U 1972 hodzie brytanskija ŭłady i irłandski Kaścioł zamaŭčali ŭdzieł katalickaha ksiandza ŭ kryvavym zamachu ŭ Paŭnočnaj Irłandyi.

Apublikavany rapart pravaabaroncy Eła Chatčynsana adharnuŭ čarhovuju ciomnuju staronku adnaho z samych kryvavych kanfliktaŭ sučasnaj Jeŭropy.

U kancy 1972, praź niekalki miesiacaŭ paśla vybuchu ŭ Kłody (31 lipienia), u vyniku jakoha zahinuła dzieviać pratestoŭcaŭ, dziaržsakratar Uiljam Uajtłoŭ, jaki ŭ brytanskim uradzie pradstaŭlaŭ Paŭnočnuju Irłandyju, sustreŭsia z prymasam Irłandyi, kardynałam Uiljamam Konvejem i pradstaviŭ jamu dokazy terarystyčnaj dziejnaści paŭnočnairłandskaha ksiandza Džejmsa Čeśni. Brytancy viedali, što Čeśni byŭ adnym z arhanizataraŭ vybuchu ŭ Kłody i čalcom strukturaŭ Irłandskaj respublikanskaj armii (IRA), jakaja imknułasia da adździaleńnia Paŭnočnaj Irłandyi ad Vialikabrytanii.

Baki syšlisia na tym, što ksiandza Čeśni pieraviaduć u irłandskuju parafiju ŭ Doniehale. Z dakumientaŭ, sabranych Chatčynsanam, vynikaje, što inicyjataram pieravodu byŭ kardynał. Takim samym čynam kaścielnyja ŭłady chavali fakty piedafilii siarod śviatarstva. U pačatku 1973 Čeśni byŭ vyviezieny za miažu. Paźniej žurnalisty padazravali jaho ŭdzieł u zamachu, što sam jon admaŭlaŭ, a palicyja nikoli jaho nie dapytvała. Śledstva skončyłasia ničym, i pierad sudom nichto nie paŭstaŭ.

Z dakumientaŭ vynikaje, što nieŭzabavie paśla zamachu śledčyja atrymali zahad prypynić rasśledavańnie.
Ułady aścierahalisia, što raskryćcio roli ksiandza ŭ hetaj spravie moža pryvieści da jašče bolšaha zavastreńnia kanfliktu i navat da hramadzianskaj vajny pamiž katalikami i pratestantami, uzajemnaja nianaviść jakich u toj čas siahała apahieju. Lipień 1972 byŭ adnym z samych kryvavych miesiacaŭ — za 30 dzion tady zahinuła bolš za 100 čałaviek, a za hod — bolš za 500.

Ksiondz pamior u 1980. Pamierli ŭžo i astatnija ŭdzielniki kanfidencyjnych damovaŭ, u tym liku kardynał Konvej. Zastalisia tolki dakumienty, što kidajuć cień na brytanskija ŭłady, palicyju i Kaścioł. Kreŭnyja achviaraŭ zamachu ŭ Kłody padazrajuć, što tahačasny prem'jer-ministr, kansiervatar Edvard Chit, cudoŭna viedaŭ pra zmovu i patrabavaŭ dalejšaha rasśledavańnia.

U paniadziełak, 31 lipienia 1972, kala 10 hadzinaŭ ranicy ŭ Kłody adzin za adnym uzarvalisia try aŭtamabili, pryparkavanyja blizka kala hałoŭnaj vulicy horada. Ad vybuchu zahinuła 9 čałaviek, u tym liku troje dziaciej, 30 było paraniena. U historyi Vialikabrytanii padzieja atrymała nazvu «kryvavaha paniadziełka», jaki staŭ adkazam IRA na znakamituju «kryvavuju niadzielu» ŭ studzieni 1972, kali brytanskija sałdaty zabili 14 katalikoŭ — udzielnikaŭ mirnaha maršu ŭ Dery.

Ciapierašni sakratar pa spravach Paŭnočnaj Irłandyi Oŭen Patersan prynios prabačeńni kreŭnym zahinułych za prypynieńnie śledstva
i za toje, što jany nie zmahli dabicca spraviadlivaści, tłumačačy heta tym, što tahačasnyja ŭłady dziejničali ŭ vielmi składanych akaličnaściach.

Spačuvańnie vykazaŭ taksama Kaścioł. Ale prymas Irłandyi, kardynał Šon Bredzi, adprečyŭ udzieł Kaścioła ŭ chavańni ksiandza. «Dziejańni kardynała Konveja nie pieraškodzili aryštavać i dapytać ajca Čeśni paśla 1973 hoda», — zajaviŭ jon.

Клас
0
Панылы сорам
0
Ха-ха
0
Ого
0
Сумна
0
Абуральна
0

Chočaš padzialicca važnaj infarmacyjaj ananimna i kanfidencyjna?