«Kali chodziš na balničny, to i 554 nie vychodzić»

U Maryi vyšejšaja adukacyja. Da sychodu ŭ dekret jana pracavała ŭ handli, dzie jaje zarobak byŭ vyšejšy za «minimałku». Ale kali nadyšoŭ čas vychodzić z dekreta, dziaŭčyna była vymušana šukać inšuju pracu. Bližejšuju da doma. Voś i ŭładkavałasia ŭ dziciačy sadok pamočnikam vychavaciela. 

— Da dekreta zarpłata ŭ mianie była 600 rubloŭ. Ale tady i ceny mienšyja byli. Ciapier ja atrymlivaju 554-570 rubloŭ. Z padpracoŭkami — 600-630. Ale kali chodziš na balničny, to i 554 nie vychodzić, — raspaviadaje haradžanka. — Pajšła pracavać u sad z-za hrafika. Muž pracuje za horadam. Byvaje, što biez vychodnych. A dziaciej treba niekamu hladzieć. Praca ž, sadok i škoła — u 15-20 chvilinach ad doma pieššu. 

Źviestak ab tym, kolki rabotnikaŭ u Biełarusi atrymlivajuć minimalnuju zarpłatu, u adkrytym dostupie niama. Ale prykładna kožnaja vośmaja vakansija Dziaržsłužby zaniataści ŭ Baranavičach prapanuje «minimałku» abo blizki da jaje zarobak. 

Rabočy dzień Maryi pačynajecca ŭ 7:45 i zakančvajecca ŭ 16:30. U jaje asnoŭnyja abaviazki ŭvachodzić prybirańnie pamiaškańniaŭ (hrupy i nie tolki) pa niekalki razoŭ na dzień. Plus prybirańnie placoŭki na vulicy, kudy małyja chodziać na prahułki. Atrymańnie ježy, sierviroŭka stałoŭ i myćcio posudu. Taksama jana dapamahaje vychavacielu ź dziećmi.

Praca, kaža Maryja, ciažkaja. Asabliva, kali dziela lišniaj kapiejki biareš padpracoŭku ŭ inšaj hrupie, imknučysia ŭsio ŭsiudy paśpieć. 

— Praca składanaja jašče i ŭ emacyjnym płanie. Dzieci roznyja byvajuć. I ź niaščasnych siemjaŭ. Duša balić za takich dzietak. Dyj kiraŭnictva, byvaje, moža niervy pakałašmacić. Ale pracuješ, tamu što vymušana pracavać, — kaža dziaŭčyna. 

«Avans sychodzić dzion za vosiem»

Na što chapaje zarobku pamočnika vychavaciela? «Dy amal ni na što», — kaža Maryja. 

— Hrošy nam dajuć dva razy na miesiac. Avans sychodzić niedzie dzion za vosiem. Maksimum — dziesiać. Z zarobku ja płaču 75 rubloŭ rasterminoŭki. I kładu 30 rubloŭ sabie na telefon i synu na hadzińnik. Na lačeńnie mnie byli patrebnyja hrošy, pa 100 rubloŭ kožny miesiac adkładała, — pieraličvaje dziaŭčyna. — Na bytavuju chimiju i leki, kali dzieci chvarejuć, sychodzić prykładna pa 50 rubloŭ. Na kaśmietyku vydatkoŭvaju 20 rubloŭ, 30 — na viejki. Astatniaje — na ježu. Za kamunałku, sad dzieciam, pradukty, adzieńnie płacim z zarpłaty muža.

Muž, pa słovach Maryi, zarablaje ŭ niekalki razoŭ bolš za jaje. Ale ŭsio roŭna nie ekanomić u siamji nie atrymlivajecca.

— Na dzieciach i ježy my nie ekanomim. A sabie kuplajem adzieńnie abo abutak tolki pa patrebie. I starajemsia brać dobruju, kab na paru hadoŭ chapiła. A chaciełasia b i sabie niešta kuplać, kaśmietyku daražejšuju, — kaža haradžanka.

«Budu šukać inšuju pracu»

Navinie pra toje, što z novaha hoda minimalny zarobak u Biełarusi padnimuć, Maryja ŭzradavałasia. Adnak jana nie vieryć, što jaje zarobak ad hetaha mocna vyraście.

— 626 rubloŭ — heta ž da vyliku padatku. Kali jaho adniać, atrymajecca kala 580. I toje, kali ceły miesiac pracavać. A kali na balničny pajdu, znoŭ ža 500-530 atrymaju, — padličyła haradžanka.

Pa słovach Maryi, kali b za jaje pracu płacili rubloŭ 800-850 rubloŭ, «było b vydatna».

— A tak pracuješ vymušana. Ciakučka vialikaja, bo pracy šmat, a płaciać mała. Ja sama da leta papracuju, a tam budu šukać inšuju pracu, — kaža Maryja.

Na dumku haradžanki, toje, što dziaržava ŭstanaŭlivaje pamier minimalnaj zarpłaty, mahčyma, dla kahości i nie drenna. Ale nie dla jaje.

— Dla tych, chto pracuje na nizkaapłatnych rabotach, heta harant, što jany atrymajuć svaje hrošy. Ale, ź inšaha boku, jość takaja praca, za jakuju musiać bolš płacić. Naprykład, jak naša ŭ dziciačych sadkach, — adznačaje dziaŭčyna.

Na pytańnie ž, ci realna pražyć na minimalnuju zarpłatu, Maryja adkazvaje adnaznačna: «Nie, viadoma!»

— U dački tolki za sadok i hurtok vychodzić 124 rubli. U syna pradoŭžanka i dadatkovyja zaniatki ŭ škole — jašče 152. Na kamunałku ŭ miesiac sychodzić jašče 150 rubloŭ. I heta ŭ nas svaja kvatera! — pieraličvaje Maryja. — A treba jašče i niešta ŭ dom kupić, i adzieńnie dzieciam, i pajeści.

Minimalnaja zarabotnaja płata — heta dziaržaŭny minimalny sacyjalny standart u halinie apłaty pracy. Hety standart najmalnik abaviazany prymianiać u jakaści minimalnaj miažy apłaty pracy. Pamier «minimałki» ŭstanaŭlivajecca štohod 1 studzienia Savietam Ministraŭ Biełarusi. Minimalny zarobak u Biełarusi z 1 studzienia 2024 hoda padvysiać ź ciapierašnich 554 rubloŭ da 626.

Čytajcie taksama:

«Chacieła ŭładkavacca prybiralščycaj. Skazali: lepš ałkaša voźmiem». Jak admaŭlajuć u pracy paśla sutak ci štrafu za palityku

«I ŭsio ž vyrašyć kadravaje pytańnie pakul nie atrymoŭvajecca». Jak u Baranavičach šukali kadry dla pradpryjemstvaŭ

«Chočaš tancavać — tancuj, chočaš malavać — maluj». U Mahilovie źjaviłasia dziaŭčyna-karcina sa składanym losam

Клас
Панылы сорам
Ха-ха
Ого
Сумна
Абуральна

Chočaš padzialicca važnaj infarmacyjaj ananimna i kanfidencyjna?