Paśla premjery «Chrosnaha baćki-3» u rasiejskim druku praciahvajecca kampanija suprać kiraŭnika Biełarusi, A.Łukašenku abvinavačvajuć u «machlarstvie» i spekulacyi na pažarach u Rasiei.

«Moskovskij komsomolec», kamentujučy sytuacyju vakoł pryznańnia niezaležnaści Abchazii i Paŭdniovaj Asetyii, piša: «Eksperty daŭnym-daŭno zaŭvažyli za biełaruskim lideram vydatnuju asablivaść — nikoli nie zapaminać, dzie, što, kali jon kaža. Unutry Biełarusi hetyja pastajannyja lapy prezydenta lohka mohuć syści z ruk, pakolki dziaržaŭny druk zaŭsiody źmikšuje i padaść vykazvańni ŭ patrebnym śviatle. A voś za miežami krainy Baćka ŭvieś čas ulapvajecca. Dźmitryja Miadźviedzieva, jaki aśmieliŭsia vykryć jaho chłuśniu, jon abvinavaciŭ nie ŭ čym-niebudź, a ŭ niesumlennaści. Značyć, pastupać z Łukašenkam treba jak z šuleram: chapać za ruku i tykać paznačanaj kartaj u pysu».

Hazeta taksama kamentuje apošnija zajavy biełaruskaha prezydenta nakont budaŭnictvie AES: «Baćka narakaŭ i z nahody losu budaŭnictva AES na terytoryi Biełarusi. Maŭlaŭ, my možam u budaŭnictvie stancyi abyścisia biez udziełu rasiejcaŭ. Ale pry tłumačeńni pryčynaŭ znoŭ zmachlaryŭ: „Tak, my pracavali z rasiejcami, my zychodzili z taho, jak jany paabiacali. Jany nastojliva patrabavali ad nas, kab jany budavali hetuju stancyju“. Kožny choć trochi znajomy z prablemaj budaŭnictva AES u Biełarusi viedaje, što hetuju idee fix Łukašenka doŭha i nastojliva prabivaŭ, ułomvajučy rasiejcaŭ dać kredyt i paŭdzielničać u budaŭnictvie», — adznačaje «Moskovskij komsomolec».

«Viečierniaja Moskva», hazeta ŭradu Maskvy, apublikavała artykuł «Chcivy baćka», dzie Alaksandar Łukašenka abvinavačvajecca ŭ žadańni nažycca na biedach rasiejcaŭ, jakija abrynulisia na krainu hetym letam: «Viadoma, da prykładu, što Łukašenka prahłynuŭ, nie pamorščyŭšysia, naš miljard faktyčna biazvypłatnaj pazyki, a na pryznańnie Abchazii i Paŭdniovaj Asetyi nie pajšoŭ. Ciapier prezydent Miadźviedzieŭ adkryta kaža pra toje, što Łukašenka parušyŭ dadzienaje słova. A biełaruski baćka jak ni ŭ čym nie byvała śćviardžaje, što jaho tady niapravilna zrazumieli. Ciapier u Maskvie hatovyja apublikavać stenahramy pieramovaŭ u ramkach ADKB, kab vyvieści kryvadušnaha baćku na čystuju vadu. Ale takaja publikacyja naŭrad ci zrobić na byłoha zampalita mocnaje ŭražańnie. Hrošy ž atrymanyja i ŭžo patračanyja. I patrabujecca jašče. A dzie ŭziać? I tut našy pažary, zasucha, nieŭradžaj. I Łukašenka ažyviŭsia, adčuŭšy novuju bazarnuju kanjunkturu».

Na dumku «Viečierniej Moskvy», sens zajavaŭ Łukašenki taki: «U Rasiei nieŭradžaj, a značyć, my pavinny skarystacca sytuacyjaj i pastaracca atrymać maksymalny prybytak. Ustanoŭka prama ŭ styli ciapierašniaj sajuznaj dziaržavy… Zrazumieła, što na zachad ad Bieraścia ŭ jaho znojducca ŭdziačnyja hledačy. Ale tyja hledačy, voś biada, addajuć pieravahu tamu, kab hladzieć novaje šoŭ na chalavu. A hrošy baćku patrebnyja pazarez».

U žadańni nažycca na pažarach u Rasiei Łukašenku abvinavačvaje i hazeta «Iźviestija»: «Łukašenka, padobna ajčynnym spekulantam, taksama vyrašyŭ nie zhubić šaniec nažycca na rasiejskim nieŭradžai. Biełaruskija ahrapradpryjemstvy ŭžo atrymali ŭkazańnie pradavać u Rasieju tolki małako i miasa, a kambikorm i muku prytrymać i adpuskać u abmiežavanaj kolkaści. Zbožža ž i zusim rasparadžeńniem Łukašenki stanie pradmietam handlu tolki ŭ vyklučnych vypadkach», — adznačaje vydańnie.

Temu raźvivaje «Hołas Rasiei»: «Biełaruski kiraŭnik vyrašyŭ jašče raz dakazać Rasiei, što ź im kašy nie zvaryć. Pa krajniaj miery, biaspłatna. Maskva ŭžo dastatkova sytaja družalubnaściu Łukašenki. Ale zaraz jon prapanuje hetuju družalubnaść jašče i za vialikuju płatu. Pryčym, zrazumieła, što pažary ŭ Rasiei — heta zorny čas jaho ŭjaŭleńniaŭ pra prahmatyzm. Kali biełaruskija pažarnyja, naraŭnie z kalehami ź inšych krainaŭ SND i nia tolki, vypravilisia ratavać Rasieju ad ahniu, heta było salidarna. Kali biełaruskija telekanały stali paraŭnoŭvać biełaruskich pažarnikaŭ z rasiejskimi, demanstratyŭna nie na karyść apošnich, heta było naturalna. Kali Łukašenka prapanavaŭ pažarami skarystacca — heta stała ŭžo vyklikam. Chacia, na samoj spravie, jon tolki paćvierdziŭ reputacyju hetakaha viaskovaha chitruna».

Клас
0
Панылы сорам
0
Ха-ха
0
Ого
0
Сумна
0
Абуральна
0

Chočaš padzialicca važnaj infarmacyjaj ananimna i kanfidencyjna?