Minsk u adkaz papiaredziŭ: tady źmienšycca padača hazu ŭ Jeŭropu. Pieramovy skončylisia biezvynikova. Šantažom Kreml zmušaje Łukašenku padpisać niavyhadny dla Biełarusi Mytny sajuz.

Rasijska-biełaruskija pieramovy, jakija prajšli 19 červienia ŭ Sankt-Pieciarburhu adnosna problemy hazavaha doŭhu, skončylisia biezvynikova, zajaviŭ žurnalistam kiraŭnik «Hazproma» Alaksiej Miler. Adkazvajučy na Pieciarburhskim mižnarodnym ekanamičnym forumie na pytańnie žurnalistaŭ, čym zaviaršylisia pieramovy, Miler adkazaŭ: «Ničym».

«My raźvitalisia, i kudy jany [biełaruskija pieramoŭniki] pajechali, ja nie viedaju», — cytuje Alaksieja Milera RIA Novosti.

Pavodle jaho mierkavańnia, Biełaruś, robiačy zajavu pra doŭh RF za tranzit hazu ŭ Jeŭropu, tolki imkniecca advieści ŭvahu ad svaich daŭhoŭ. «U futbolnaj terminałohii heta možna nazvać niaŭdałaj sprobaj stvaryć falšyvy afsajd», — skazaŭ Miler žurnalistam u adkaz na prośbu prakamientavać zajavu biełaruskaha Minenierha.

Napiaredadni pieršy namieśnik ministra enierhietyki Biełarusi Eduard Taŭpianiec zajaviŭ, što doŭh Biełarusi za haz roŭny doŭhu «Hazproma» za tranzit — abodva składajuć kala 200 młn. dołaraŭ. Pry hetym jon nie vyklučyŭ, što mahčymyja abmiežavańni pastavak z boku Rasii «začepiać pytańni tranzitu».

Tym časam Rasija nie vyklučaje sudovych razboraŭ ź Biełaruśsiu pa pryčynie hazavych daŭhoŭ. «U sudzie raźbiaremsia, chto kamu vinavaty», — zajaviŭ 19 červienia vice-premjer RF Ihar Siečyn, kamientujučy zajavu pradstaŭnika biełaruskaha Minenierha.

Pavodle słoŭ Siečyna, biełaruski bok u adnabakovym paradku vyznačyŭ sabie prava pryznačać canu za tranzit. Sa svajho boku, «Hazprom» z hetym nie zhodny i robić zachady pa pryviadzieńni situacyi ŭ adpaviednaść z kantraktami. «Ja dumaju, što „Hazprom“ u dadzienym vypadku maje racyju», — dadaŭ Siečyn.

U svaju čarhu, kiraŭnik rady dyrektaraŭ «Hazproma», pieršy vice-premjer urada RF Viktar Zubkoŭ 19 červienia zajaviŭ, što Biełaruś nie pradjaŭlała dakumientaŭ pa zapazyčanaści za tranzit hazu. «My havorym: vy nam vinavatyja — voś dakumienty. A jany kažuć: vinavatyja, ale dakumientaŭ niama», — skazaŭ Zubkoŭ.

«Hazprom» płanuje z 21 červienia skaracić na 85% padaču hazu, kali Biełaruś nie vypłacić 192 młn. dołaraŭ doŭhu, jaki ŭtvaryŭsia ŭ vyniku taho, što kraina płacić pa cenach 2009 hoda.

Čym adkazvaje Minsk?

«Biełaruś nie zmoža ŭ poŭnaj miery padtrymlivać tranzit rasiejskaha hazu ŭ Jeŭropu, kali pastaŭki buduć abmiežavanyja na 85%». Pra heta zajaviła krynica ŭ biełaruskim Ministerstvie enierhietyki.
Tak pieradajuć infarmacyjnyja ahienctvy.

«Kali ŭviaduć abmiežavańnie ŭ 15%, ciažka budzie nie začapić pytańniaŭ tranzitu. Kab hazatranspartnaja sistema pracavała, u joj technałahična treba padtrymlivać peŭny cisk, — skazała krynica. — Nichto nie ŭličvaje, što ŭ nas jość vytvorčaści, jakim treba čatyry-piać sutak, tydzień dla ich vyviadzieńnia z režymu vytvorčaści», — adznačyŭ krynica. Heta, u pryvatnaści, tyčycca azotnych vytvorčaściaŭ i hutaŭ, dzie ŭ vypadku rezkaha adklučeńnia hazu mahčymyja surjoznyja avaryi.

«U (Alaksieja) Milera nie było žadańnia pryniać razumnyja, uzvažanyja rašeńni», — dadaŭ biełaruski bok, adkazvajučy na pytańni pra vyniki pieramovaŭ.

U vyniku minułaj značnaj hazavaj vajny Alaksandr Łukašenka sastupiŭ Rasii pałovu akcyj biełaruskaha hazatranspartnaha pradpryjemstva «Biełtranshaz». Dla paraŭnańnia: Ukraina zachoŭvaje pravy ŭłasnaści na anałahičnuju kampaniju dahetul całkam.

15 červienia prezident Rasii pastaviŭ Łukašenku źniavažlivy ŭltymatum. Jon daŭ Biełarusi piać dzion, kab «kab jany vyznačylisia, jak pavodzić siabie dalej», inakš buduć užytyja «strohija zachady». Padstavaj stała zapazyčanaść za haz.

Na dumku bolšaści analitykaŭ, Rasija hazavym šantažom choča zahnać Biełaruś u Mytny sajuz. Jon niavyhadny Biełarusi, bo abmiažoŭvaje ekanamičnuju samastojnaść i stvoryć pieraškody ŭ intehracyi ź ES. Adnak Łukašenku spakušała mahčymaść praciahu enierhietyčnaha hranta ad Maskvy. Tamu jon pajšoŭ na padpisańnie hetaha dakumienta, a ciapier Kreml zmušaje ŭvieści Mytny sajuz u siłu.

Nikoli raniej taki kanflikt nie adbyvaŭsia pierad prezidenckimi vybarami ŭ Biełarusi.
Клас
0
Панылы сорам
0
Ха-ха
0
Ого
0
Сумна
0
Абуральна
0

Chočaš padzialicca važnaj infarmacyjaj ananimna i kanfidencyjna?