Chuan Antonia Samaranč błasłaviŭ šlub kapitału i alimpijskaha duchu. Źjavilisia na śviet i dzietki — Nacyjanalny alimpijski kamitet Aŭstryi i kampanija Casinos Austria. Redakcyjny kamientar aŭstryjskaj haziety Die Presse.

Lea Valner.

Lea Valner.

Chto žadaje zarabić sapraŭdy šmat hrošaj, musić prydumać novuju relihiju. Alimpijski ruch akurat i jość takim stabilna prybytkovym vieravyznańniem. Z dohmami (spraviadlivaść, abjektyŭnaść), rytuałami (Alimpijskija hulni), achviaradaŭcami (sponsary) i kliram (siabry Mižnarodnaha alimpijskaha kamiteta), jakija staranna achoŭvajuć svaju relihiju ad usialakaj krytyki. Pastanovy ex cathedra (rehularnyja siesii MAK) abviaščajucca biezzahannymi i biespamyłkovymi.

Chuan Antonia Samaranč (1920 — 2010 h.) na praciahu 1980 — 2001 h. ihraŭ rolu alimpijskaha Papy. U časy ispanskaha dyktatara Franka jon pieratvaryŭsia z apartunista ŭ dypłamata i z dapamohaj ahienta KHB Uładzimira Pucina i hałasoŭ z Uschodniaha błoka abraŭsia prezidentam MAK. Jaho papiarednik, amierykaniec Eviery Brendedž, trymaŭ MAK, niby toj klaštar, u adasoblenaści ad śvietu.

Samaranč zaviazaŭ suviazi z kiraŭnikami dziaržavaŭ, AAN i suśvietnych kancernaŭ, a taksama padvysiŭ prybytki ad telerekłamy i abjomy sponsarskich achviaravańniaŭ ź plus‑minus nula da bolš čym dvuch miljardaŭ dołaraŭ za Alimpijadu. Akramia hetaha, jon pieraškodziŭ Zalcburhu pryniać zimovyja Alimpijskija hulni 2014 h. Što było apošniaj sumiesnaj akcyjaj Samaranča i prezidenta Rasii Uładzimira Pucina.

U 1998 h. Samaranč zaprasiŭ 75‑hadovaha Lea Valnera ŭ MAK. Kiemlivy mieniedžer kampanii Casinos Austria źjaŭlaŭsia tym typam čałavieka, jaki byŭ duža daspadoby Samaranču. Azy svajho majsterstva Valner spaścih, pracujučy daradcam bundeskanclera Jozefa Kłaŭsa. Jašče da taho, jak Kłaŭs prajhraŭ vybary ŭ 1970 h., Valner paśpieŭ zrabicca šefam Casinos Austria i zastavaŭsia na hetaj kiraŭničaj pasadzie z 1968 pa 2007 h. Jon zdoleŭ pieratvaryć hetuju žabrackuju kantoru ŭ najbujniejšaha padatkapłatnika Aŭstryi, jaki vałodaje chramami azartnych hulniaŭ u mnohich krainach.

Samaranč davieryŭ aŭstryjcu‑palihłotu kiraŭnictva kantrolnymi kamisijami MAK, to bok skarbnicaj. Pracujučy ŭ MAK, Lea Valner zajmieŭ kantakty ź biznesoŭcami ź Izraila, Aŭstralii, Hankonha i Sinhapura (i šmatlikimi inšymi). Vielmi vierahodna, što Casinos Austria vyhadna skarystalisia z alimpijskaha duchu i jaho suśvietnaj sietki.

Mahčyma, ideja zaprašać da ekanamičnaha supracoŭnictva takich partnioraŭ, jak biełaruski dyktatar Alaksandr Łukašenka, źjaviłasia ŭ nietrach samoha MAK, jaki ŭsprymaje hrošy i sport nie jak supiarečnyja elemienty, a jak spałučanyja sasudy. Nacyjanalny alimpijski kamitet Aŭstryi ŭ takim vypadku moh syhrać rolu kurjera‑inkasatara. Varta pryznać, što hleba, na jakoj isnuje NAK Aŭstryi (jak i aŭstryjski sport u cełym), ščodra ŭvilhatniałasia ź lejki pradpryjemstvaŭ Valnera (kazino, łatarei, Lotto‑Toto). Adnak, zastajecca niezrazumiełym, čamu Valner (na jakoha, naturalna, raspaŭsiudžvajecca, jak i na kožnaha z nas, prezumpcyja nievinavataści) vybraŭ taki patajemny i sumnieŭny, a nie sumlenny i adkryty šlach dla taho, kab zavablivać sajuźnikaŭ u svaju spravu. Vierahodna, jaho mietad spraŭdziŭ svaju efiektyŭnaść. Ale spartovym jaho možna nazvać tolki ŭ alimpijskim sensie.

Клас
0
Панылы сорам
0
Ха-ха
0
Ого
0
Сумна
0
Абуральна
0