Dva padobnyja pa naźvie fajłaabmiennyja partały biełaruskaha interneta (Torrent.by i Torrents.by) vałodajuć dosyć adroznaj aŭdytoryjaj.
Adnak historyja stvareńnia prajektaŭ amal adnolkavaja. Praca partałaŭ pačynałasia i trymajecca na adnym amatary, kamanda zacikaŭlenych dapamahaje absłuhoŭvać tolki forum.

Jak paviedamlała «Naša Niva» raniej, u Biełarusi nie płanujecca zabaraniać torenty. Ale z 1 vieraśnia www.torrent.by kančatkova pierajazdžaje na damiennaje imia baravik.org. Pryčynaju staŭsia ukaz № 60 «Ab mierach udaskanalvańnia vykarystoŭvańnia nacyjanalnaha siehmientu Internet». Kab paźbiehnuć prablemaŭ, administracyja trekiera vyrašyła pakinuć zonu.by. Na novaje damiennaje imia ukaz № 60 nie raspaŭsiudžvajecca.

Partał torrent.by źjaviŭsia ŭ lipieni 2007 hoda. Prajekt stvaraŭsia dla ludziej, nieabyjakavych da pytańniaŭ raźvićcia rodnaj movy i kultury, pavyšeńnia nacyjanalnaj samaśviadomaści. Tamu adsotak karystalnikaŭ, jakija simpatyzujuć biełaruskaj movie dy historyi, pa słovach administracyi sajtu, dasiahaje 99,9%.

Decentralizavany abmien infarmacyjaj budzie raźvivacca, ličyć stvaralnik prajektu Alaksandr Daniłaŭ, ale torenty — źjava časovaja. «Technałohii decentralizavanaha abmienu fajłami vielmi pierśpiektyŭnyja, źnižajuć nahruzku na kamputarnyja sietki, ale čas bieskantrolnaha raspaŭsiudu infarmacyi z parušeńniami aŭtarskaha prava padychodzić da kanca», — peŭny Alaksandr Daniłaŭ.

«Jak luby inšy resurs, z dapamohaju jakoha zarablajucca hrošy, my zarehistravanyja ŭ nacyjanalnym siehmiencie interneta»,
 — paviedamiŭ «Našaj Nivie» administratar Dzianis, stvaralnik inšaha partała — torrents.by, jaki pačaŭ svaju pracu ŭ śniežni 2007 hodu. «U adzin ź zimovych viečaroŭ pryjšła dumka, što na prastorach bajneta niama padobnaha resursu», — apaviadaje administratar «Trekiera tvajoj krainy».

Na dumku Dzianisa, torenty źjaŭlajucca bolš hramadskaj, čym kulturnaj źjavaju. Stvaralnik partału rady, što jahony prajekt dazvalaje ludziam być u kantakcie. Torrents.by sabraŭ vakoł siabie supolnaść, jakaja ładzić sustrečy ŭ realnym žyćci. Adna z takich imprezaŭ pad nazvaju «Usiebiełaruskaja tarentoŭka» adbyłasia nie tak daŭno pad Babrujskam.

Torrents.by nie admovicca retranślavać papularnyja albo skandalnyja filmy, kali jany nie buduć palityčnymi.
Administratar nie vyklučaje mahčymaści źviarnucca da «Biełsata» pa videaarchivy, ale tolki paśla akredytacyi telekanała ŭ Biełarusi.

Abodva prajekty nie staviać palityčnych ci ideałahičnych metaŭ u svaim raźvićci. Kožny ź ich nie bačyć dla siabie kankurentaŭ. Nasamreč, stvarajecca ŭražańnie, što metavyja hrupy dvuch partałaŭ roznyja i naŭrad ci mohuć pieramiažoŭvajucca.

Pieršy pratakoł abmienu fajłami Torrent źjaviŭsia ŭ lipieni 2001 hodu. Siarod karystalnikaŭ sieciva takaja sistema raspaŭsiudu infarmacyi daŭno nabyła vialikuju papularnaść u śviecie.

Клас
0
Панылы сорам
0
Ха-ха
0
Ого
0
Сумна
0
Абуральна
0

Chočaš padzialicca važnaj infarmacyjaj ananimna i kanfidencyjna?