Ciaham troch tydniaŭ zmahańnia vioski Šyrokaja tudy nie naviedaŭsia nivodzin lider niezaležnaha hramadstva. Piša Aleś Zaleŭski.

Žychary vioski Šyrokaja ścianoj ustali suprać pabudovy škodnaj vytvorčaści.

Žychary vioski Šyrokaja ścianoj ustali suprać pabudovy škodnaj vytvorčaści.

Šmatlikija ekśpierty pišuć pra «čarhovyja hrabli», na jakija nastupaje apazicyja. Jaje lidery, jak i my z vami, čytajem adny i tyja ž sajty, a tamu biahučyja apinii palitołahaŭ/analitykaŭ jany taksama prahladajuć, sprabujuć dapasoŭvacca. Voś tolki, čamuści, prychodzić novaja vybarčaja kampanija – łob iznoŭ z huzakom, a na niezaležnych staronkach źjaŭlajucca čarhovyja kamientary pra «hrabli». Moža, aproč ekśpiertaŭ, varta prysłuchacca i da šarahovych biełarusaŭ?

«My ž, nie «beenefaŭcy», kab nas trucić?!» -- usklikvaje žančyna z-pad Lidy. U jaje vioscy Šyrokaja za harodami znachodzicca ściokavaja truba z haradskich ačyščalnych zbudavańniaŭ, praz darohu zavod «Optyk», a praz 300 mietraŭ miascovyja ŭłady majuć namier pabudavać pradpryjemstvy pa acynkoŭcy mietału.

Pra heta niejak pisała «Naša Niva». Ja tudy trapiŭ na nastupny dzień paśla vizitu ŭ viosku karespandentki najstarejšaha vydańnia. Adčajnaja replika žančyny hučała ŭ adras miascovaha ideołaha. Žychary dosyć zamožnaha i vialikaha pasielišča ŭviečary vymušanyja začyniać fortki, tam nielha pabačyć špacyraŭ moładzi, havorak babulek la padvorkaŭ. Smurod staić taki, što paśla pracoŭnaha dnia viaskoŭcy vymušanyja zamykacca ŭ svaich chatkach. A tamu akreśleńnie hetaj situacyi žycharkaj Šyrokaj praz paraŭnańnie z «beneefaŭcami» jak najlepiej pasuje. Jak da viaskoŭcaŭ, tak i da apazicyi. Praz akupavańnie Uładaj terytoryi pa-za ofisam jany vymušanyja zastavacca ŭ svaich chatkach. Im praz vokny vidać «prachadnyja MAZaŭ». Jany bačać: kryzis dapiok rabočym! Voś słaboje miesca režymu! Stvarajecca antykryzisnaja płatforma, jana pijarycca jak hałoŭnaja zbroja na miascovaj kampanii, adzin z kandydataŭ (i jaje aŭtaraŭ) jaje vykarystoŭvaje jak prezidenckuju tolki pad inšaj nazvaj.

Adnak,

jak vynikaje z apošnich sacyjałahičnych daśledavańniaŭ praviedzienych łabaratoryjaj Novak i acenienaj ekśpiertami Biełaruskaha instytuta stratehičnych daśledavańniaŭ BISS -- dla amal pałovy biełarusaŭ nie ŭsio tak kiepska i niama čaho kryčać pra kryzis, a dla druhoj – moža i kiepska, ale žyć možna. Vychodzić, z mesidžam nie ŭhadali. To moža, adhadajem z adzinym? Ale na pačatku stvorym praceduru. Ci niekalki, a paśla vyrašym, jakaja lepšaja dla dziesiatka kandydataŭ na adzinaha. Nieistotna, jakuju ideałohiju jon pradstaŭlaje, jaki maje rejtynh i hramadski darobak -- hałoŭnaje, kab jon pasavaŭ haspadaram niekalkich partyjnych ofisaŭ dy, kab na Płoščy zamiest Administracyi nie pavioŭ da Viečnaha ahniu. Voś tolki ŭźnikaje pytańnie: kaho paviadzie?
Tych 45% kamu «nia ŭsio tak kiepska» ci inšyja 45% kamu «kiepska, ale žyć možna»? Nie. Hetyja praz aŭtazaki ŭ dvarach pradziracca da Płoščy nie buduć. Ci buduć, ale ŭ vypadku, kali budzie upeŭnienaść, što na zaŭtra jany pračnucca ŭ lepšaj krainie.

Na vybarach harantyjaj takoha «lepšaha zaŭtra» źjaŭlajecca ideja. Ź jaje vynikaje, čamu ŭ biełarusa budzie poŭnaja ladoŭnia, na vulicach paradak, na miežach brak čerhaŭ, a ŭ harvykankamach spahadlivyja čynoŭniki. Inšaja sprava, što takuju ideju ciažka sfarmulavać, nie viedajučy na čym palahaje śvietapohlad šarahovaj siamji nie tolki ŭ Miensku, ale i na Lidčynie, i ŭ Čavusach i h.d. Jak heta zrabić? Va aŭtarytarnych režymach, dzie niama mahčymaści dla narmalnaj palityčnaj kamunikacyi tolki praź niepasredny kantakt. Na pieršym etapie ź idejaj, paśla ź jaje nośbitami, potym – na Płoščy – ź jaje hałoŭnym reprezientantam.

U Polščy “Salidarnaść” mahła ŭvajści ŭ kožnyja dom. Jana kamfortna tam siabie pačuvała, bo viedała pra ŭsie prablemy i čakańni žycharoŭ hetaha doma. I jany mižvoli stanavilisia častkaj “Salidarnaści”, častkaj idei.

To moža čas pierastać mieracca kolkaściu inicyjatyŭnych hrupaŭ ci «sponsarskimi» kantaktami, a zadumacca nad idejaj? Tolki hetym razam parazmaŭlaŭšy na pačatku z žycharami, choć by, toj Lidčyny. Darečy, aproč vioski Šyrokaj z takoj ža prablemaj tam sutykajucca jašče try susiednija vioski.
Jany znachodziacca faktyčna na miažy z rajcentram, a ciaham troch tydniaŭ zmahańniaŭ i vostrych kanfliktaŭ ź miascovymi ŭładami, tudy nie naviedaŭsia nivodzin lider ci, prynamsi, pradstaŭnik apazicyi.

* * *

Aleś Zaleŭski – viadoŭca prahramaŭ “Biełsatu”.

Клас
0
Панылы сорам
0
Ха-ха
0
Ого
0
Сумна
0
Абуральна
0

Chočaš padzialicca važnaj infarmacyjaj ananimna i kanfidencyjna?