Kaardynatar Apazicyi BNF u Viarchoŭnym Saviecie 12 sklikańnia palemizuje sa eks-śpikieram parłamienta.

Interviju byłoha staršyni Viarchoŭnaha Savieta 12‑ha sklikańnia, hienerał‑lejtenanta Miečysłava Hryba Vitalu Cyhankovu, nadrukavanaje ŭ hazecie «Svobodnyje novosti plus» i źmieščanaje na sajcie NN, u jakim jon sprabuje pakazać siabie abaroncam demakratyi, a deputataŭ Apazycyi BNF asobami, jakija pieraškadžali jamu hetuju demakratyju abaraniać, — vymahaje niekalkich udakładnieńniaŭ.

Pieršaje. Apazycyja BNF nie mahła stanoŭča ŭspryniać abrańnie Hryba na pasadu staršyni VS u studzieni 1994 h., pakolki raniej jon jak staršynia Kamisii VS pa abaronie i nacyjanalnaj biaśpiecy nabyŭ u VS imidž reprezentanta pramaskoŭskich siłaŭ. Pryhadajem, što paśla adnaŭleńnia Niezaležnaści ŭ žniŭni 1991 h., Apazycyja BNF patrabavała stvareńnia ŭłasnaha vojska i farmulavańnia vajskovaj daktryny, jakaja b adpaviadała intaresam Biełarusi, a nie Rasiei. Kiraŭnictva ž vajskovaha viedamstva i profilnaja parlamenckaja kamisija zaniali supraćlehłuju pazycyju.

U 1991—1993 hh. ź biełaruskaha vojska było zvolniena niekalki sotniaŭ aficeraŭ‑aktyvistaŭ BZV (Biełaruskaha zhurtavańnia vajskoŭcaŭ), jakija žadali prynieści prysiahu na viernaść Biełarusi — u toj čas jak u Ministerstva abarony byli pieraviedzienyja na pracu dziesiatki aficeraŭ z Rasiei, jakija absalutna adkryta vystupali za adnaŭleńnie SSSR. U 1992 hodzie «Źviazda» nadrukavała zajavu z hetaj nahody, padpisanuju, akramia 55 deputatami VS, Vasilom Bykavym i inšymi pradstaŭnikami nacyjanalnaj intelihiencyi. U 1992—1993 hh. značnaja častka vysiłkaŭ BNF była nakiravanaja na toje, kab supraćstajać uciahvańniu Biełarusi ŭ arbitu vajskovych intaresaŭ Rasiei, jakoje vyjaŭlałasia ŭ dałučeńni da systemy Kalektyŭnaj biaśpieki SND. Mienavita M. Hryb, jak staršynia parlamenckaj kamisii, vykonvaŭ rolu «tarana», jaki prabivaŭ ustupleńnie Biełarusi ŭ hetuju systemu.

Mienavita Hryb i na sesijach, i na Prezydyjumie VS prymušaŭ (ci skažam bolš miakka — nastojliva pierakonvaŭ) tahačasnaha staršyniu VS Šuškieviča padpisać damovu ab Kalektyŭnaj biaśpiecy (što Šuškievič i zrabiŭ 31 śniežnia 1993 h., zrešty, nie ŭratavaŭšysia ad adstaŭki). Narešcie, adrazu paśla abrańnia śpikieram VS hienerał‑lejtenanta milicyi M. Hryba milicyja pačała zatrymlivać aktyvistaŭ BNF, čaho z momantu adnaŭleńnia Niezaležnaści, ad žniŭnia 1991‑ha, nie było (pieršyja zatrymańni — pačatak lutaha 1994, u stenahramach sesii VS jość vystup aŭtara hetych radkoŭ z hetaj nahody).

Druhoje. U sakaviku 1994 hoda mienavita śpikier VS M. Hryb nastajaŭ na ŭviadzieńni ŭ Biełarusi prezydenckaj ułady. Tak, jon pravioŭ rašeńnie ab hałasavańni pajmiennymi biuleteniami pa tych raździełach Kanstytucyi, jakija praduhledžvali ŭviadzieńnie prezydenckaj ułady. Hetaje rašeńnie supiarečyła Rehlamentu VS, Apazycyja BNF udziełu ŭ im nia brała i zajaviła pra jaho nielehitymnaść.

Treciaje. Sa słoŭ Miečysłava Ivanaviča składajecca ŭražańnie, što ŭ krasaviku 1995‑ha jon nibyta byŭ na baku deputataŭ BNF i vystupaŭ suprać prapanavanaha Łukašenkam referendumu ab źmienie dziaržaŭnaj symboliki, likvidacyi statusu biełaruskaj movy jak adzinaj dziaržaŭnaj, ekanamičnaj intehracyi z Rasiejaj i pravie prezydenta raspuskać VS. Ale deputaty BNF jaho, jak jon kaža, «kinuli». Nasamreč, śpikier M. Hryb nie rabiŭ ničoha, kab zablakavać referendum Łukašenki.

Nahadaju, što dyskusija išła niekalki dzion, deputaty Apazycyi BNF vystupili dziesiatki razoŭ i z trybuny, i ad mikrafonaŭ, pravodzili kuluarnyja pieramovy, ale mienavita ŭ tym liku i tamu, što ad śpikiera M. Hryba nie było nijakaj padtrymki, da 11 krasavika 1995 h. my vyčarpali ŭsie mahčymaści «parlamenckim» čynam ŭpłyvać na sytuacyju. Zastavałasia haładoŭka. Fakt, što tolki paśla abviaščeńnia nami haładoŭki pytańni, vyniesienyja Łukašenkam na referendum, pačali nie nabirać naležnaj kolkaści hałasoŭ deputataŭ i «pravalvacca».

Adnak 12 krasavika, paśla načnoha źbićcia deputataŭ BNF, M. Hryb vioŭ sesiju całkam u rečyščy intaresaŭ Łukašenki, chacia ranicaj, kali źbityja deputaty pryjšli da jaho ŭ kabinet, byŭ nastrojeny nibyta rašuča. Ja razumieju, jakija sposaby ŭździejańnia mahli prymianić da M. Hryba ci jaho rodnych ludzi z atačeńnia Łukašenki — ale nia varta ŭ svaich dziejańniach (dakładniej, adsutnaści dziejańniaŭ) abvinavačvać tych, chto ŭ svaim supraćstajańni Łukašenku byŭ paśladoŭnym.

Čaćviertaje. Absalutna niezrazumieła, čamu ŭ siaredzinie 1995 hoda Hryb addaŭ budynak Viarchoŭnaha Savieta pa vuł. Karła Marksa kiraŭnictvu spravami prezydenta (budynak — skažu ŭžo adkrytym tekstam — u vypadku mocnaj pazycyi kiraŭnictva VS, možna było pieraŭtvaryć u krepaść, što, nakolki mnie viadoma, ciapier i zroblena Łukašenkam). Ale, jak pamiataju, i aŭtamabil (‑li), i achova, i ŭradavaja suviaź byli ŭ śpikiera VS Hryba ŭvieś 1995 hod. I hałoŭnaje — da peŭnaha momantu zastavałasia mahčymaść apelavać da naroda. Adnak hetaha Miečysłaŭ Ivanavič Hryb nie zrabiŭ.

Ale pa‑piataje, chacieŭ by ŭsio ž addać naležnaje Miečysłavu Ivanaviču za pavodziny pad čas pieršych prezydenckich vybaraŭ letam 1994 hoda. Tady Hryb zaniaŭ kanstruktyŭnuju pazycyju, zrazumieŭšy, jakaja niebiaśpieka ŭźnikaje z prychodam Łukašenki.

Jašče nie nadyšoŭ čas kazać pra ŭsie akaličnaści, ale kali b taki ž kanstruktyvizm vyjaviŭ i Viačasłaŭ Francavič Kiebič, Łukašenka ŭ vyniku vybaraŭ 1994 hoda prezydentam by nia byŭ.

Siarhiej Navumčyk, kaardynatar Apazycyi BNF u VS 12 sklikańnia.

 Haładoŭka deputataŭ ad apazicyi ŭ Viarchoŭnym Saviecie 11 krasavika 1995 h., źleva naprava: na prezidenckim miescypad bieł-čyrvona-biełym ściaham - Alaksandr Łukašenka, pierad prezidyumam - Zianon Paźniak, Lavonci Zdanievič, Mikałaj Kryžanoŭski, Ihar Hiermiančuk, Siarhiej Papkoŭ, u prezidyjumie siadziać - Miečysłaŭ Hryb, vice-śpikierIvan Bambiza,dalej - Aleh Trusaŭ, Ciarhiej Navumčyk, Lavon Barščeŭski, Siarhiej Antončyk, Alaksandr Šut, Piotra Sadoŭski, Valancin Hołubieŭ, Vital Małaška, Juraś Bieleńki, zianonpazniak.de.

Haładoŭka deputataŭ ad apazicyi ŭ Viarchoŭnym Saviecie 11 krasavika 1995 h., źleva naprava: na prezidenckim miescy
pad bieł-čyrvona-biełym ściaham - Alaksandr Łukašenka, pierad prezidyumam - Zianon Paźniak, Lavonci Zdanievič, Mikałaj Kryžanoŭski, Ihar Hiermiančuk, Siarhiej Papkoŭ, u prezidyjumie siadziać - Miečysłaŭ Hryb, vice-śpikier
Ivan Bambiza,dalej - Aleh Trusaŭ, Ciarhiej Navumčyk, Lavon Barščeŭski, Siarhiej Antončyk, Alaksandr Šut, Piotra Sadoŭski, Valancin Hołubieŭ, Vital Małaška, Juraś Bieleńki, zianonpazniak.de.

Клас
0
Панылы сорам
0
Ха-ха
0
Ого
0
Сумна
0
Абуральна
0