Padčas sieminara ŭ Biełaruskim moładzievym chabie ŭ Zoom-je pierad udzielnikami źjaviŭsia namieśnik načalnika śledčaha ŭpraŭleńnia Kamiteta dziaržbiaśpieki Kanstancin Byčak. Skrynšot ź videa ANT

Padčas sieminara ŭ Biełaruskim moładzievym chabie ŭ Zoom-je pierad udzielnikami źjaviŭsia namieśnik načalnika śledčaha ŭpraŭleńnia Kamiteta dziaržbiaśpieki Kanstancin Byčak. Skrynšot ź videa ANT

18 listapada ŭ dziaržaŭnych ŚMI vyjšaŭ novy prapahandyscki filmik. U im śćviardžajecca, što łukašenkaŭskija śpiecsłužby hod razvodzili i vykarystoŭvali aktyvista Biełaruskaj chryścijanskaj demakratyi Aleha Aksionava.

Doŭhaja hulnia skončyłasia efiektnym źjaŭleńniem namieśnika načalnika śledčaha ŭpraŭleńnia Kamiteta dziaržbiaśpieki Kanstancina Byčaka ŭ zumie anłajn-sieminara pa biaśpiecy dla aktyvistaŭ emihracyi. 

59-hadovy Aleh Aksionaŭ — aficer zapasu z Mahilova, pa svajoj armiejskaj śpiecyjalnaści — viertalotčyk. U horadzie nad Dniaprom jon pracavaŭ dyrektaram spartovaj bazy i trenieram pa parusnym sporcie, kiraŭnikom spartkłuba, a paśla viadučym inžynieram adździeła sacyjalnaha zabieśpiačeńnia zavoda «Mahiloŭtransmaš».

U 1997 hodzie jon staŭ pieršym sakratarom Leninskaha rajkama BPSM — arhanizacyi, paźniej pierajmienavanaj u BRSM. Paśla pracavaŭ indyvidualnym pradprymalnikam, kiraŭnikom filijała kaapieratyva «Kłer», dyrektaram firmy «TDA PrajektMantaž». U 2010 hodzie ŭładkavaŭsia hruzčykam na Mahiloŭski domabudaŭničy kambinat. Tam jon staŭ inicyjataram zabastoŭki, u vyniku jakoj patrabavańni byli častkova vykananyja administracyjaj pradpryjemstva, ale samoha Aksionava zvolnili.

Da Biełaruskaj chryścijanskaj demakratyi Aksionaŭ dałučyŭsia ŭ 2010 hodzie. U 2013-m staŭ mahiloŭskim kaardynataram hetaj partyi, jakuju łukašenkaŭcy ŭparta nie chacieli rehistravać. U toj ža hod KDB vynies jamu papiaredžańnie za dziejnaść ad imia niezarehistravanaj arhanizacyi i pastaviŭ na prafiłaktyčny ŭlik. Aksionava taksama nie raz zatrymlivali i sudzili pa administracyjnych spravach.

Mahiloŭski žurnalist, jaki paprasiŭ zastacca ananimnym, raskazaŭ «Našaj Nivie», što Aksionaŭ byŭ adnym ź lidaraŭ «darmajedskich» pratestaŭ u 2017-m. A voś padčas pratestaŭ 2020 hodu jon čamuści źnik i jaho zusim nie było vidać. Pry hetym u Kaardynacyjnuju radu apazicyi jon uvajšoŭ.

Biełaruś Aksionaŭ pakinuŭ u lutym 2022 hoda, vyjechaŭ u Polšču. Na čužynie jon pracavaŭ to achoŭnikam, to hruzčykam.

Viersija, raskazanaja ŭ filmie ANT (pravieryć jaje «Naša Niva» pakul nie moža), — nastupnaja. U niejki momant Alehu Aksionavu prapanujuć vakansiju — pazaštatny aŭdytar Padlikovaj pałaty Jeŭrapiejskaha sajuza. Ën adpraŭlaje reziume, i budučaha aŭdytara zaprašajuć na navučańnie ŭ Zoom. Toje, što jaho vučać pa-rasiejsku, jaho nie naściarožvaje. «Padlikovaja pałata» prosić Aksionava zdabyvać infarmacyju pra toje, jak biełaruskija apazicyjnyja struktury vykarystoŭvajuć hranty Jeŭrapiejskaha sajuza — ci nie raskradajuć? Aksionaŭ zhadžajecca być tajemnym jeŭrapiejskim aŭdytaram, choć nasamreč kamunikuje ź biełaruskim KDB.

Bolš za hod Aksionaŭ naviedvaje samyja roznyja mierapryjemstvy i asiarodki i dasyłaje infarmacyju, jakuju jamu ŭdajecca zdabyvać, svajmu kurataru. Za spravazdačy jamu, jak śćviardžajecca, dasyłali hanarary.

U subotu 18 listapada ŭ varšaŭskim Biełaruskim moładzievym chabie byŭ arhanizavany sieminar na temy biaśpieki — fizičnaj, finansavaj i ličbavaj. Chiedłajnieram pavinien byŭ stać pradstaŭnik Padlikovaj pałaty Jeŭrasajuza. Adnak zamiest jaho padčas sieminara ŭ Zoom-je pierad udzielnikami raptam źjaviŭsia namieśnik načalnika śledčaha ŭpraŭleńnia Kamiteta dziaržbiaśpieki Kanstancin Byčak. «Pierš za ŭsio, ad asoby Kamiteta dziaržaŭnaj biaśpieki ja chacieŭ by padziakavać hramadzianinu Aksionavu za doŭhaje i plonnaje supracoŭnictva z nami, — zajaviŭ jon. — Kali pytańniaŭ nie ŭźnikła, prapanuju ličyć mierapryjemstva ahulnaj prafiłaktyki paśpiachova zavieršanym. Sustreniemsia ŭ śledčym upraŭleńni KDB», — skazaŭ jon na zaviaršeńnie svajho karotkaha śpiču.

Darečy, Kanstancin Byčak atrymaŭ pavyšeńnie pa słužbie paśla taho jak pracavaŭ śledčym pa spravach ab pratestach 2010 hoda. Jaho padślednyja va ŭspaminach pisali, što Byčak pracavaŭ addana. Tahačasny kiraŭnik śledčaha ŭpraŭleńnia KDB Dźmitryj Hara ciapier pracuje kiraŭnikom Śledčaha kamiteta.

Čamu Kamitet dziaržaŭnaj biaśpieki vyrašyŭ skončyć hulniu z Aksionavym mienavita ciapier? Adkazu na hetaje pytańnie pakul niama.

«Vitaju. Pry pryvatnaj sustrečy», — adkazaŭ Aleh Aksionaŭ na prośbu žurnalista «Našaj Nivy» raskazać svaju viersiju padziej, vysłaŭšy ŭ fejsbuk. 

Abnoŭlena

Aksionaŭ daŭ kamientar «Miedyjazonie» i patłumačyŭ, jak tak adbyłosia. 

— Heta pačałosia paśla adnaho mierapryjemstva, dzie ja paznajomiŭsia z deputatam Jeŭraźviazu, jaki sapraŭdy źjaŭlajecca čalcom kamisii pa biaśpiecy.

Ale chtości skarystaŭsia našymi razmovami. Paśla hetaha ad «jaho» imia vyjšli na suviaź, prapanavali pracu. Ja ŭvieś čas ličyŭ, što heta sapraŭdy tak, — skazaŭ Aksionaŭ.

Heta było u kancy minułaha hoda, padčas sieminara. Supracoŭnik KDB pradstaviŭsia «Andrejem» (surazmoŭcy kamunikavali praz telehram). Skazaŭ, što znachodzicca ŭ niejkaj kamisii, ofis jakoj znachodzicca ŭ Łondanie.

Aksionavu treba było zrabić testavyja zadańni dla taho, kab nibyta stać supracoŭnikam analityčnaha adździeła biaśpieki Jeŭraźviazu.

— [Pracaj] była prysutnaść na mierapryjemstvach. Usia heta infarmacyja, nasamreč, nie vartaja ničoha, tamu što jana była ŭ adkrytym dostupie. Mianie zapytvali ŭvieś čas pra finansavy składnik. Ale ž, pakolki ja nie źjaŭlaŭsia arhanizataram mierapryjemstvaŭ, nijakaj infarmacyi ŭ hetym płanie nie było. Tamu ja prosta paznačaŭ, što prajšło mierapryjemstva, prysutničali stolki čałaviek, — skazaŭ jon.

Aksionaŭ zrabiŭ čatyry spravazdačy ź mierapryjemstvaŭ, na jakich prysutničaŭ. Pavodle jaho słovaŭ, heta byli śpisy ŭdzielnikaŭ.

Čytajcie taksama:

«Ahient moh bačyć asabistyja danyja ludziej, jakija dasyłali infarmacyju ŭ bot». Viačorka i «Infapojnt» prakamientavali situacyju z ČKB

«Zły dalnaboj» admaŭlaje pracu na HUBAZiK. A što ź jaho mabilnymi prahramami?

Клас
9
Панылы сорам
140
Ха-ха
31
Ого
16
Сумна
13
Абуральна
62