Piščałaŭski zamak, vyhlad źvierchu. Fota: advisor.travel
Paśla taho jak źjaviłasia infarmacyja, što niekatorych źniavolenych z Vaładarki pieravodziać u novy izalatar u Kaladzičach, biełarus pacikaviŭsia ŭ čynoŭnikaŭ, što ciapier budzie z budynkam SIZA № 1. Heta Piščałaŭski zamak, jaki ŭvachodzić u śpis historyka-kulturnych kaštoŭnaściaŭ.
Va ŭpraŭleńni kultury Minharvykankama paviedamili: abjekt znachodzicca ŭ haspadarčym padparadkavańni Departamienta vykanańnia pakarańniaŭ MUS.
«Pavodle najaŭnaj infarmacyi, vyzvaleńnie płoščaŭ płanujecca ŭ druhim kvartale 2024 hoda», — havorycca ŭ adkazie za podpisam načalnika ŭpraŭleńnia kultury Vitala Brela.
Heta značyć, da kanca červienia hetaha hoda SIZA № 1 na vulicy Vaładarskaha płanujuć vyzvalić ad źniavolenych.
«Ciapier Minharvykankamam sumiesna z zacikaŭlenymi arhanizacyjami prapracoŭvajecca pytańnie dalejšaha vykarystańnia vyšejpakazanaha abjekta ź inicyjavańniem nieabchodnych mierapryjemstvaŭ», — paviedamlajuć va ŭpraŭleńni kultury.
U viedamstvie taksama padkreślili, što zamak źjaŭlajecca historyka-kulturnaj kaštoŭnaściu, tamu rekanstrukcyju tam buduć pravodzić u adpaviednaści z Kodeksam ab kultury i inšymi zakanadaŭčymi aktami.
U kancy śniežnia 2023 hoda svajaki źniavolenych u SIZA № 1 paviedamili, što tym stali vydavać apaviaščeńni ab pieravodzie ŭ novy śledčy izalatar u Kaladzičach z 8 studzienia. Heta SIZA pieršapačatkova płanavali adkryć u 2015 hodzie, adnak u 2013 hodzie vyjavilisia fakty chabarnictva i raskradańnia budmateryjałaŭ, tamu terminy pieranieśli na 2020-y. U 2018 hodzie terminy znoŭ ssunuli — užo na 2022 hod.
16 červienia 2021 hoda vyjšaŭ novy ŭkaz, zhodna ź jakim turemnuju balnicu pavinny byli zdać u 2021 hodzie, a SIZA — u 2023-m.
Paśla pierajezdu ciapierašnich viaźniaŭ Vaładarki ŭ Kaladzičy Piščałaŭski zamak pavinny pieradać horadu.
Čytajcie taksama:
Palitźniavolenaja Valeryja Čarnamorcava: Hanarova siadzieć tam, dzie siadzieŭ Jakub Kołas
Vulica Turemnaja stała Vaładarkaj. Chto taki Vaładarski, z čym imiem asacyjujecca viadomaje SIZA
Jak Jakub Kołas siadzieŭ na «Vaładarcy» za niesankcyjanavany schod
