Fota: Agility Robotics
Kampanija Agility Robotics padzialiłasia videa z adnym sa svaich robataŭ pa imieni Digit z ustalavanym ŠI. Niahledziačy na tryvohu, źviazanuju z žachlivymi vobrazami razumnych mašyn z pop-kultury, demanstracyjnaje videa pakazvaje biaskryŭdnaha składskoha robata, jaki pavolna, kali nie ź ciažkaściu, pracuje nad vykanańniem krychu zahadkavaj zadačy biez pramoha kantrolu čałavieka abo padrabiaznych instrukcyj. Tym nie mienš, choć i nie nadta chutka, ale ŭsio ž paśpiachova jon interpretuje i vykonvaje kamandu: «Vaźmicie skrynku koleru śvietłavoha miača Darta Viejdara i pieramiaścicie jaje na samuju vysokuju viežu ŭ pieršym šerahu».
Agility Robotics razhladaje demanstracyju jak problisk taho, jak vialikija moŭnyja madeli mohuć palepšyć ich humanoidnyja mašyny. U kampanii miarkujuć, što heta naturalnaja adpaviednaść, i apisvajuć Digit jak «fizičnaje ŭvasableńnie štučnaha intelektu».
Dla dema-videa była stvorana śpiecyjalnaja prastora z šeraham pranumaravanych viežaŭ roznaj vyšyni, a taksama byli ŭziatyja try skrynki z mnostvam vyznačalnych charaktarystyk. Digit atrymaŭ infarmacyju pra hetaje asiarodździe, ale pry hetym nie atrymaŭ nijakaj kankretnaj infarmacyi pra zadačy i pryznačeńnie asiarodździa. Zamiest hetaha robatu davali naturalnyja moŭnyja kamandy roznaj składanaści, kab daviedacca, ci zmoža jon ich vykanać.
Videa pakazvaje ŭnutrany manałoh Digit krok za krokam, kali robat razvažaje nad vykanańniem zadačy. Naprykład, «Ja pavinien daviedacca, jakija kamandy ja mahu vykarystoŭvać»; «Ja pavinien spačatku acanić asiarodździe, kab ubačyć, jakija pradmiety i miescy dastupnyja»; i narešcie «Śvietłavy mieč Darta Viejdara čyrvony, i tamu čyrvonaja skrynka (box2) — heta taja, da jakoj mnie treba ruchacca. Samaja vysokaja vieža ŭ pieršym šerahu — pad numaram 4 (tower4). Spačatku ja budu ruchacca da miesca, dzie znachodzicca box2».
Paśla pieramiaščeńnia da miesca čyrvonaj skrynki Digit praciahvaje: «Ciapier, kali ja na miescy skrynki box2, ja pavinien zabrać jaje. Ciapier, kali ŭ mianie jość box2, ja pavinien pierajści da miesca samaj vysokaj viežy ŭ pieršym šerahu, heta tower4. Ciapier, kali ja la tower4, ja pavinien raźmiaścić box2 na joj». Narešcie jon zajaŭlaje pra zaviaršeńnie svajoj pracy: «Ja liču, što vykanaŭ zadaču, bo pieramiaściŭ skrynku koleru śvietłavoha miača Darta Viejdara (čyrvonaja, skrynka 2) na samuju vysokuju viežu ŭ pieršym šerahu (vieža 4)».
Agility Robotics, jakaja pretenduje na toje, što Digit pazbavić pracaŭnikoŭ ad najbolš ciažkaj fizičnaj aktyŭnaści, kaža, što stvaryła demanstracyju, kab «pakazać, jak vialikija moŭnyja madeli mohuć zrabić ich robataŭ bolš univiersalnymi i chutkimi ŭ razhortvańni.
Engaget raspaviadaje, što kampanija buduje fabryku ŭ amierykanskim Arehonie dla vytvorčaści 10 000 čałaviekapadobnych robataŭ štohod. Agility Robotics taksama padpisała pahadnieńnie z Amazon ab tym, kab robata Digit testavali na pradpryjemstvie Amazon u Sietle.
Kali pakinuć u baku fantastyčnyja strachi, pakul robaty značna čaściej nanosiać škodu ludziam, kradučy ich składskija pracoŭnyja miescy, čym źbirajučysia zładzić apakalipsis i pieratvaryć usich ludziej u biazdušnyja batarejki. Jak ni sumna, apošnim dvum punktam pakul značna lepš dajuć rady sami ludzi.
Čytajcie taksama:
U minskim kafe źjaviŭsia pieršy robat-aficyjant. Ale čałavieku jon sastupaje
«Rasija vybrała svoj šlach». Miadźviedzieŭ pahražaje Zachadu hipierhukam
