Pra heta paviedamiŭ pieršy vice‑premjer Uładzimir Siamaška 23 červienia na ekstranaj pres‑kanfierencyi ŭ Minsku.

Pa jaho słovach, Biełaruś pazyčyła 200 młn. dalaraŭ, 187 młn. syšli na pakryćcio doŭhu.

U svaju čarhu Minsk patrabavaŭ ad «Hazproma» da 10.00 24 červienia apłacić doŭh za tranzit hazu pamieram 260 młn. dalaraŭ.

«Kali heta nie budzie zroblena, Biełaruś maje namier spynić tranzit vuhlevadarodnaj syraviny», — zajaviŭ Siamaška.

***

Ź siońniašniaha dnia pastaŭki rasijskaha hazu ŭ Biełaruś skaročany ŭžo na 60% ad płana, paviedamiŭ kiraŭnik «Hazproma» Alaksiej Miler na ranišnim pasiadžeńni apieratyŭnaha štaba.

«Z 10.00 uvodzicca abmiežavańnie pastavak na 60%», — cytuje Milera RIA Novosti.

Abmiežavańni, nahadajem, byli ŭviedzieny ranicaj 21 červienia — tady «Hazprom» skaraciŭ pastaŭki hazu ŭ Biełaruś na 15%. 22 červienia abjom pastavak źmienšyŭsia na 30%.

Kiraŭnictva «Hazproma» papiaredziła, što abmiežavańnie płanujecca davieści da 85%, adpaviedna z uzroŭniem zapazyčanaści Minska za haz.

21 červienia pieršy vice‑premjer Biełarusi Uładzimir Siamaška zajaviŭ, što respublika raźličycca za rasijski haz na praciahu dvuch tydniaŭ. Pry hetym biełaruski bok vystaŭlaje rasijanam sustrečnaje patrabavańnie — pahasić doŭh za tranzit hazu pa svajoj terytoryi ŭ 217 młn. dalaraŭ.

22 červienia Alaksandr Łukašenka rasparadziŭsia pierakryć tranzit rasijskaha hazu cieraź Biełaruś.

Pavodle słoŭ prezidenta, u chutkim časie Biełaruś moža pieraličyć hrošy «Hazpromu» ŭ košt doŭhu za pastaŭleny haz.

Pry hetym Łukašenka prapanavaŭ «Hazpromu» zrabić uzajemazalik daŭhoŭ. «Nie my vinavatyja siońnia «Hazpromu», a «Hazprom» vinavaty Biełarusi 70 miljonaŭ dalaraŭ, kali pravieści zalik.

Heta absalutna dakładna, i jany heta pryznali», — padkreśliŭ biełaruski kiraŭnik.

Staršynia Jeŭraparłamienta Ježy Buziek zajaviŭ, što Jeŭrasajuz nie maje namieru ŭmiešvacca ŭ hazavuju sprečku Rasii i Biełarusi. «My nie ŭmiešvajemsia ŭ adnosiny pamiž dźviuma krainami — heta sprava Rasii i Biełarusi», — zajaviŭ jon 22 červienia, znachodziačysia ŭ Maskvie.

Buziek vykazaŭ nadzieju na toje, što roznahałośsi pa hazie pamiž Maskvoj i Minskam nie paŭpłyvajuć na pastaŭku paliva ŭ jeŭrapiejskija krainy.

Клас
0
Панылы сорам
0
Ха-ха
0
Ого
0
Сумна
0
Абуральна
0

Chočaš padzialicca važnaj infarmacyjaj ananimna i kanfidencyjna?