Fota: spring96.org

Fota: spring96.org

Dźmitryj raspavioŭ «Viaśnie», jak administracyja kaledža zarablaje na studentach, pra prymusovyja padpiski na prapahandysckuju hazietu, jak HUBAZiK prymusiŭ jaho prysiadać 250 razoŭ i pahražaŭ raspravaju, a taksama jak u kaledž pastupiŭ zahad ab jaho adličeńni.

Vosieńniu 2020 hoda ŭ samy razhar pratestaŭ Dźmitryj pačaŭ vučycca ŭ Mahiloŭskim dziaržaŭnym kaledžy mastactvaŭ pa kłasie bajana. Chłopiec byŭ aktyŭnym i paśpiachovym vučniem, prajaŭlaŭ aktyŭnaść i chutka staŭ starastam hrupy. Ad pačatku navučańnia jon adkryta vykazvaŭ niazhodu z paborami administracyi i naviazvańniem dziaržaŭnaj ideałohii ŭ kulturnickaj ustanovie.

Dźmitryj raspaviadaje, jak sutykaŭsia z prymusovymi absurdnymi dziejańniami administracyi kaledža. Naprykład, navučencaŭ prymušali padpisvacca na prapahandysckuju hazietu, jakoj navučency nie cikavilisia.

«Na hazietu treba było skidvacca pa niekalki rubloŭ. A stypiendyja i tak, miakka kažučy, nie vielmi vialikaja. Lepš by studenty kupili sabie na hetyja hrošy maroziva».

Taksama, pa słovach chłopca, administracyja imknułasia zarabić na studentach.

«U nas, jak i va ŭsich inšych muzyčnych navučalnych ustanovach, pieryjadyčna ładzilisia spravazdačnyja kancerty roznych adździaleńniaŭ. A kiraŭnictva kaledža prymušała studentaŭ, jakija nie ŭdzielničali ŭ kancertach, nabyvać na ich kvitki i naviedvać vystupy».

Zavuč kaledža, jaki paźniej atrymaŭ pasadu načalnika adździeła kultury pa Mahiloŭskaj vobłaści, imknuŭsia vysłužycca i ładziŭ šmatlikija kancerty. A vysoki ŭzrovień padrychtoŭki da vystupu časta nie adpaviadaŭ nahodzie dla kancertu, raspaviadaje Dźmitryj. 

«Naprykład, adnojčy ŭ nas byŭ kancert z nahody «70-hodździa palikliniki». Niaredka zdarałasia tak, što vykładčyki siadzieli biez navučencaŭ, bo tyja ŭ vučebny čas vystupali na dni narodzinaŭ palikliniki».

«My pryjšli z-za tvajoj aktyŭnaści»

Pa Dźmitryja pryjšli 28 śniežnia 2022 hoda. Piać supracoŭnikaŭ HUBAZiK zatrymali chłopca padčas zaniatkaŭ u kaledžy.

«Ja byŭ vydatnikam, starastam hrupy, niamała zrabiŭ dla kaledža. Ale kali pryjšli mianie zatrymlivać, namieśnik pa vychavaŭčaj pracy navat vokam nie pavioŭ. Prosta zdaŭ mianie siłavikam».

Spačatku chłopca paviali ŭ kabiniet da namieśnika dyrektara pa vychavaŭčaj pracy, dzie ŭ Dźmitryja adrazu zabrali jahony telefon.

«Adpiracca nie było sensu. Siłaviki znajšli ŭ mianie ŭ Telehramie padpiski na «ekstremisckija ŚMI».

U jakaści pakarańnia 250 prysiadańniaŭ

Paśla zatrymańnia supracoŭniki HUBAZiK pavieźli Dźmitryja ŭ adździaleńnie KDB. Tam siłaviki kpili ź jaho daŭhich vałasoŭ, nazyvali zmaharom i pahražali raspravaju.

«Na parozie lažaŭ bieł-čyrvona-bieły ściah, pa jakim supracoŭniki prymušali prajści. A na ścianie razam z čyrvona-zialonym ściaham visieŭ rasiejski trykałor».

U kancy dopytu Dźmitryja prymusili zrabić 250 prysiadańniaŭ. Jak skazali siłaviki, «u jakaści pakarańnia». Paśla prysiadańniaŭ u jaho ŭziali adbitki palcaŭ, jakija atrymalisia vielmi nizkaj jakaści.

«Va ŭsich, chto paśla bačyŭ hetyja adbitki, była prosta «ruka-lico». A supracoŭniki RAUS, kudy mianie pryvieźli paźniej, vielmi ździŭlalisia, što možna nastolki niajakasna adkatać palcy», — kaža Dźmitryj.

Baćkam Dźmitryja pra zatrymańnie syna paviedamiŭ siłavik, kali tyja patelefanavali synu. 

«Supracoŭnik skazaŭ tolki: «Vašaha syna zatrymali». Bolš baćki ničoha pra mianie viedali».

U dakumientach było proźvišča inšaha čałavieka

U toj ža dzień u mižrajonnym adździele Śledčaha kamiteta pa Mahilovie ŭ Dźmitryja byŭ čarhovy dopyt. Paśla jaho śledčaja Julija Hłoba addała chłopcu papiery na podpis. Na pieršaj staroncy było jaho proźvišča, a na druhoj — zusim inšaha čałavieka, raspaviadaje Dźmitryj.

«Ja ŭkazaŭ śledčaj na pamyłku i jana jaje vypraviła jak ničoha nijakaha. Miarkuju, što ŭsie hetyja spravy jany zavodziać jak pad kapirku», — kaža chłopiec.

Va ŭsich ustanovach, kudy pieramiaščali Dźmitryja paśla zatrymańnia, siłaviki razmaŭlali łajankaj.

«Śledčaja Julija źviartałasia da mianie na narmalovaj movie, ale sa svaimi kalehami havaryła maciukami. Bł* i na *j dla ich prosta słovy-źviazki».

Siłavik, jaki ŭ hety čas korpaŭsia ŭ telefonie chłopca, znajšoŭ tam dadatak «Novaja Biełaruś».

«Navošta tabie hetaja novaja Biełaruś? Tabie što, staraja nie padabajecca?» — adreahavaŭ jon.

«Paśmiajalisia z «pakajalnaha» videa»

Supracoŭniki KDB, jakija supravadžali Dźmitryja ŭ Śledčy kamitet, zahadali jamu zapisać pakajalnaje videa.

Fota: spring96.org

Fota: spring96.org

«Zapisali jaho niedzie z treciaha razu. Ja nie staŭ adpiracca, bo viedaŭ pra katavańni i nie chacieŭ ich spaznać na ŭłasnym dośviedzie. Pa vyzvaleńni my z adnahrupnikam pahladzieli hetaje videa i paśmiajalisia. Bo heta poŭny absurd».

Chłopiec kaža, što nie raźličvaŭ, što jamu daviadziecca siadzieć u turmie, ale byŭ da hetaha hatovy.

«17 hadoŭ, a ŭžo ekstremist»

Viečaram taho ž dnia Dźmitryja pieraviali ŭ Mahiloŭski IČU, dzie jon prabyŭ u adzinočnaj kamiery troje sutak.

«Choć ja i ekstraviert i lublu kamunikavać ź ludźmi, ale adnosna spakojna vytrymaŭ hetyja dni ŭ adzinočnym źniavoleńni. Byŭ čas pabyć sam nasam sa svaimi dumkami. Sam sabie ździŭlaŭsia, što ŭ 17 hadoŭ mianie ŭžo zapisali ŭ ekstremisty».

Dźmitryj nieachvotna kaža, što niahledziačy na mały ŭzrost, z boku siłavikoŭ byli rukaprykładstva i maralnyja prynižeńni.

«Pastajanna kryčali, kab apuskaŭ hałavu nižej padčas kanvajavańnia. Kajdanki zašpilvali zzadu, jak ekstremistu. Ad siłavikoŭ sypalisia biaskoncyja abrazy. Ja ŭžo nie pamiataju, što jany kazali, dla mianie heta byŭ pusty zvon. Uvohule, jak kałchoźnik moža abrazić čałavieka z kulturnaj śfiery?».

Na trecija sutki, pieršaha studzienia 2023 hoda, Dźmitryja vyzvalili ź izalatara, nie papiaredziŭšy zahadzia baćkoŭ. Adzin z supracoŭnikaŭ na ŭłasnym aŭtamabili prapanavaŭ jaho advieźci dadomu.

Znoŭ dopyt i adjezd

Praź dziesiać dzion paśla vyzvaleńnia Dźmitryja znoŭ vyklikali na dopyt u Śledčy kamitet, dzie raspytvali pra čat-bot płana «Pieramoha».

«Ja čakaŭ, što mnie daduć padpisku ab niavyjeździe, ale hetaha nie adbyłosia».

Chłopiec raspaviadaje, što HUBAZiK dasłaŭ u kaledž papieru, kab administracyja znajšła farmalnuju nahodu dla jaho adličeńnia.

«Pra heta majoj maci paviedamiŭ čałaviek z administracyi. Ale ŭ mianie amal nie było propuskaŭ zaniatkaŭ i vučyŭsia ja dobra. Tamu nahodu znajści nie atrymałasia».

U SK Dźmitryju skazali, što spravu niby buduć zakryvać, ale nijakich adpaviednych dakumientaŭ nie vydali. Chłopiec vyrašyŭ nie vypraboŭvać los, atrymaŭ vizu i źjechaŭ ź Biełarusi. Ciapier jon žyvie ŭ Varšavie i zajmajecca prodažam biełaruskich knih. 

Čytajcie taksama:

Svaja krama, paśpiachovaja vytvorčaść, čytańnie knih praź videasuviaź. Što viadoma pra kałoniju, dzie siadzić Źmicier Daškievič

Što pytalisia ŭ svajakoŭ palitviaźniaŭ, jakich masava zatrymlivali ŭčora? I pry čym tut «Jedastaŭka»

«Navat kali ŭ nas ničoha nie atrymajecca, ty zaŭsiody možaš źviarnucca da mianie». Dziaŭčyna paznajomiłasia z palitviaźniem pa pierapiscy i vyjšła za jaho zamuž, a ciapier čakaje na voli

Клас
5
Панылы сорам
1
Ха-ха
1
Ого
1
Сумна
6
Абуральна
3