Adpačynak Alaksandra Łukašenki ŭ Alpach vaśmihadovaj daŭniny akazaŭsia ŭ centry karupcyjnaha skandału ŭ Aŭstryi. Zaprašajučy bok apłaciŭ vizit praz sakretny rachunak, u abychod aŭstryjskich zakonaŭ. Kaštavała pajezdka Alaksandra Łukašenki 200 tysiač jeŭra. Ciapier spravaj zajmajecca aŭstryjskaja prakuratura.

Na śled hetaj historyi natrapiŭ aŭstryjski žurnalist i spartovy ekśpiert Ervin Rot . Na prośbu Redakcyi NN jon pieradaŭ kopii niekatorych kvitancyj na apłatu adpačynku Alaksandra Łukašenki ŭ 2002 hodzie ŭ Alpach.

Materyjały cikavyja tym, što pralivajuć śviatło na pobyt biełaruskaha prezidenta na aŭstryjskim kurorcie Zejefield. Pry ŭvažlivym razhladzie robicca zrazumieła:

adpačynak Alaksandra Łukašenki byŭ daloka nie takim šykoŭnym, jak heta padajecca na pieršy pohlad.
U peŭnym sensie jaho navat možna nazvać dosyć ścipłym.
Pavodle rachunka z hatela Kosterbräu, u im pasialiłasia 17 čałaviek biełaruskaj delehacyi. Luks, u jakim žyŭ biełaruski prezident, kaštavaŭ bolš za 700 jeŭra ŭ sutki.
Zrešty, heta całkam adpaviadaje statusu hościa. A voś astatnija ŭdzielniki delehacyi zasialilisia ŭ całkam zvyčajnyja luksy. Pry hetym pałova ludziej zasialiłasia ŭ dvuchmiascovyja numary. Syny Alaksandra Łukašenki taksama spynilisia razam u dvuchmiascovym numary, pryčym nie ŭ samym darahim.

Hatelnyja pasłuhi (badaj, siudy ŭklučana i charčavańnie) skłali prykładna 50 jeŭra ŭ dzień na čałavieka — zvyčajny košt viačery ŭ dobraj restaracyi.


Rachunak hatela Klosterbräu za pražyvańnie biełaruskaj delehacyi i pradstaŭnikoŭ aŭstryjskaha boku.

Kvitancyja za arendu łyžnaha i chakiejnaha ryštunku. Varta adznačyć, što rachunak vypisana da apłaty na imia NAK Aŭstryi.

Hatel Klosterbräu.

Uvohule, hatel Klosterbräu — choć i davoli darahi, piacizorkavy, ale daloka nie elitarny. Chutčej, jon aryjentujecca na siamiejny adpačynak. Z vodhukaŭ naviednikaŭ na sajcie hatela možna zrabić vysnovu, što tudy pryjazdžajuć, u asnoŭnym, siamiejnyja pary, jakija naležać da stabilnaha aŭstryjskaha siaredniaha kłasa. Voś tolki siaredniaha biełaruskaha zarobku na adpačynak usio-taki nie chopić. Ceny na pakoi ŭ hateli Klosterbräu možna pabačyć tut.


Frahmient kvitancyi na prakat łyžnaha ryštunku. Imia klijenta — Alaksandr.
Z kvitancyjaŭ vynikaje, što Alaksandr Łukašenka atrymaŭ nievialikuju traŭmu ściahna pry koŭzańni na łyžach. Viertalot chutkaj dapamohi pieravioz prezidenta ŭ miascovuju kliniku. Taksa za chvilinu palotu: 66 jeŭra, ahułam mašyna nalatała na 7260 jeŭra.
100 jeŭra kaštavaŭ ahlad doktara, 200 jeŭra — ličbavy renthien, 5 jeŭra plonka dla renthiena, mahnitna-rezanansny zdymak ściahna – 585 jeŭra. Naŭrad ci biełaruskamu prezidentu vystavili admysłova zavyšany rachunak, chutčej za ŭsio heta – standartnyja ceny na miedycynskija pasłuhi takoha kštałtu. Tamu, kali raptam pajedziecie na aŭstryjski harnałyžny kurort, nie zabudźciesia pra strachoŭku – inakš dapamoha doktara ŭlacić vam u kapieječku. Zrešty, u hetym vypadku takoj prablemy nie ŭźnikła: miedycynskija vydatki apłaciŭ aŭstryjski bok.

Rachunak za terminovaje miedycynskaje absłuhoŭvańnie Alaksandra Łukašenki ŭ suviazi z atrymanaj traŭmaj na łyžnaj trasie ŭ Aŭstryi. Uklučna z evakuacyjaj na viertalocie.
Całkam pajezdka prezidenckaj delehacyi na adpačynak u Aŭstryju kaštavała kala 200 000 jeŭra. Vialikaja ahulnaja suma častkova vynikaje sa zvyčki Alaksandra Łukašenki adpačyvać vialikaj kampanijaj, sa svajakami i prybližanymi.
Adnak asnoŭny košt skłali, pavodle źviestak Ervina Rota, arenda samalotaŭ dla avijapieralotaŭ i arhanizacyja dabračynnaha chakiejnaha turnira dla dapamohi achviaram Čarnobyla (usie vydatki taksama apłaciŭ aŭstryjski bok).
Abałonka tajamničaści vakoł žyćcia biełaruskaha prezidenta stvaraje prydatnuju atmaśfieru dla raznastajnych plotak. Adnak jaho pobyt u hetym kankretnym vypadku vyhladaje našmat bolš prazaičnym, čym heta časam maluje masavaja fantazija.
Eskapady rasijskich aliharchaŭ u jakim-niebudź Kurševeli vyhladajuć nieparaŭnana bolš raskošnymi, čym prezidencki adpačynak 2002 h. u Alpach.
Ź jurydyčnaha punktu hledžańnia Alaksandra Łukašenku papraknuć niama ŭ čym. Prezident Nacyjanalnaha alimpijskaha kamitetu Aŭstryi zaprasiŭ jaho ź siamjoj na adpačynak – čamu b nie źjeździć?
U biełaruskich padatkapłatnikaŭ u hetym vypadku taksama nie pavinna być pretenzijaŭ — jany na kanikuły prezidenta nie patracili ni rubla (što całkam paćviardžajuć kvitancyi). Uličvajučy toje, što prezidentu, jak ni kruci, adpačyvać treba — vyjšła navat značnaja ekanomija.
Adnak z palityčnaha punktu hledžańnia prezidentu prymać padarunak u vyhladzie apłačanaha adpačynka koštam 200 000 jeŭra — nieetyčna i zahanna.
Paŭstajuć pytańni nakont taho, jakija matyvy mieŭ aŭstryjski bok, kali vyrašyŭ zrabić taki bolš čym ščodry padarunak.
Niama čaho dzivicca, što aŭstryjskija arhanizatary, a kali kazać bolš dakładna — kampanija Casinos Austria, vyjavilisia nie duža sumlennymi haspadarami.
Aficyjnaje zaprašeńnie Alaksandru Łukašenku było dasłana ad imia tahačasnaha prezidenta NAK Aŭstryi Lea Valnera, jaki adnačasova źjaŭlajecca suŭładalnikam bujnoj sietki kazino Casinos Austria. Niesumnienna, biełaruski bok zdahadvaŭsia pra toje, što spadar Valner zacikaŭleny nie tolki ŭ spartovym supracoŭnictvie, ale i ŭ tym, kab pašyryć svoj biznes na Biełaruś. Tym bolš, što Casinos Austria — heta mahutnaja kampanija, najbujniejšy płacielščyk padatkaŭ u aŭstryjskuju kaznu. Adnak, jak vyjaviła žurnalisckaje rasśledvańnie Ervina Rota,
Lea Valner vyrašyŭ apłacić adpačynak svajho hościa praz sakretny rachunak, u abychod aŭstryjskich zakonaŭ. Daradcam biełaruskaha prezidenta naŭrad ci heta było viadoma, bo aficyjna ŭsie rachunki na apłatu padarožža vypisvalisia na imia NAK Aŭstryi (kab pierakanacca ŭ hetym, dastatkova zirnuć na čeki). I tolki Lea Valner viedaŭ, što rachunak hety — patajemny, i hrošy na jaho pieravodziacca z Casinos Austria…
Praŭda ŭspłyła, u Aŭstryi pačalisia revizii, raźbiralnictvy. Ci nie hety niesurjozny padychod Lea Valnera zrabiŭsia pryčynaj taho, što Casinos Austria dahetul nie zdoleli prabicca na biełaruski rynak?

Uvohule, ničoha kardynalna novaha pra Alaksandra Łukašenku hetaja historyja z adpačynkam u Alpach nie adkryła. A voś sama Aŭstryja, hety špijonski raj Jeŭropy, paŭstaje ŭ niečakanym śviatle.

Usiu hetuju historyju raskryŭ spartovy ekśpiert i žurnalist Ervin Rot. Jon pravioŭ ułasnaje rasśledavańnie pa śladach revizii, jakaja adbyłasia ŭ Nacyjanalnym alimpijskim kamitecie Aŭstryi. Vynik jaho ahałomšyŭ: miarkujučy pa ŭsim, tahačasny kiraŭnik aŭstryjskaha NAK łabiravaŭ intaresy padkantrolnaha jamu hulniovaha biznesu, spadziejučysia pašyryć jaho na Biełaruś. Hutarku z Ervinam Rotam čytajcie tutaka. «Heta byŭ ščodry pryjom», kaža žurnalist.
Piša ŭpłyvovaja aŭstryjskaja hazieta «Die Presse»:
«Spadar Rot adčyniaje svaju čyrvonuju tečku. U joj — čeki i kvitancyi, jakija raspaviadajuć historyju šykoŭnaha padarožža Łukašenki i sakretnaha rachunka NAK Aŭstryi, jaki byŭ adčynieny ŭ 2001 h. u banku Raiffeisen Bank pa inicyjatyvie Lea Valnera. 3 sakavika 2002 h. prezident razam z žonkaj, synami i śvitaj palacieŭ na 14 dzion u Tyrol. Košt padarožža — kala 200 000 jeŭra. Kampanija pasialiłasia ŭ dvuch fajnych hatelach pablizu kazino. U dabračynnym chakiejnym turniry dla achviaraŭ Čarnobyla Łukašenka zabiŭ try hały. Da imprezy dałučyŭsia znakamity DJ Otzi. Kaštavała heta 47 000 jeŭra. U tečcy Rota padšytyja čeki na apłatu hatelnych numaroŭ, prakat hornych łyžaŭ, arendu hornych bunhała. Naprykład, bunhała Rosskopfhutte: 16 sakavika 2002 h., košt arendy 1006,40 jeŭra, zamoŭlena 70 butelek śpirtovych napojaŭ. Na čekach — naniesienaja rukoj čałavieka paznaka: «Casino Austria, NAK Aŭstryi».
Aŭstryjskaja hazieta «Kurier» piša:
«Pavodle našych źviestak, były kiraŭnik NAK Aŭstryi i šef Casinos Austria Lea Valner moža być uciahnuty ŭ skandał hłybiej, čym heta ŭjaŭlałasia raniej. Naprykancy 2001 h. Valner adčyniŭ patajemny rachunak ad imia NAK Aŭstryi, praź jaki ciaham niekalkich hod byli pierapampavanyja miljony jeŭra. Bolš za toje: na pačatku 2002 h. praz hety rachunak pravodzilisia hrošy dla taho, kab łabiravać intaresy karparacyi Casinos Austria. Kankretna hutarka idzie pra zaprašeńnie biełaruskaha kiraŭnika ŭ sakaviku 2002 h. Heta była šykoŭnaja pajezdka dla palityka, jakim, praz kiepskuju situacyju z pravami čałavieka ŭ Biełarusi, mižnarodnaja supolnaść pahardžała jak «apošnim dyktataram Jeŭropy».
«Die Presse» zadajecca pytańniem: «Jaki byŭ intares NAK Aŭstryi zaprašać Łukašenku ŭ Aŭstryju?»
«Anijakaha», — ličyć Rot. Sakretny rachunak byŭ stvorany z adzinaj metaj: vyrašyć dylemu, jakaja paŭstała pierad Casinos Austria. U Jeŭrasajuzie čynoŭnikam zabaronienyja aficyjnyja kantakty z dyktataram Łukašenkam. Ale ž Valner zaprasiŭ usiaho tolki prezidenta NAK Biełarusi. To bok Łukašenku. Ekspansija na ŭschod musiła praciahvacca. Voś jak prakamientavaŭ Valner heta vydańniu «Presse am Sonntag»: «My dziejničali ŭ ekanamičnych intaresach Aŭstryi». Sapraŭdy, mnohija aŭstryjskija firmy zacikaŭlenyja ŭ pracy na 10‑miljonnym biełaruskim rynku.

Cikava, što pytańniem pra toje, čamu Łukašenka sa śvitaj adpačyvaje ŭ demakratyčnaj Aŭstryi, zadavaŭsia jašče pad čas jahonaha vizitu aŭstryjski časopis «Profil». I pryjšoŭ da vysnovy: Casinos Austria spadziavalisia zajmieć pieravahi na biełaruskim rynku. Pravaja ruka Lea Valnera, dyrektar kampanii Casinos Austria Hierchard Škof zrabiŭ pad čas sprečnaha vizita Łukašenki nastupnuju zajavu: «Kali Biełaruś pažadaje zajmieć kazino, u nas buduć u rukach najlepšyja karty». Adnak, miarkujučy pa ŭsim, «karta nie pajšła». Kampanija Casinos Austria tak i nie zdoleła prabicca na biełaruski rynak. Sakretnym rachunkam NAK Aŭstryi ščylna zaniałasia prakuratura krainy.

* * *

Daviedka. Aŭstryjski kapitał u Biełarusi

«Velcom». Akcyi mabilnaha apieratara trapili ŭ ruki aŭstryjcaŭ praz Kipr. Spačatku ŭ žniŭni 2007 hoda Biełaruś pradała dziaržaŭnyja 51% akcyj pradpryjemstva «Mabilnaja ličbavaja suviaź» kiprskaj «SB Telecom» za $300‑500 miljonaŭ. Ale ŭžo praź niekalki miesiacaŭ Telecom Austria Group pierakupiła 70% akcyj Velcom, zapłaciŭšy našmat daražej — miljard dalaraŭ. Ciapier havorka idzie i pra astatniuju častku akcyj. Jany mohuć być vykupleny aŭstryjcami da kanca hoda za 320 miljonaŭ jeŭra.

«Pryjorbank». U pačatku 2003 hoda aŭstryjski chołdynh Raiffieisien Intiernational Vietieiligungs AG vykupiŭ 50% akcyj banka. Košt kantrakta — 30,6 miljona jeŭra. U dalejšym dola aŭstryjcaŭ była daviedziena da 87,74%.

«Motavieła». Inviestycyjnaje fijaska. Aŭstryjskaja kampanija ATEC vykupiła zavod u 2007 hodzie mienš čym za $10 miljonaŭ. Apošnim časam inviestar sutyknuŭsia ź finansavymi ciažkaściami. Miesiac tamu pieršy vice‑premjer Uładzimir Siamaška z sumam kanstatavaŭ, što «Matavieła» spyniłasia.

Škłazavod «Jalizava». Zavod na Mahiloŭščynie dastaŭsia aŭstryjskaj toj samaj ATEC ad kanadcaŭ u 2001. Pilnuju ŭvahu kiraŭnictva Biełarusi mienavita da hetaj adnosna nieviadomaj aŭstryjskaj kampanii tłumačyli rasijskimi karaniami biznesu.

Drevaapracoŭčy zavod. Aŭstryjskaja kampanija Kronospan Holding Limited choča ŭkłaści 150 miljonaŭ jeŭra ŭ stvareńnie vytvorčaści ŭ Biełarusi. Prapanova miesiačnaj daŭniny atrymała ŭchvaleńnie ŭładaŭ.

Usiaho ž u 2009 hodzie ŭ Biełarusi było zarehistravana 18 pradstaŭnictvaŭ aŭstryjskich kampanijaŭ i 69 pradpryjemstvaŭ z udziełam aŭstryjskaha kapitału.

* * *

Daviedka. Zamiežny handal Biełarusi i Aŭstryi

    2007. $205 miljonaŭ
    2008. $254 miljonaŭ
    2009. $170 miljonaŭ

Krainy‑liderki pa inviestycyjach u Biełaruś pa vynikach 2009

    Rasija 65%
    Aŭstryja 10% (kala $1 miljarda)
    Kipr 6%
    Krynica: Biełstat
Клас
0
Панылы сорам
0
Ха-ха
0
Ого
0
Сумна
0
Абуральна
0

Chočaš padzialicca važnaj infarmacyjaj ananimna i kanfidencyjna?