Prezident Polščy Lech Kačynski zaklikaŭ Jeŭrasajuz da salidarnaści z polskaj mienšaściu ŭ Biełarusi. «Salidarnaść vielmi nieabchodna našym ziemlakam i ŭsim tym, chto choča pieramien u Biełarusi. Heta moj abaviazak jak prezidenta — vykazać poŭnuju salidarnaść»,

— zajaviŭ Kačynski 22 lutaha ŭ Varšavie paśla sustrečy z Anžalikaj Borys i inšymi pradstaŭnikami nieaficyjnaha Sajuza palakaŭ na Biełarusi.

Kačynski, słovy jakoha pryvodzić pres-słužba prezidenta Polščy, adznačyŭ, što stanovišča polskaj mienšaści ŭ Biełarusi ŭ apošni čas prykmietna pahoršyłasia. Prezident padkreśliŭ, što jamu nikoli nie byŭ abyjakavy los palakaŭ, jakija žyvuć u Biełarusi, i jon robić kankretnyja zachady dla palapšeńnia ich stanovišča. Adnym z takich zachadaŭ Kačynski nazvaŭ niadaŭni list Alaksandru Łukašenku, u jakim jon vykazaŭ zaniepakojenaść i rašučy pratest suprać uzmacnieńnia represij u dačynieńni da SPB.

Prezident kanstatavaŭ, što

da apošniaha času dziejańni polskaha ŭrada ŭ hetym pytańni nie davali vynikaŭ, i vykazaŭ nadzieju, što situacyju palepšać zachady ŭ ramkach Jeŭrasajuza.

Kačynski padkreśliŭ, što Polšča abaraniaje nie tolki svaich ziemlakoŭ, ale taksama kaštoŭnaści i pryncypy, pryniatyja Jeŭrasajuzam.

«My abaraniajem taksama hramadzianskuju supolnaść, u ramkach jakoj jość miesca dla pravoŭ nacyjanalnych mienšaściaŭ, u dadzienym vypadku polskaj, a taksama pravoŭ apazicyi», — skazaŭ prezident.

Anžalika Borys vykazała padziaku Kačynskamu za salidarnaść. Pavodle jaje słoŭ, heta maje vielizarnaje značeńnie dla tysiač palakaŭ, i nie tolki dla tych, chto siońnia zmahajecca za svaje pravy, adznačajecca ŭ paviedamleńni pres-słužby polskaha prezidenta.

Jak paviedamiŭ pres-sakratar SPB Ihar Bancar, padčas sustrečy, jakaja doŭžyłasia bolš čym paŭhadziny, abmiarkoŭvalisia pytańni, źviazanyja ź situacyjaj vakoł Sajuza palakaŭ na Biełarusi i stanoviščam u krainie. Pavodle jaho słoŭ, Kačynski i Borys zajavili pra nieabchodnaść sumiesnych dziejańniaŭ krain ES pa abaronie pravoŭ čałavieka ŭ Biełarusi.

«Prezident ź pieršych vusnaŭ atrymaŭ adkazy na ŭsie pytańni, što jaho cikavili. Sustreča prajšła vielmi pazityŭna, i my zadavoleny jaje vynikami», — skazaŭ Bancar.

Jon vykazaŭ nadzieju, što zvarot Kačynskaha pryciahnie bolšuju ŭvahu jeŭrapiejskich palitykaŭ da situacyi ŭ Biełarusi.

Jak paviedamiŭ Bancar,

uviečary 22 lutaha zapłanavany žyvy efir z udziełam Borys na dvuch papularnych polskich telekanałach — Polsat News i TVN 24.

Ranicaj 23 lutaha Borys vylataje ŭ Brusiel dla ŭdziełu ŭ sustrečach u Jeŭraparłamiencie, a astatnija ŭdzielniki delehacyi viernucca ŭ Biełaruś.

22 lutaha na pasiadžeńni ŭ Brusieli kiraŭniki MZS krain ES vykazali zakłapočanaść situacyjaj z pravami čałavieka ŭ Biełarusi, asabliva ŭ suviazi z padziejami vakoł Sajuza palakaŭ. Pavodle słoŭ Łutca Hiulniera, pres-sakratara viarchoŭnaha pradstaŭnika ES pa źniešniaj palitycy Ketryn Eštan, ministry adznačyli, što «palityčna situacyja z polskaj mienšaściu ŭ Biełarusi nie zastałasia niezaŭvažanaj». U toj ža čas sankcyi ŭ dačynieńni da aficyjnaha Minska na pasiadžeńni nie abmiarkoŭvalisia, i asobnaj zajavy taksama pryniata nie było.

Клас
0
Панылы сорам
0
Ха-ха
0
Ого
0
Сумна
0
Абуральна
0

Chočaš padzialicca važnaj infarmacyjaj ananimna i kanfidencyjna?