Fota: Evgeniy Maloletka / AP

Fota: Evgeniy Maloletka / AP

Zachad straciŭ adčuvańnie nieabchodnaści terminovych dziejańniaŭ, a mnohija ŭkraincy — adčuvańnie ekzistencyjalnaj pahrozy, kaža Zialenski.

«Moža być, my nie atrymali pośpiechu [u 2023 hodzie], jak taho chacieŭ śviet. Moža być, nie ŭsio tak chutka, jak chtości sabie ŭjaŭlaŭ», — kaža jon, ale ideja pra toje, što Pucin pieramahaje, — heta nie bolš čym «adčuvańnie».

Pavodle jaho, rasijskaja armija niasie vielizarnyja straty. Hetaj zajavie adpaviadajuć acenki brytanskaj raźviedki, zhodna ź jakimi, kali situacyja radykalna nie źmienicca, da 2025 hoda Rasija stracić bolš za 500 000 zabitymi i paranienymi.

«Tysiačy, tysiačy zabitych rasijskich sałdat, trupy jakich nichto navat nie zabraŭ», — kaža Zialenski, nahadvajučy, što ŭ 2023 hodzie Rasija nie zmahła ŭziać nivodnaha bujnoha horada, u toj čas jak Ukraina zdoleła prarvać rasijskuju błakadu Čornaha mora i ciapier pieravozić miljony ton zbožža pa novym maršrucie pa paŭdniovym uźbiarežžy Ukrainy. «Vielizarny vynik!» — zajaŭlaje prezident.

Ale Zialenski razumieje, što ŭsprymańnie rečaisnaści moža abiarnucca realnaściu, staŭšy svajho rodu prahnozam, jaki zbyŭsia. Mienavita heta robić 2024 hod takim važnym. Pa miery taho jak vajennyja namahańni Rasii naroščvajucca, a resursy Ukrainy źmianšajucca, uvaha Amieryki i mnohich jeŭrapiejskich krain pieranakiroŭvajecca na ŭnutranuju palityku ŭ hod vybaraŭ.

Zialenski śćviardžaje, što, padtrymlivajučy Ukrainu, Jeŭropa abaraniaje siabie ad rasijskaj ahresii.

«Dajučy nam hrošy ci dajučy nam zbroju, vy padtrymlivajecie siabie. Vy ratujecie svaich dziaciej, a nie našych», — papiaredžvaje jon. Kali Rasii dazvolać zabirać ukrainskich dziaciej, «jany buduć zabirać inšych dziaciej». Kali Rasija budzie parušać pravy ŭkraincaŭ, «jana budzie parušać pravy va ŭsim śviecie».

«Pucin adčuvaje słabaść, jak žyvioła, bo jon i jość žyvioła. Jon adčuvaje kroŭ, jon adčuvaje svaju siłu. I jon źjeść vas na viačeru z usimi vašymi ES, NATO, svabodaj i demakratyjaj», — kaža Zialenski.

«Moža, čahości nie chapaje. Ci, moža być, kahości nie chapaje. Kahości, chto moh by kazać pra Ukrainu jak pra abaronu ŭsich nas».

Jeŭrapiejskija krainy pavinny łabiravać u Amierycy padtrymku Ukrainy dziela ich ža vyhody: «raźviedvalnyja słužby niekalkich jeŭrapiejskich krain pačali [vyvučać] mahčymaść napadu na ich terytoryju z boku Rasiei… navat tyja krainy, jakija nie ŭvachodzili ŭ SSSR».

Što tyčycca prapanoŭ ab pieramovach, to, sa słoŭ Zialenskaha, jon nie bačyć «nijakich fundamientalnych krokaŭ da miru z boku Rasiei».

«Ja baču tolki kroki terarystyčnaj krainy», — kaža jon.

I kali Rasija, jak pišuć niekatoryja zachodnija ŚMI, i padaje sihnały ab žadańni zamarozić kanflikt, to «heta nie tamu, što jany praviedniki, a tamu, što ŭ ich niedastatkova rakiet, bojeprypasaŭ i padrychtavanych vojskaŭ. Im patrebna hetaja paŭza. Adnavić siły. A zatym, sabraŭšy ŭsie siły, pieraharnuć staronku hetaj vajny».

Zialenski nie ŭdajecca ŭ razvahi ab mahčymych pośpiechach Ukrainy ŭ 2024 hodzie. Ź jahonych słoŭ, uciečki infarmacyi pierad kontrnastupleńniem minułym letam dapamahli Rasii padrychtavać abaronu. Ale jon ličyć, što asnoŭny ŭpor pryjdziecca na Krym i bitvu ŭ Čornym mory.

Izalacyja Kryma, anieksavanaha Rasijaj u 2014 hodzie, i pasłableńnie rasijskaha vajskovaha patencyjału tam «nadzvyčaj važnyja dla nas, bo heta šlach da skaračeńnia kolkaści napadaŭ z hetaha rehijonu», kaža jon.

Paśpiachovaja apieracyja stanie «prykładam dla ŭsiaho śvietu», praciahvaje jon. Heta taksama budzie mieć vialiki efiekt unutry Rasii. Strata centralnaha abjekta kramloŭskaj prapahandy pakazała b, što «tysiačy rasijskich aficeraŭ zahinuli tolki praz ambicyi Pucina».

Ale chutkaść dasiahnieńnia pośpiechu budzie zaležać ad vajskovaj dapamohi, jakuju Ukraina atrymaje ad zachodnich partnioraŭ, kaža Zialenski.

Jon paprasiŭ dać USU Taurus, kryłatyja rakiety dalokaha radyusu dziejańnia niamieckaj vytvorčaści, zdolnyja razburyć Kierčanski most, faktyčna izalavaŭšy Krymski paŭvostraŭ ad Rasii. «Rasija pavinna viedać, što dla nas heta vajskovy abjekt», — padkreślivaje jon.

Jašče bolš raspłyvista Zialenski kaža pra mety Ukrainy na ŭschodzie i poŭdni.

Zajaŭlenaja im stratehičnaja meta — viarnuć Ukrainu da jaje pieršapačatkovym miežaŭ — nie źmianiłasia i nie źmienicca, ale jon bolš nie kaža pra toje, kali i kolki terytoryi Ukraina zmoža vyzvalić u novym hodzie. Niepasrednaja zadača ciapier — «abarona ŭschodu, vyratavańnie hetych vielmi važnych haradoŭ Ukrainy, uschodu i poŭdnia, Charkava, Dniapra, Zaparožža, Chiersona, Mikałajeva», i abarona krytyčna važnaj infrastruktury krainy.

«My pavinny ŭličvać svaje ŭłasnyja siły», — kaža Zialenski. Choć jon pa-raniejšamu ŭpeŭnieny, što Amieryka ŭ vyniku akaža vajennuju dapamohu, Ukraina, pavodle jaho słoŭ, taksama naroščvaje ŭłasnuju vytvorčaść na vypadak, kali zachodnija pastaŭki apynucca niedastatkovymi. Dla hetaha jon prosić amierykanski ŭrad dać Ukrainie licenzii na vytvorčaść zbroi, ad artyleryjskich sistem i rakiet da srodkaŭ supraćpavietranaj abarony.

Sa słoŭ Zialenskaha, «mabilizacyja ŭkrainskaha hramadstva i ŭsiaho śvietu», takaja prykmietnaja ŭ pačatku vajny, siońnia adsutničaje.

«Heta nieabchodna źmianić», kaža jon, nastojvajučy, što źnižeńniu mabilizacyjnaha ŭzrostu i skaračeńniu padstaŭ dla adterminoŭki ad słužby niama alternatyvy — choć jany i nie papularnyja va ŭkrainskim hramadstvie.

«Mabilizacyja — heta nie tolki sałdaty, jakija adpraŭlajucca na front. Havorka idzie pra ŭsich nas. Heta mabilizacyja ŭsich sił. Heta adziny sposab abaranić našu dziaržavu i vyzvalić našu ziamlu. Davajcie budziem sumlennymi, my pieraklučylisia na ŭnutranuju palityku, — kaža Zialenski. — Kali my praciahniem fakusavacca na ŭnutranaj palitycy, nam treba budzie pryznačyć vybary. Mianiać zakony, Kanstytucyju. Ale tady daviadziecca zabycca pra kontrnastupalnyja dziejańni i deakupacyju».

Zialenski pa-raniejšamu pierakanany, što Ukraina nie moža adstupić ad svajho płana pieramahčy Rasiju.

«Samaja važnaja prafiesija dla ŭkrainca siońnia — heta być va Ukrainie…, a dla našych zachodnich partnioraŭ — być z Ukrainaj… kali ŭ vas niama sił, to adydzicie ŭ bok. My nie adstupim», — kaža prezident Ukrainy.

Čytajcie taksama:

Čamu Ukraina nie atakavała Biełaruś u adkaz na zapuski rakiet i navošta «addaje naležnaje» Łukašenku

Zialenski pryjechaŭ na pazicyi USU ŭ Aŭdziejeŭcy

Załužny raskazaŭ, u čym była jahonaja hałoŭnaja pamyłka

Клас
62
Панылы сорам
6
Ха-ха
8
Ого
6
Сумна
9
Абуральна
10