Ustanoŭčy źjezd maładziožnaj arhanizacyi «Małady front» pačaŭ pracu 30 studzienia ŭ pamiaškańni minskaj štab-kvatery Partyi BNF. Źjezd budzie prachodzić u zakrytym režymie,

paviedamiŭ pierad adkryćciom mierapryjemstva kiraŭnik arhanizacyi Źmicier Daškievič.

«My nie zaprašali na jaho žurnalistaŭ,

bo tut buduć vyrašacca ŭnutranyja pytańni arhanizacyi», — rastłumačyŭ jon.

Na źjezd pryjechali delehaty z usich abłaściej Biełarusi. Kiraŭnik «Maładoha frontu» nahadaŭ, što arhanizatary źjezda padavali zajaŭki na vydzialeńnie pamiaškańnia dla jaho praviadzieńnia bolš čym u dziesiać hramadskich i kulturnych ustanoŭ. «Adnak va ŭsich ustanovach u vydzialeńni pamiaškańniaŭ nam było admoŭlena. Pryčyny admoŭ standartnyja: ci pamiaškańnie zaniataje, ci ŭ im viadziecca ramont. A Minski mižnarodny adukacyjny centr admoviŭ u pamiaškańni tamu, što adzin z zasnavalnikaŭ hetaj ustanovy, Minharvykankam, nie daŭ zhodu na vydzialeńnie pamiaškańnia», — skazaŭ Daškievič.

Źjezd płanuje zaćvierdzić prahramu i statut abjadnańnia, abrać kiraŭnictva arhanizacyi, pryniać niekatoryja rezalucyi.

«Heta značyć vykanać usio toje, što nieabchodna dla rehistracyi arhanizacyi ŭ Ministerstvie justycyi», — zajaviŭ Daškievič.

Pry hetym jon adznačyŭ, što nie maje nijakich iluzij nakont mahčymaści rehistracyi arhanizacyi. «U 2006 i 2007 my raspačali ceły šerah sprob pa rehistracyi arhanizacyi. I heta pazbaŭlaje ŭładu samaha hałoŭnaha arhumientu — niby my nie žadajem rehistravacca, śpiecyjalna pravakujem situacyju. Ja nie mahu nie adznačyć, što ŭłady admaŭlajuć u rehistracyi «MF» pa nadumanych pryčynach. Kali ŭ vypadku z BCHD jość choć by farmalnyja spasyłki na jurydyčnyja rečy, to ŭ nas adsutničaje navat takaja farmalnaść. Naprykład, na sprobu zarehistravacca ŭ 2007 hodzie nam adkazali, što ŭ našaj arhanizacyi šmat asudžanych za dziejnaść ad imia niezarehistravanaj arhanizacyi. Heta značyć nas asudzili za dziejnaść niezarehistravanaj arhanizacyi, i na hetaj padstavie rehistravać admaŭlajucca. Heta absurd. Tamu ciapier prosta čarhovaja sproba zarehistravacca. My jašče raz prademanstrujem usiu absurdnaść biełaruskamu hramadstvu, mižnarodnaj supolnaści», — zajaviŭ Daškievič.

Heta budzie ŭžo šostaja z 2000 hoda sproba zarehistravać «Małady front» u Biełarusi. Aficyjna arhanizacyja zarehistravana ŭ Čechii jak mižnarodnaje maładziožnaje abjadnańnie.

Клас
0
Панылы сорам
0
Ха-ха
0
Ого
0
Сумна
0
Абуральна
0

Chočaš padzialicca važnaj infarmacyjaj ananimna i kanfidencyjna?