca važnaj infarmacyjaj ananimna i kanfidencyjna?