Jurhien Kłop. Fota: Jon Super / AP

Jurhien Kłop. Fota: Jon Super / AP

Hałoŭny trenier futbolnaha kłuba «Livierpul» Jurhien Kłop vyrašyŭ pakinuć kłub pa zakančeńni siezona. Jon prapracavaŭ u «Livierpuli» vosiem siezonaŭ i ličycca adnym z samych paśpiachovych trenieraŭ kamandy za ŭsiu jaje historyju, paviedamlaje Bi-bi-si.

Pamočniki treniera Piepiejn Lejnders i Piter Kravic taksama pakidajuć kłub.

Pa słovach Jurhiena Kłopa, jon jašče ŭ listapadzie minułaha hoda paviedamiŭ kiraŭnictvu kłuba pra svoj namier syści.

«Reč u tym, što ŭ mianie, jak by heta skazać, skančajucca siły, — zajaviŭ 56-hadovy Kłop na sajcie «Livierpula». — Ja mahu zrazumieć, što ŭ hety momant dla mnohich ludziej heta šok, kali vy heta ŭpieršyniu čujecie, ale ja mahu heta rastłumačyć — ci, prynamsi, pasprabavać rastłumačyć».

«Mnie padabajecca absalutna ŭsio ŭ hetym kłubie, mnie padabajecca ŭsio ŭ horadzie, mnie padabajecca ŭsio ŭ našych zaŭziatarach, mnie padabajecca kamanda, mnie padabajecca piersanał… Mnie ŭsio padabajecca. Ale toje, što ja ŭsio ž taki prymaju hetaje rašeńnie, aznačaje, što ja pierakanany: mnie daviadziecca jaho pryniać», — skazaŭ Jurhien Kłop.

Pavodle jaho słoŭ, Kłop daŭno ŭžo zrazumieŭ, što rana ci pozna jamu pryjdziecca pryniać takoje rašeńnie, i tamu hety krok nie staŭ dla jaho vialikaj prablemaj. «Ja viedaju, što nie mahu vykonvać hetuju pracu znoŭ i znoŭ, znoŭ i znoŭ», — pryznaŭsia jon.

«Heta nie toje, čaho ja chaču, ale heta pravilna na 100%»

«Ja skazaŭ kłubu jašče ŭ listapadzie… mahčyma, z boku ludzi tak bačać maju pracu: ja kala pola, na treniroŭkach i taho padobnaje, ale bolšaja jaje častka prachodzić vakoł hetaha. Heta značyć, što siezon pačynajecca, i vy ŭžo ŭ značnaj stupieni płanujecie nastupny siezon», — raspavioŭ Jurhien Kłop.

«Kali my siadzieli tam razam i kazali ab patencyjnych kantraktach, nastupnym letniku i pra toje, ci možam my kudy-niebudź pajechać, u mianie ŭźnikła dumka: «Ja nie ŭpeŭnieny, što ja tut jašče budu». Ja sam hetamu ździviŭsia, ale, vidavočna, ja pačaŭ pra heta dumać».

Siezon 2022-23 hoda dla «Livierpula» byŭ niaŭdałym, kłub ź ciažkaściu zaviaršyŭ čempijanat na piatym miescy i nie trapiŭ u čarhovy rozyhryš Lihi čempijonaŭ.

«Minuły siezon byŭ u niejkim sensie supierskładanym, i byli momanty, kali ŭ inšych kłubach, vierahodna, rašeńnie było b takim: «Nu, dobra, vialiki dziakuj za ŭsio, ale, napeŭna, my pavinny na hetym rasstacca». Jasna, što hetaha tady nie adbyłosia».

«Dla mianie było vielmi, vielmi, vielmi važna, što ja zmahu dapamahčy viarnuć hetuju kamandu na jaje pazicyi. Heta było ŭsio, pra što ja dumaŭ. Kali ja (u hetym siezonie) davoli rana zrazumieŭ, što heta adbyłosia, što heta sapraŭdy dobraja kamanda ź vielizarnym patencyjałam i ŭ vydatnym uzroście, z supiercharaktarami i ŭsio takoje, ja zmoh znoŭ padumać pra siabie, i voś vynik. Heta nie toje, čaho ja chaču, heta prosta toje, što ja liču pravilnym na 100 adsotkaŭ».

Jurhien Kłop pryjšoŭ u «Livierpul» paśla paśpiachovych siezonaŭ u dortmundskaj «Barusii» ŭ kastryčniku 2015 hoda, pad jaho kiraŭnictvam «Livierpul» vyjhraŭ Lihu čempijonaŭ u 2019-m, u 2020 hodzie Premjer-lihu ŭpieršyniu z 1990 hoda, kłubny čempijanat śvietu, Kubak Anhlii, Kubak Lihi i Supierkubak.

Kłop pryvioz u Livierpul chutkasny, atakujučy styl, jaki fanaty prazvali «chevi-mietał» z-za intensiŭnaha presinhu.

Zaraz «Livierpul» lidziruje ŭ anhlijskaj Premjer-lizie i maje šancy znoŭ jaje vyjhrać, choć sioleta razharnułasia napružanaja baraćba za pieršynstvo pamiž «Livierpulem», «Mančester Sici» i łondanskim «Arsienałam».

«Livierpul» taksama vyjšaŭ u finał anhlijskaha Kubka Lihi i praciahvaje vystupać u Lizie Jeŭropy i Kubku Anhlii.

Čytajcie taksama:

Kłop zaprasiŭ śmiarotna chvoraha Eryksana na adzin dzień uznačalić «Livierpul»

Polski futbolny kłub admoviŭsia ad zboraŭ u Turcyi, kab nie padstaŭlać biełarusaŭ

Futbolnaja zbornaja zhulaje tavaryski matč z adnoj z najhoršych kamand Jeŭropy

Ahidniejšy za Hitlera. Apublikavany rejtynh samych nialubych pierson u historyi futboła

Biełaruski futbalist pierajšoŭ u treci kłub čempijanatu Izraila

Клас
0
Панылы сорам
0
Ха-ха
0
Ого
0
Сумна
4
Абуральна
0