Tejłar Śvift na suśvietnaj premjery filma Taylor Swift: The Eras Tour. Fota: Chris Pizzello / AP
Jak piša Le Monde, 34-hadovaja śpiavačka Tejłar Śvift, jakuju časopis Time abviaściŭ čałaviekam hoda, doŭhi čas zastavałasia ŭ baku ad palityčnaj sceny. Heta tłumačyłasia bojaźziu zhubić svaju aŭdytoryju. Ale pačynajučy z 2018 hoda Śvift pačała vystupać u abaronu seksualnych i rasavych mienšaściaŭ.
U 2020 hodzie śpiavačka ŭpieršyniu adkryta zajaviła, za kaho budzie hałasavać na prezidenckich vybarach. I heta byŭ supiernik Donalda Trampa Džo Bajden, jaki ŭ vyniku pieramoh. Nakolki ŭ hetym była zasłuha Śvift, ciažka mierkavać. Ale novaja vybarčaja kampanija, jakaja ŭ hety čas aktyŭna idzie ŭ ZŠA, supała ź pikam papularnaści i ŭpłyvovaści śpiavački.
U sakaviku 2023 hoda Śvift adpraviłasia ŭ The Eras Tour, jaki ŭzarvaŭ płatformu anłajn-prodažu biletaŭ Ticketmaster adrazu paśla zapusku. Film-kancert, jaki vyjšaŭ u kinateatrach ZŠA 13 kastryčnika 2023 hoda, staŭ samym kasavym kancertnym filmam u historyi i atrymaŭ naminacyju na «Załaty hłobus». Śvift zabrała dzieviać statuetak MTV Video Music Awards 2023 i pabiła rekord, atrymaŭšy ŭznaharodu za lepšaje videa hoda čatyry razy.
Ab palityčnaj upłyvovaści śpiavački havorać fakty. 19 vieraśnia 2023 hoda Tejłary Śvift zaklikała svaich maładych fanataŭ u instahramie, dzie jana maje 280 miljonaŭ padpisčykaŭ, zarehistravacca ŭ jakaści vybarščykaŭ. U toj ža dzień heta zrabili 35 252 čałaviek.
Pobač z hetym vialikuju cikaŭnaść vyklikaje asabistaje žyćcio śpiavački. Usie tabłoidy raspaviadajuć ab jaje adnosinach z zorkaj kamandy pa amierykanskim futbole «Kanzas-Sici Čyfs» Trevisam Kełsi. Adnak šmat chto vykazvaje padazreńnie, što ŭ pary fiktyŭny raman. Hetyja razmovy dapaŭniajuć vykazvańni ab imknieńni śpiavački paŭpłyvać na vyniki prezidenckich vybaraŭ.
U listapadzie telekanał NBC News vyjaviŭ, što rejtynh padtrymki śpiavački siarod zarehistravanych vybarščykaŭ nie tolki vyšejšy, čym u jaje kalehi pa cechu Biejonsie, ale i čym va ŭsich patencyjnych kandydataŭ na vybarach 2024 hoda: dziejnaha prezidenta Džo Bajdena, vice-prezidenta Kamały Charys, novaha śpikiera Pałaty pradstaŭnikoŭ Majka Džonsana, byłoha prezidenta Donalda Trampa, hubiernatara Fłarydy Rona Desancisa i byłoj pradstaŭnicy ZŠA ŭ AAN Niki Chejli.
Taki rejtynh nie moh nie vyklikać paniki ŭ prychilnikaŭ Trampa. «Toje, što adbyvajecca z Tejłar Śvift, nienaturalna», — zaŭvažyŭ na X u pačatku śniežnia vieteran-daradca Donalda Trampa Styvien Miler. Na kanale Fox News 9 studzienia možna było bačyć zastaŭku «Ci zjaŭlajecca Tejłar Śvift ahientam Pientahona?», a viadučy Džesi Uoters zadavaŭsia pytańniem, chto zahadaŭ śpiavačcy klikać maładych ludziej na vybary.
Analityki adznačajuć vialiki ŭpłyŭ śpiavački na maładuju aŭdytoryju, jakaja moža akazać vyrašalnaje ŭździejańnie nie tolki na vyniki prezidenckich vybaraŭ u listapadzie hetaha hoda, ale i na vybary ŭ Pałatu pradstaŭnikoŭ i Sienat.
U 2020 hodzie ŭ hałasavańni pryniali ŭdzieł kala 48% maładych ludziej va ŭzroście ad 18 da 29 hadoŭ u paraŭnańni z 40% u 2016 hodzie. Šyrokaja mabilizacyja hetaha siehmienta nasielnictva maje vyrašalnaje značeńnie dla Džo Bajdena, rejtynh jakoha rezka źniziŭsia paśla taho jak jaho administracyja ćviorda padtrymała Izrail u vajennym kanflikcie ŭ siektary Haza.
U takoj situacyi Džo Bajden maje namier vynieści ŭ centr svajoj kampanii dźvie asnoŭnyja temy: prezidenctva Trampa stavić pad pahrozu amierykanskuju demakratyju i prava na abort. Ale jamu patrebny ŭpłyvovyja asoby, jakija znachodziacca pa-za miežami kłasičnaj palityki, kab kampiensavać ułasnyja słabyja miescy, pačynajučy z pavažnaha ŭzrostu.
Z takoha punktu hledžańnia, jak piša New York Times, padtrymka Tejłar Śvift budzie «samaj śmiełaj maraj». Pa infarmacyi vydańnia, atačeńnie kandydata navat prapanavała ideju ab zjaŭleńni Džo Bajdena na scenie padčas etapu The Eras Tour.
Čytajcie jašče:
Time nazvaŭ čałavieka hoda. Vybar dosyć niečakany (abo čakany)
Tejłar Śvift stała miljarderkaj
Fanaty Tejłar Śvift vyrašyli adpomścić hulcu «Barsiełony». I ŭ ich niabłaha atrymałasia
Bielhijski ŭniviersitet zapuskaje kurs analizu tekstaŭ Tejłar Śvift
