Rada Mižnarodnaj fiederacyi chakieja (IIHF) pryniała rašeńnie nie dapuskać zbornyja Rasii i Biełarusi da ŭdziełu ŭ spabornictvach pad ehidaj arhanizacyi ŭ siezonie-2024/25. Pra heta paviedamlaje TASS sa spasyłkaj na pres-słužbu Fiederacyi.
«Rada IIHF razhledzieła biahučyja ryzyki biaśpieki, źviazanyja z reintehracyjaj nacyjanalnych i kłubnych kamand Rasii i Biełarusi ŭ spabornictvy IIHF. Na asnovie ŭvažlivaha analizu Rada pryjšła da vysnovy, što viartańnie zbornych Rasii i Biełarusi ŭ spabornictvy IIHF pakul niebiaśpiečna, tamu hetyja zbornyja nie voźmuć udziełu ŭ siezonie-2024/25», — havorycca ŭ paviedamleńni.
«Rašeńnie taksama budzie raspaŭsiudžvacca na adchileńnie zbornaj Biełarusi ad finalnaha raŭndu kvalifikacyi na Alimpijskija Hulni 2026 hoda, jaki projdzie ŭ žniŭni 2024 hoda ŭ Bracisłavie.
Jak i raniej, IIHF praciahnie sačyć za situacyjaj. Novaje abmierkavańnie ŭklučeńnia Rasii i Biełarusi ŭ turniry pad ehidaj IIHF u siezonie-2025/26 adbudziecca ŭ mai 2025 hoda na pasiadžeńni Rady IIHF», — adznačajecca ŭ zajavie Fiederacyi.
***
U lutym 2022 hoda Mižnarodny alimpijski kamitet (MAK) rekamiendavaŭ mižnarodnym fiederacyjam nie dapuskać rasijskich i biełaruskich spartsmienaŭ da ŭdziełu ŭ spabornictvach z-za poŭnamaštabnaha ŭvarvańnia va Ukrainu. Zbornyja Rasii i Biełarusi pa rašeńni IIHF paśla rekamiendacyj MAK prapuścili čempijanaty śvietu 2022 i 2023 hadoŭ, a taksama nie vystupiać na suśvietnym pieršynstvie 2024 hoda ŭ Čechii.
Čytajcie taksama:
Rasijskich chakieistaŭ, jakija kinuli na lod uručanyja Baskavym pryzy, prymusili prabačacca
Siejm Łatvii aficyjna zabaraniŭ zbornym krainy hulać suprać zbornych Rasii i Biełarusi
