Andreju Bremšmitu 38 hadoŭ. Jon minčuk. Da zatrymańnia byŭ dyrektaram budaŭničaj kampanii «Alfabudsnab».
Taksama mužčyna byŭ miascovym deputatam u Zasłaŭi, dzie była zarehistravanaja jahonaja firma. I navat byŭ u vybarčaj kamisii na parłamienckich vybarach u 2019-m.
Mužčyna viadomy ŭ kołach tak zvanych ałkaminimalistaŭ — heta ludzi, jakija kalekcyjanujuć mini-butelki ad ałkaholu abjomam da 50 mililitraŭ. Taksama jon udzielničaŭ u schodach kalekcyjanieraŭ u roznych krainach.
Apošniaje, što pra jaho viadoma — mužčyna ŭ kancy maja 2023-ha jeździŭ u Litvu. U čatach jon raskazvaŭ, za jaki čas prajšoŭ miažu i što chutka źbirajecca viartacca ŭ Biełaruś.
Andrej — čałaviek niepubličny i nie viadzie sacsietak, prynamsi, pad svaim imiem. A ŭ siecivie zusim niašmat jahonych fota.
Imavierna, nieŭzabavie jaho zatrymali. Jaho vinavaciać u «finansavańni terarystyčnaj dziejnaści» i «finansavańnie dziejnaści ekstremisckaha farmiravańnia». Za heta jamu pahražaje da 15 hadoŭ turmy.
Pa našych źviestkach, jon nie adziny, chto apošnim časam patrapiŭ pad pieraśled pa hetym artykule. Prynamsi pra niekatorych ludziej viadoma, što jany achviaravali kryptavalutu i ich jašče čakaje sud.
My padrabiazna pisali pra toje, jak deananimizuć tych, chto achviaruje kryptavaluty. Kali spraścić — praź nienadziejnyja biržy abo pryvatnych «pierakupaŭ», a taksama publikacyju ŭłasnych rekvizitaŭ u inšych krynicach.
Kali vy achviaravali na inicyjatyvy, pryznanyja «terarystyčnymi» abo «ekstremisckimi» i nie prymali składanych zachadaŭ, kab supraćstajać vašaj deananimizacyi, to vas moža čakać kryminalny pieraśled. Važna ŭličvać hetuju ryzyku, asabliva kali vy padumvajecie pra viartańnie ŭ Biełaruś.
«Naša Niva» — krynica jakasnaj infarmacyi i bastyjon biełaruščyny
PADTRYMAĆ «NN»Čytajcie taksama:
Kaho sadziać za danaty, a kamu dazvalajuć adkupicca. Voś jakaja łohika
