Ihar Łosik

Ihar Łosik

26 śniežnia na imia Ihara Łosika pryjšła pozva, u jakoj jon nazvany «daŭžnikom». Sudovy vykanaŭca patrabuje terminova spahnać z Łosika «vydatki na ŭtrymańnie dziciaci, kirujučysia artykułam 37 Zakona Respubliki Biełaruś «Ab vykanaŭčaj vytvorčaści».

U vypadku niajaŭki da sudovaha vykanaŭcy «biaz važkaj pryčyny» Ihara Łosika mohuć «pryciahnuć da administracyjnaj adkaznaści pavodle artykuła 25.6 Kodeksa ab administracyjnych pravaparušeńniach», paznačana ŭ poźvie.

Asadkaj unizie arkuša napisana: «Źviažyciesia terminova z sudovym vykanaŭcam».

Z pozvy vynikaje, što ŭ adździele prymusovaha vykanańnia Baranavickaha rajona i Baranavičaŭ nie viedajuć, što Łosik užo 3,5 hoda znachodzicca za kratami.

Ihara Łosika zatrymali ŭ jaho doma ŭ Baranavičach 25 červienia 2020 hoda. U śniežni 2021 hoda Homielski abłasny sud pryznačyŭ jamu 15 hadoŭ kałonii. Pakarańnie Ihar adbyvaje ŭ Navapołackaj kałonii № 1, z 20 lutaha 2022 hoda suviazi ź im niama. Pavodle infarmacyi daśviedčanaj krynicy, jon užo bolš za 6 miesiacaŭ znachodzicca ŭ pamiaškańni kamiernaha typu.

18 kastryčnika 2022 hoda zatrymali žonku Ihara Darju Łosik, u studzieni 2023 hoda jaje asudzili na 2 hady za kamientar telekanału «Biełsat», jaki byŭ pryznany «ekstremisckim». Darja adbyvaje pakarańnie ŭ Homielskaj žanočaj kałonii № 4.

U Ihara i Dašy Łosikaŭ jość čatyrochhadovaja dačka Paŭlina, apieku nad jakoj aformili baćki Darji. Ad dziaržaŭnaj dapamohi na dzicia jany admovilisia, hadujuć i vychoŭvajuć unučku razam z baćkami Ihara.

Heta ŭžo nie pieršaja pozva, jakaja prychodzić na imia Ihara Łosika z suda i adździeła prymusovaha vykanańnia Baranavickaha rajona.

Čytajcie taksama:

Pravaabaroncy nazvali ličbu zatrymanych paśla viartańnia z-za miažy

Biełaruskich palitviaźniaŭ čamuści pieravodziać u inšyja kałonii

Mahiloŭcu Alaksandru Kulikovu, jaki pavieryŭ siłavikam i viarnuŭsia z Polščy, dadali jašče 1,5 hoda źniavoleńnia

Клас
3
Панылы сорам
7
Ха-ха
1
Ого
1
Сумна
2
Абуральна
30