Śpiektakl «Tut była Kłara» (režysior Taćciana Aksionkina) stvaraŭsia pa pjesie Ksienii Štalenkovaj «Memoria Nominis Clara».

«Kali pačałasia pandemija karanavirusu, uźnikła adčuvańnie: niešta budzie niezvarotna zhublena, bo ludzi minimizavali kantakty, mnohija vymušana zastavalisia doma i kožny pieražyvaŭ svajo adčuvańnie biezdapamožnaści, jakoje zastavałasia niamym u haradskoj prastory. Heta vyvieła mianie ŭ kaardynaty razvažańniaŭ pra Chałakost, pra važnaść histaryčnaj pamiaci i pra toje, jak jana prajaŭlajecca ŭ minskim asiarodździ. Tak atrymałasia vybudavać ujaŭny dyjałoh z prababulaj — viaźnicaj Aśviencima. Heta, darečy, padšturchnuła raskazać pra siamju mastakoŭ, jakija nie pieražyli Chałakost. Chtości zahinuŭ na terytoryi Minskaha hieta, dzie ciapier znachodzicca Miemaryjał «Jama». A chtości nie zmoh spravicca ź siamiejnaj trahiedyjaj», — raspaviadała dramaturh dziaržaŭnamu vydańniu «SB. Biełaruś siońnia» za niekalki dzion da premjery.

I ŭ hetaj publikacyi, i ŭ sacyjalnych sietkach Teatra śćviardžałasia, što pieršy pakaz adbudziecca 27 studzienia. Ale zatym na aficyjnym sajcie źjaviłasia infarmacyja ab admienie śpiektakla — nibyta z-za chvaroby akciora.

A ŭžo ŭ dzień premjery, 27 studzienia, u sacyjalnych sietkach moładzievaha była apublikavanaja infarmacyja pra toje, što «ŭ teatry praciahvajecca praca nad śpiektaklem». Heta supiarečyć infarmacyi pra chvarobu akciora jak asnoŭnaj pryčynie admieny. Bo kali pastanoŭka była hatovaja i joj pieraškodziła tolki chvaroba, unosić karekciroŭki niama nieabchodnaści.

Akramia taho, z sajta Teatra naohuł vydalili staronku pra śpiektakl. Zachavanuju kopiju možna znajści ŭ archivie. Na staroncy paznačana, što, akramia premjernaha, byŭ zapłanavany jašče adzin pakaz — 25 lutaha. Ale ciapier na hety dzień u afišy staić inšy śpiektakl — «Kachańnie ŭtraich». U lutaŭskaj afišy pastanoŭki «Tut była Kłara» niama.

Čytačy raspaviali, što ŭ pastanoŭku «Tut była Kłara» ŭmiašałasia cenzura: śpiektakl na niejkim z etapaŭ zaćviardžeńnia nie pryniali čynoŭniki. U pastanoŭku pavinny ŭnieści karekciroŭki, paśla čaho jon, mahčyma, znoŭ źjavicca ŭ afišy.

Heta nie pieršy taki vypadak. U listapadzie 2022 hoda ŭ Minskim muzyčnym teatry pryjšłosia skaracić apieretu «Hiercahinia z Čykaha» na 20 chvilin dziela dazvołu na pakaz.

Клас
1
Панылы сорам
6
Ха-ха
0
Ого
0
Сумна
1
Абуральна
7