Padčas kryzisu kudy najpierš nakiroŭvajucca srodki? Zrazumieła, na samaje nieabchodnaje. Biez čaho ŭ ciažki čas nijak nie abyścisia.

Fota BIEŁTA. Vučeńni hrupy «Alfa».

Fota BIEŁTA. Vučeńni hrupy «Alfa».

Adnak kiraŭnik dziaržavy našaj i tut pajšoŭ svaim admietnym šlacham. Biełaruś źbirajecca nabyvać najnoŭšyja ŭzory ŭzbrajeńnia. Jano terminova patrebna šmatlikim śpiecpadraździaleńniam. Ni z kim kraina nie vajuje. I pakul što nie źbirajecca. Ale hetkija drobiazi nikoha nie cikaviać. Bosymi i hołymi zastaniemsia, ale nievierahodnuju vintoŭku, jakoj ni ŭ kaho pakul jašče niama, abaviazkova kupim. Na zbroi tut nie ekanomiać. Pra našu vajaŭničaść pavinien viedać śviet.

Palityki naiŭnyja pierad čarhovymi vybarami iduć zvyčajna ŭ narod. A tavaryšy spraktykavanyja śpiašajucca tudy, dzie moža mieścicca realnaja harantyja čarhovaj elehantnaj pieramohi. I naŭrad ci adkul-niebudź jašče pieramoha taja bačycca tak vyjaŭna, jak z bazy hrupy «A» tutejšaha KDB.
Pres-słužba načalnika krainy patłumačyła mety vysokaha vizitu — tam pravodziłasia «sovieŝanije po voprosu sovieršienstvovanija raboty miežviedomstviennych hosudarstviennych orhanov sistiemy obieśpiečienija biezopasnosti Biełarusi». Krychu šmatsłoŭna i zabłytana, ale ničoha.

Sens nie ŭ tym, kab kožny razumieŭ, što i da čaho. Čas nie toj. Jon vymahaje dziejańniaŭ — rašučych i imklivych. Santymienty byłych hadoŭ apali, niby vosieńskaje liście. I zastałasia tolki hołaja iścina: stabilnaść — heta najpierš śpiecnaz. A tamu i karty jamu ŭ ruki. Dakładniej, najnoŭšuju zbroju. Kali nie jon abaronić ad roznych niepryjemnaściaŭ najvyšejšuju ŭładu, tady chto?

Adnak na toj naradzie

pieradvybarčy akcent byŭ adrynuty adrazu. Jakija vybary — tut sapraŭdnaja tryvoha. Krainie pahražaje niebiaśpieka. Kavarny vorah znoŭ nabliziŭsia da našaha paroha. A tamu «nieobchodimo vyrabotať čietkij miechanizm miežviedomstviennoj koordinacii antitierrorističieskoj diejatielnosti siłovych struktur».

Štości nievierahodnaje adbyvajecca ŭ śviecie. Zusim jak u sorak pieršym. Leta, červień. Lud paspality rassłabiŭsia, dumaje pra adpačynak. A pilnaje kiraŭnictva tym časam užo inśpiektuje «Alfu», bo vyśvietliłasia raptam realnaja pahroza teraryzmu. «Eto zło,- papiaredžvaje śpiecsłužboŭcaŭ praviciel, — striemitielno raspołzajaś po płanietie, siehodnia vpłotnuju podošło k hranicam našieho hosudarstva. Śvidietielstvo tomu — niedavnije tierrorističieskije akty v Moskvie. My nie imiejem prava osłablať vnimanije k takim uhrozam biezopasnosti ludiej, upovaja na stabilnosť socialno-političieskoj obstanovki v Biełarusi».

Heta ž treba — teraryzm staić na miažy. A tut niejkija niedarečnyja razmovy pra vybary dy jašče nakont mahčymaj źmieny spradviečna-niaźmiennaha kiraŭnictva, jakoje asabista vykryła strašennuju pahrozu krainie i adrazu paśpiašałasia na bazu samaha nadziejnaha śpiecpadraździaleńnia. Adnak ža adkul uzialisia terarysty? Ź Litvy, z Ukrainy ci z Polščy? Ź ćmianych namiokaŭ pra vybuchi ŭ Maskvie ŭvohule ničoha nie zrazumieć. Tyja vybuchi hrymiać tam z pačatku čačenskaj vajny i da hetaha času miascovaje kiraŭnictva čamuści nijak nie chvalavali. Impierskija razborki na tych dalokich nakirunkach Biełarusi pahražajuć davoli ŭmoŭna. Va ŭsiakim razie, u jakaści istotnaha arhumienta na karyść dadatkovaha finansavańnia śpiecpadrazdialeńniaŭ naŭrad ci mohuć razhladacca. A kali nie heta, tady što?

Miascovyja zmahary z teraryzmam sustreli praviciela zahadździa padrychtavanym fiejeryčnym šoŭ. Cahliny hałavoj, jak było raniej, nie raźbivali. Adrazu i rašuča pajšli na vyzvaleńnie peŭnaha administracyjnaha budynka, nibyta zachoplenaha ŭsio tymi ž terarystami. Jaki budynak mieli na ŭvazie, jakich zachopnikaŭ vyciaśniali, razumieli ŭsie bieź lišnich tłumačeńniaŭ. Šturm prajšoŭ z vykarystańniem bajavych patronaŭ i byŭ nastolki paśpiachovym, što vysoki hość asypaŭ toje śpiecpadraździaleńnie ščodrymi abiacańniami. Na bazie zbudujuć novy snajpierski cir na čatyrysta mietraŭ, zabiaśpiečać najnoŭšaj zbrojaj dy jašče pabudujuć hetak zvany «katedžny haradok» dla šturmavych trenirovak.

Miž inšym, dziŭnaja zaduma. Čamu patencyjnyja terarysty buduć ščamicca mienavita ŭ katedžny pasiołak, zrazumieć ciažka. A voś intares abaroncaŭ ułady da hetkich ža abjektaŭ kaliści ŭžo akreśliŭsia vyrazna. U dvary adnoj siadziby niekali davaŭ śpiektakl «Svabodny teatr». I raptam ułamiłasia tudy adpaviednaje padraździaleńnie. Hledačy napačatku padumali navat, što heta takaja režysiorskaja znachodka. I tolki kali novyja piersanažy zachapili ŭsich tych hledačoŭ, z haspadarami doma i aktorami ŭklučna, zrazumieli, što heta ścipły uniosak dziejučaj ułady ŭ raźvićcio sceničnaha mastactva. Usio, na što ŭłada taja zdatnaja.

Adnak chto moža viedać śpiecnazaŭskija tajamnicy? Mahčyma, hetkim čynam słužboŭcy adpracoŭvali taktyku abarony Drazdoŭ i vyzvaleńnie adnoj z tamtejšych pabudoŭ ad teatralizavanaha teraryzmu. Čas ciapier niapeŭny, ciažki. I ad nienadziejnaha hramadstva ŭsiaho možna čakać. Niezdarma ž hetyja śpiecpadraździaleńni množacca, niby kamary na bałocie. I ŭ pamiežnikaŭ jany ŭžo jość. I ŭ milicyjantaŭ. U vojsku — taksama. Viadoma ž, jość jany i ŭ KDB. Ale ich usio jašče mała. I im usio mała. Voś novaja zbroja terminova spatrebiłasia. I praviciel pramoviŭ miž inšym: «Chorošo, čto u nas jesť čiem vojevať». Z kim?..

Uvieś čas, dzie tolki možna, jon padkreślivaje, što Biełaruś nadzvyčaj biednaja kraina. I sapraŭdy, za rasijski haz niečym zapłacić. Da takoj dažylisia halečy, što navat u školnikaŭ i babulek adabrali ilhotny prajezd u aŭtobusach dy tramvajach. Takaja voś «sacyjalna aryjentavanaja» dziaržava. A što zrobiš — i na hetym treba ekanomić. U centry Minska na vulicy Płatonava z savieckaha času hibieje niedabudavanaja ruina — špitalny korpus. Katastrafična nie chapaje miescaŭ u rajonnych špitalach — chranična niama na toje srodkaŭ. Kali ŭźnikaje nieabchodnaść chvoraje dzicia nakiravać na apieracyju, jakuju mohuć vykanać tolki za miažoj, ludzi sami źbirajuć hrošy. Chto što moža. Jak padčas vajny i stychijnych biedstvaŭ. Kali nadta paščaścić, dla kaho-niebudź, mahčyma, patrebnaja suma źbiarecca. A dla bolšaści — nie. Adnak dziaržava na dapamohu tym, pakinutym, nie pryjdzie. U jaje inšy kłopat.

Jana ŭzbrojvaje śpiecnaz.

Клас
0
Панылы сорам
0
Ха-ха
0
Ого
0
Сумна
0
Абуральна
0