Heta budzie zaležać ad taho, jak Hrecyja budzie vychodzić z najskładaniejšaha finansavaha stanu. Hrecyja trapiła ŭ daŭhavuju jamu — u hetym hodzie jana musić vypłacić 54 miljardy jeŭra albo abjavić defołt.
Urad abiacaje znajści hrošy i raźličycca pa pazykach, ale finansavyja rynki bačać situacyju našmat bolš piesimistyčna.

Pałova ad 54 młrd pavinna być vypłačana ŭ druhim kvartale. U krasaviku i traŭni kraina musić addać pa 12 miljardaŭ jeŭra.

«Nastupnyja šeść miesiacaŭ buduć mieć vyrašalnaje značeńnie. Jany stanuć vyprabavańniem dla nas i, na mižnarodnym uzroŭni, dla našaha dobraha imia», — skazaŭ prem'jer-ministr Hrecyi Hieorhijas Papandreŭ u intervju The Wall Street Journal.

Lider dziaržavy trymajecca sacyjalistyčnaha śvietapohladu i tamu nie źbirajecca abrazać sacyjalnyja vypłaty.
«Pracoŭnyja nie buduć raspłačvacca za vypraŭleńnie situacyi. My nie budziem zamarožvać ci źmianšać zarobki», — abiacaje jon.

Dziaržaŭny doŭh užo pieravysiŭ 300 miljardaŭ jeŭra. Kali ž Hrecyi pryjdziecca abjavić defołt i admovicca ad vypłat, mocny ŭdar budzie naniesieny pa finansavym siektary Jeŭrasajuza. Defołt padarvie davier da jeŭrapiejskaj valuty i pryniasie istotnyja straty finansavym kampanijam z usioj Jeŭropy.

U najhoršym vypałku Hrecyja budzie vymušanaja pakinuć zonu jeŭra, uvieści nacyjanalnuju valutu, a paśla devalvavać jaje.
Ale navat takoje razhortvańnie padziej budzie balučym udaram pa Jeŭropie. Miarkujecca, što najbolš adčuvalnym jon stanie dla Ispanii i Partuhalii. Nie majučy mahčymaści devalvavać svaju valutu — krainy ŭvachodziać u zonu jeŭra — urady buduć vymušanyja rezka skaracić realnyja zarobki.

Dniami ŚMI atrymali źviestki, što Hrecyja źviarnułasia pa dapamohu da Kitaja, što było ŭspryniata jak kryk adčaju. A kateharyčnaja admova azijataŭ stała svojeasablivym votumam niedavieru z boku Piekina. Praŭda, ministr finansaŭ Hrecyi abviarhaje ŭdzieł urada ŭ hetaj historyi: «My nie źviartalisia da Kitaja, i inviestycyjny bank nie mieŭ paŭnamoctvaŭ vieści pieramovy ad našaha imieni». Tym nie mienš, ceny hrečaskich ablihacyj praciahvajuć padzieńnie.

Pakul chvalavańni vakoł Hrecyi praciahvajucca, jeŭra za apošni miesiac źniziŭsia da dalara z suadnosinaŭ 1,51 da 1,39. Heta najmienšyja značeńni za paŭhoda.

Analityki pradkazvajuć praciah padzieńnia jeŭra ŭ bližejšyja dni, bo prablema nie zmoža vyrašycca chutka.

Vybar tut taki: kali vialikija krainy zony jeŭra (Niamieččyna, Francyja) Hrecyi dapamohuć, heta budzie ŭspryniata jak hatoŭnaść jeŭrapiejcaŭ pahadzicca ź miakčejšymi normami biudžetnaj dyscypliny ŭ zonie jeŭra. Tady jeŭra pakacicca ŭniz macniej, bo stanie jasna, što hetaja valuta nie budzie takoj dachodnaj u doŭhaterminovaj pierśpiektyvie.

U toj ža čas kali dapamoha Hrecyi akazana nie budzie, heta budzie śviedčyć ab praciahu žorstkaj finansavaj palityki. Tady jeŭra zmoža ŭtrymacca na svaich ciapierašnich pazicyjach. Adnak jeŭrazona pačnie mianiać absiahi.

Клас
0
Панылы сорам
0
Ха-ха
0
Ого
0
Сумна
0
Абуральна
0

Chočaš padzialicca važnaj infarmacyjaj ananimna i kanfidencyjna?